Արեցի առավելագունը, ինչ-որ կարող էի այս պահին. դահուկորդ Միքայել Միքայելյան

Feb 14, 2018 Comments Off on Արեցի առավելագունը, ինչ-որ կարող էի այս պահին. դահուկորդ Միքայել Միքայելյան

Փհենչհանի ձմեռային օլիմպիական խաղերում երեկ մեկնարկած Հայաստանի առաջին ներկայացուցիչը՝ Միքայել Միքայելյանը, դասական սպրինտում հաղթողին պարտվեց 28 վայրկյան ու 79 մարզիկների մեջ զբաղեցրեց 74-րդ տեղը:

ՀԱՕԿ լրատվականը փոխանցում է, թե ինչպես են գնահատում ելույթը ինքը՝ դահուկորդը եւ նրա մարզիչն ու Հայաստանի դահուկասպորտի ֆեդերացիայի գլխավոր քարտուղար Գագիկ Սարգսյանը:

«Զբաղեցրած տեղիցս գոհ չեմ, բայց  արդյունքից գոհ եմ: Եղանակային պայմանները շատ էին դժվարացրել աշխատանքը վազքուղում, բայց ես արեցի առավելագունը, ինչ-որ կարող էի այս պահին: Հետո, երբ տեսա, որ 28 վայրկյան եմ պարտվել հաղթողին, չեք հավատա, բայց ուրախացա: Քայլ առ քայլ ես կբարելավեմ արդյունքներս: Այս ելույթս ինձ հնարավորություն է տալիս լավատես լինել ապագայի նկատմամբ: Չգիտեմ ինչու, ինչ-որ արտասավոր բան էի սպասում, ինչ-որ անսպասելի բան: Բայց այստեղ ամեն ինչ սովորական է: Մարդիկ բարեհամբույր են, ժպտում են անընդհատ, եւ ինձ թվում է, թե սովորական մրցման եմ եկել», – ասաց Միքայելը:

Արթուր Միքայելյանի ու դահուկային սպորտի Հայաստանի ֆեդերացիայի գլխավոր քարտուղար Գագիկ Սարգսյանի մասնագիտական կարծիքները գրեթե նույնն էին: Նրանք նշեցին, որ ուժեղ մրցակիցների հետ պայքարում շատ բարձր տեղ ակնկալելն իրատեսական չէր: Բայց հայ դահուկորդն արել է այն, ինչ-որ կարող էր:

Միքայելյանի հաջորդ մեկնարկն օլիմպիական խաղերում փետրվարի 16-ին է: Այդ օրը հայ դահուկորդը հանդես կգա ազատ ոճով 15 կմ մրցատարածությունում:

Գլխավոր Թողարկում, Սպորտ
Մեկնաբանությունները փակ են: