Ինչ պատասխան կտա Քոչարյանը ՀՀԿ-ին

Mar 01, 2018 Comments Off on Ինչ պատասխան կտա Քոչարյանը ՀՀԿ-ին

Ազգային ժողովում այսօր աննախադեպ բան տեղի ունեցավ: Հանրապետականը կողմ քվեարկեց 2008-ի Մարտի 1-2-ի իրադարձությունների վերաբերյալ «Ելքի» նախաձեռնած ԱԺ հայտարարության նախագիծը օրակարգ մտցնելու հարցին: Մինչ այդ խմբակցության ղեկավար Նիկոլ Փաշինյանն ասաց, որ քաղաքական ուժերը կարող են թոթափել Մարտի 1-ի բեռը՝ կողմ քվեարկելով: Մինչդեռ ԱԺ պետաիրավական եւ մարդու իրավունքների հանձնաժողովը բացասական եզրակացություն է տվել այս նախագծին: Խմբակցության անդամ Էդմոն Մարուքյանն էլ ասաց, որ անգամ լսումներից հետո ինքն այդպես էլ չհասկացավ, թե ՀՀԿ-ն ինչու է դեմ նախագծին. «Ձեր ելույթների մեջ կային թախծոտ ելույթներ, ներման, սփոփանքի ելույթներ, բա ինչի՞ եք դեմ, կարա՞ մեկը բացատրի»: ՀՀԿ պատգամավոր Գեւորգ Կոստանյանը պատասխանեց, որ հանձնաժողովի նիստում եւ լսումների ժամանակ դետալացված քննարկել են հայտարարության 5 կետերից յուրաքանչյուրը: Կոստանյանն ասաց, որ չնայած ընդհանրապես անիմաստ է գնահատում այդ հայտարարությունը, բայց գտնում է, որ այն պետք է մտցնել օրակարգ եւ քննարկել: Վահրամ Բաղդասարյանը նույնպես կոչով դիմեց խմբակցությանը՝ կողմ քվեարկել նախագծին: Քվեարկությունից հետո ՀՀԿ-ական Սամվել Նիկոյանն լրագրողներին ասաց, թե իրենց մշտապես փորձում են մեղադրել, թե Հանրապետական խմբակցությունը չի ցանկանում, որ հարցը քննարկվի խորհրդարանում և իրենք էլ այս դիրքորոշմամբ փորձում են ցույց տալ, որ որևէ խնդիր չեն տեսնում ևս մեկ անգամ հարցը քննարկելու համար։

Ուշագրավ է, որ խորհրդարանում այս թեմայով հրավիրված լսումների ժամանակ ՀՀԿ-ականները քննադատության եւ պատասխանատվության սլաքներն ուղղեցին ՀՀ առաջին եւ երկրորդ նախագահների ուղղությամբ: Արդյոք այս քայլով Հանրապետականը «մեսիջ» չի՞ ուղղում Ռոբերտ Քոչարյանին, որպեսզի վերջինն ապրիլյան քաղաքական իրադարձություններից առաջ չակտիվանա։ Ի պատասխան Նիկոյանն ասաց, որ խորհրդարանում մարտիմեկյան իրադարձությունների թեմայով լսումների ժամանակ իր ողջ ելույթը, որտեղ նաև Քոչարյանի մասին էր հիշատակվել, ասել է նաև տասը տարի առաջ, երբ ղեկավարում էր մարտի մեկի իրադարձություններն ուսումնասիրող ԱԺ ժամանակավոր հանձնաժողովի աշխատանքը: «Բացեք իմ բոլոր եզրակացությունները և կտեսնեք, որ կրկնել եմ այն, ինչ հայտարարել ու գրել եմ տասը տարի առաջ»,- ասաց Սամվել Նիկոյանը։

Ինչո՞ւ Ռոբերտ Քոչարյանին հարցաքննելու մասին հարցը չի բարձրացվել այն ժամանակ, Սամվել Նիկոյանը պատասխանեց. «Դիմե′ք հարցաքննողներին»։

Պարզվում է՝ Նիկոյանն անձամբ ասել է, որ Քոչարյանը պետք է հարցաքննվի: Ելք խմբակցության պատգամավոր Արամ Սարգսյանը նույնպես ՀՀԿ-ականի գիծն առաջ տարավ «Նախորդ քննարկման ժամանակ, իրենց ելույթներում, ՀՀԿ-ականները միտումնավոր սլաքն ուղղում էին իրենց նախկին նախագահ Ռոբերտ Քոչարյանի վրա»: Արամ Սարգսյանի համար հարցերի հարցը մնում է այն, թե այդ գիշերն ո՞վ է հրաման տվել, որ մտնեն Ազատության հրապարակ. «Գործընթացներն ամսի 26-ից հետո գնում էին մարման: Դա ակնհայտ էր բոլորին: Ու այստեղ արդյոք քաղաքական միտում կա՞ր: Մամուլն է բազմիցս անդրադարձել դրան, որ Ռոբերտ Քոչարյանն ինքնուրույն այդ որոշումը կայացրած լինի՝ հետագայում իրենց ավելի թույլ նախագահ ունենալու եւ իր՝ պահանջարկված լինելու խնդիրը լուծելու համար: Եթե կա այս հարցը, ու ՀՀԿ-ն ուզում է այս խնդիրը լուծել, ճիշտ կանի, որ այդ հարցը բարձրացնի, ու եթե նախկին նախագահն իր բնավորությունը չի փոխել, ինքը պիտի Նիկոյանի նախկին ասածին հակադարձի»:

Մենք դեռեւս լսումների ժամանակ վերլուծելով ՀՀԿ-ականների ելույթները նկատել էինք , որ Քոչարյանին նախազգուշացնող ազդակ է հղվում, որպեսզի ավելորդ ակտիվություն չցուցաբերի: Օրեր առաջ հայտնի դարձավ, որ նա այցելել է Արցախ, հանդիպումներ ունեցել Արցախի ղեկավարության հետ, տեղեկություններ կային, որ նա ակնկալում է ֆորս-մաժորային իրավիճակ, որի ժամանակ հնարավոր կլինի վերցնել իշխանությունը: Կպատասխանի արդյոք Քոչարյանը ՀՀԿ-ականների եւ ինչպիսին կլինի այդ պատասխանը՝ գործի, թե հայտարարության տեսքով, կտեսնենք առաջիկայում:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: