Ադրբեջանական «աղբը»՝ Սերժ Սարգսյանի ճոխ խաղադրույք

Jan 27, 2018 Comments Off on Ադրբեջանական «աղբը»՝ Սերժ Սարգսյանի ճոխ խաղադրույք

«Ղարաբաղը Ձեզ պետք է առանց հայերի, բայց երբեք չի լինելու», – Եվրոպայի խորհրդի Խորհրդարանական վեհաժողովի (ԵԽԽՎ) բարձր ամբիոնից երեկ հայտարարել է Հայաստանի նախագահ Սերժ Սարգսյանը՝ պատասխանելով ադրբեջանական պատվիրակության ղեկավար Սամեդ Սեիդովի բոցաշունչ հարց-ելույթին: Վերջինս, Սերժ Սարգսյանին անվանելով Ադրբեջանի դեմ սանձազերծված պատերազմի առաջնորդ, խոսել է Ղարաբաղում և հարակից տարածքներում էթնիկ զտումների, հայերի կողմից իրականացված Ցեղասպանության մասին՝ հիշատակելով Խոջալուի դեպքերը:

Ի պատասխան Սերժ Սարգսյանը ասաց, թե Ցեղասպանությունը լավ բան չէ և չարժե, որ Ադրբեջանի փորձի ունենալ մի բան, որը չի եղել և որը հայերը երբեք չեն իրականացրել: «Ես նախ ձեզ խնդրում եմ մի քիչ հանդարտ լինել, հանգստանալ և ապա իմ խոսքերը չխեղաթյուրել։ Ես այս ամբիոնից չհայտարարեցի, որ ես եղել եմ պատերազմի առաջնորդ, ես այդպիսի պատիվ չեմ ունեցել, ես մասնակիցն եմ եղել Լեռնային Ղարաբաղի ժողովրդի արդար պայքարին։ Թե ինչո՞ւ ես չհիշատակեցի Խոջալուի դեպքերը, որ Դուք ցեղասպանություն եք համարում, շատ պարզ պատճառով, որովհետև այդ ցավալի իրադարձություններից անմիջապես հետո Ադրբեջանի նախագահ Այազ Մութալիբովը շատ հանգամանորեն և շատ տեղեկացված ձևով շարադրել է փաստեր և հստակ ցույց տվել, թե ովքեր են եղել այդ ջարդի կազմակերպիչները: Ցեղասպանությունը լավ բան չէ, ցեղասպանություն տանելը դա պատիվ չէ, դա տանջանք է, և կարծում եմ, որ ինչ-որ մի միտում կա Ադրբեջանում` անպայման ունենալ այն, ինչ-որ ունեն հայերը։ Գիտեք, սա անթույլատրելի մի բան է, ի՞նչի է պետք ձեզ մի բան անվանել ցեղասպանություն, որ երբեք չի եղել, և հատկապես հայերի կողմից չի եղել», – ասաց նախագահը՝ շարունակելով. – «Ինչպես երևաց Ձեր խոսքերից, դուք առավելագույնն եք ուզում, դուք անհնարինն եք ուզում, դուք ուզում եք Ադրբեջանի կազմ վերադարձնել Ղարաբաղը։ Ցավոք սրտի, այլատյացությունն Ադրբեջանում այնքան է զարգացել, որ արդեն Դուք բացահայտ հայտարարում եք, որ Ղարաբաղը ձեզ պետք է առանց հայերի, անհնար է, դա երբեք չի լինելու»։

Իր ելույթում խոսելով ղարաբաղյան խնդրի մասին Սերժ Սարգսյանը շեշտել է՝ հակամարտությունը կարգավորելու ժամանակը վաղուց արդեն հասունացել է, դրա համար անհրաժեշտ է պահպանել հրադադարի ռեժիմը և կատարել նախկինում ձեռք բերված բոլոր պայմանավորվածությունները, սակայն Ադրբեջանը պատրաստ չէ խնդրի լուծմանը: Սերժ Սարգսյանը հիշատակել է Ադրբեջանի սանձազերծած 2016թ. ապրիլյան պատերազմը, որն ուղեկցվեց խաղաղ բնակչության և ռազմագերիների դեմ միջազգային հումանիտար իրավունքի աղաղակող խախտումներով: «Դա ծանր հարված էր բանակցային գործընթացին, որն արթնացրեց Սումգայիթի ջարդերի մասին սոսկալի հուշերը», ասել է նա:

Ստեղծվել է մի իրավիճակ, երբ Ադրբեջանի իշխանությունների ավանդական գործելաոճն արդեն իսկ բավական ծիծաղելի է: Խնդիրն այն է, որ բոլոր եվրոպական կառույցներում՝ նախ Ադրբեջանի նկատմամբ որոշակի կոնկրետ վերաբերմունք է ձևավորվել՝ այդ երկրում հաստատված բռնատիրական կարգերի նկատմամբ:

Ալիևն իր գործելաոճով քայլ առ քայլ, ապացուցեց, որ այդ երկրում անգամ սեփական քաղաքացիներն են հետապնդվում ու հալածվում, ուր մնաց՝ Լեռնային Ղարաբաղի հայերի նկատմամբ հումանիզմ ակնկալել նրանից:

Այնուհետև, ժամանակ առ ժամանակ սկսեցին եվրոպական հայտնի պարբերականների էջերում հայտնվել ալիևյան կլանի հանցավոր քայլերը՝ «փողերի լվացման», օֆշորներում գործունեությունից մինչև կոռուպցիոն հազար ու մի գործարքներ:

Որքան էլ Ադրբեջանի նախագահը փորձի աշխարհին երևալ նավթադոլարներով «հրապուրիչ» երկրի նախագահ՝ նա արդեն իսկ հասցրել է ցույց տալ այդ երկրի «աղբը»:

Երկար տարիների ընթացքում՝ այսօր փոխվել է եվրոպական կառույցների վերաբերմունքը Ալիևի նկատմամբ: Իհարկե, նա որոշ կոռումպացված եվրոպացիների «գնել» էր, տասնյակ հազարավոր դոլարներ էր ծախսել, բայց իրականում, խոշոր հաշվով դրանք արդյունք չեն տվել: Բացահայտվել են նրա «առևտրային» գործարքները, ու հիմա եվրոպացիների համար իսկապես վտանգավոր կլինի Ալիևի հետ «շփումներ» ծավալելը:

Այս իրավիճակում, հայկական կողմը բավական առավելություններ ունի և նպաստավոր իրավիճակում է հայտնվել, և այդ մթնոլորտը, նախևառաջ, պետք է օգտագործել Լեռնային Ղարաբաղի հակամարտության նկատմամբ Արևմուտքի վերաբերմունքի ուղղությամբ հետևողական աշխատանքի կազմակերպման համար:

Աշխարհը մի քանի տարի առաջ շատ կտրուկ էր ԼՂ հարցում. այսօր այդպես չէ, աշխարհը հասկանում է, թե ինչու Լեռնային Ղարաբաղը ինչու չի կարող Ադրբեջանի կազմում լինել:

Թամար Բագրատունի

Գլխավոր Թողարկում, Վերլուծություն
Մեկնաբանությունները փակ են: