Միշտ հակասական. ով է Գառնիկ Մարգարյանը

Jan 17, 2016 Comments Off on Միշտ հակասական. ով է Գառնիկ Մարգարյանը

Նոյեմբերին ձերբակալված զինված խմբի հետ հանցավոր կապի համար մի քանի օր առաջ ԱԱԾ-ի կողմից ձերբակալված <<Հայրենիք եւ պատիվ>>  կուսակցության ղեկավար Գառնիկ Մարգարյանը կանգնած է եղել Հայաստանի նորանկախ պատմության ակունքներում: Թե ինչ կապ ունի ոստիկանության համակարգում երկար տարիներ ղեկավար պաշտոններ զբաղեցրած, պահեստազորի գնդապետ Մարգարյանը Նորք-Մարաշում հայտնաբերված խմբի հետ, ԱԱԾ-ն առայժմ չի մանրամասնում,սակայն անհերքելի է, որ մշտապես Մարգարյանը աչքի է ընկել իր հակասական քաղաքական հայացքներով ու դիրքորոշումներով:
Գառնիկ Մարգարյանը ծնվել է 1944թ-ին, Երևանում: Ավարտել է Սահմանապահ զորքերի բարձրագույն ուսումնարանը, ՆԳՆ ակադեմիան: ԱԱ և ՆԳ գնդապետ է, Ղարաբաղյան ազատամարտի մասնակից: 1993թ.-ից ազատվել է ՆԳՆ-ում զբաղեցրած պաշտոնից: Պաշտոնանկությունից երկու տարի անց Գառնիկ Մարգարյանը հայտնվում է իրավապահների ուշադրության կիզակետում:
Ի դեպ, Գառնիկ Մարգարյանի նկատմամբ նախկինում արդեն երկու քրեական գործ է հարուցվել, բայց երկուսն էլ կարճվել են` հանցակազմի բացակայության հիմքով:

1995թ-ին Մարգարյանի դեմ քրեական գործ է հարուցվել, որը առավել հայտնի է  <<գնդապետների>> գործ:Ձերբակալվեց  նաև երկու տարի առաջ  ՆԳՆ և ԱԱ գնդապետի պաշտոնից հեռացված Գառնիկ Մարգարյանը: Անազատությունից դուրս գալով Գառնիկ Մարգարյանը կրկին սլացավ քաղաքական ասպարեզ: 2003թ-ի նախագահական ընտրություններին նա առաջադրեց իր թեկնածությունը, բայց լինելով նախագահի թեկնածու, հայտարարում էր, որ սատարում է Արտաշես Գեղամյանին,ով այդ ժամանակ իր աստեղային ժամն էր ապրում, թեպետ  ընդդիմության ֆավորիտ թեկնածուն Ստեփան Դեմիրճյանն էր: Ընտրություններում Մարգարյանն ընդամենը  800 ձայն ստանացավ, հետո ստվերային կառավարություն ձևավորեց` իրեն վերապահելով պաշտպանության նախարարի աթոռը:
Երկրորդ քրեական գործը Գառնիկ Մարգարյանի նկատմամբ հարուցվեց արդեն 2008 թ-ի փետրվարին: Այն ժամանակ արդեն  Մարգարյանը ղեկավարում էր <<Հայրենիք ու պատիվ>> կուսակցությունը եւ աջակցում էր կրկին քաղաքական ասպարեզ վերադարձած ՀՀ առաջին նախագահ Լեւոն Տեր-Պետրոսյանին: Հենց այդ ժամանակ էր, որ իրավապահների ուշադրության կենտրոնում էին հայտնվում վերջինի աջակիցները, շարքից դուրս չմնաց Գառնիկ Մարգարյանը, ով փետրվարին  բերման  ենթարկվեց ոստիկանություն: Նրա դեմ քրեական գործ  հարուցվեց՝ Քրեական օրենսգրքի 300-րդ հոդվածի հատկանիշներով, այն է` պետական իշխանությունը յուրացնելուն ուղղված գործողություններ: Ոստիկանությունը Գառնիկ Մարգարյանի տանը խուզարկություն էր կատարել,  հայտնաբերել  օրինական գրանցված որսորդական հրացան` իր փամփուշտներով և ինքնաշեն դանակներ, ստարտային ատրճանակ: Սակայն այս մեկն էլ նախորդի պես կարճվեց՝ հանցակազմի բացակայության հիմքով:

2013թ. փետրվարին ինքն իր կուսակցությունը նա դուրս բերեց ՀԱԿ դաշինքից, որի 18 անդամներից մեկն էր, թեպետ մինչ այդ Մարգարյանը անվերապահորեն հավատում էր Տեր-Պետրոսյանին եւ անխնա քննադատում ՀԱԿ-ից դուրս եկողներին: Դրանից հետո Գառնիկ Մարգարյանը անցավ ընդհատակ եւ միայն իրեն հիշեցրեց իր կողմից նախաձեռնված «Հակակոռուպցիոն կազմակերպության» ստեղծմամբ, որն ակտիվ պայքարի մասին էր հայտարարել Հայաստանում կոռումպացված չինովնիկների դեմ, կազմել էին  ցուցակ, որը գլխավորում է  ՀՀ երկրորդ նախագահ Ռոբերտ Քոչարյանը, մյուսների անունները հույժ գաղտնի էին պահվում: Փոխարենը ՀՀ նախկին նախագահի հարցը հայտնվել է ՌԴ նախագահ Վլադիմիր Պուտինի սեղանին եւ տեղի տվել կասկածների, ո Մարգարյանը Սերժ Սարգսյանի հետ է գործակցում:
Գառնիկ Մարգարյանի կենսագրության մեջ կարևոր դրվագ է նաև նրա հայտարարությունն այն մասին, որ Վազգեն Սարգսյանն իրեն ծեծի է ենթարկել: Մինչդեռ նրա մահից հետո նա հայտարարեց, թե Վազգեն Սարգսյանն իրեն կարևորագույն հանձնարարություն էր տվել, որն ինքը չկարողացավ իրականացնել՝ 1999թ. հոկտեմբերի 27-ի պատճառով:
Վերջին տարիներին էլ ն սերտ համագործակցում էր Արեւմտյան Հայաստան պետության վտարանդի կառավարության սփյուռքի կառույցի հետ, նույն գործով ձերբակալված Շիրխանյանի մտերիմն է:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: