Սերժ Սարգսյանն ասաց, թե ինչ պայմանով է հրավիրել Կարեն Կարապետյանին

Dec 18, 2017 Comments Off on Սերժ Սարգսյանն ասաց, թե ինչ պայմանով է հրավիրել Կարեն Կարապետյանին

Սերժ Սարգսյանը «Արմենիա» հեռուստաընկերությանը տված բացառիկ հարցազրույցում փաստացի հաստատեց, որ Կարեն Կարապետյանին վարչապետի պաշտոնը առաջարկվել է ժամանակավոր: Արտակ Ալեքսանյանի այն հարցին, թե ինչպես է գնահատում կառավարության գործունեությունը, այն դեպքում, երբ նախորդ բոլոր վարչապետների առջև տնտեսական արդյունք ապահովելու պահանջ է դրվել՝ կոնկրետ ցուցանիշների տեսքով, և հրապարակավ ասվել է՝ նախանշված աճն ապահովելու դեպքում վարչապետը կշարունակի պաշտոնավարել, եթե ոչ, ուրեմն՝ ոչ, մինչդեռ Կարեն Կարապետյանի դեպքում չկա այդպիսի հրապարակային պահանջ:

«Կարեն Կարապետյանի կառավարության առջև էլ էր շատ կոնկրետ խնդիր դրված, և խնդիրը բառացիորեն հետևյալն էր՝ հասնել արդյունավետ կառավարման։ Այո՛, տնտեսական աճի կոնկրետ խնդիրներ չէինք դրել, որովհետև դա պայմանավորված էր մեր ինտեգրացիոն պրոցեսներում տեղի ունեցող որոշակի հարցերով և այլն և այլն։ Բայց ես կարծում եմ, որ Կարեն Կարապետյանը և նրա գլխավորած կառավարությունը իրենք իրենց առջև են խնդիր դրել, և այդ խնդիրը 5-6 տոկոս տնտեսական աճն է։ Եվ եթե մարդն ինքն իր առջև խնդիր է դնում, եթե կառավարությունը իր առջև խնդիր է դնում, և այդ խնդիրը խորը հակադրության մեջ չի մտնում քո պատկերացումների հետ, պարտադի՞ր է արդյոք հայտարարել դրա մասին»,- ի պատասխան ասել է Սերժ Սարգսյանը:

Սա շատ ուղղակի խոստովանություն է, որ Կարեն Կարապետյանին Մոսկվայից Երևան բերելով՝ Սերժ Սարգսյանը լուծել է նախ և առաջ քաղաքական խնդիր, իսկ տնտեսական հետևանքներն անգամ կանխատեսման մակարդակով այդ փուլում չեն կարևորվել: Սերժ Սարգսյանը տնտեսական աճի կոնկրետ պահանջ՝ 7 տոկոս աճի ցուցանիշ էր սահմանել նախկին վարչապետ Տիգրան Սարգսյանի համար, նույն խնդիրը դրված էր նաև Հովիկ Աբրահամյանի առջև: Ֆորմալ առումով հենց այդ ցուցանիշները չապահովելու պատճառով էլ նախկին երկու վարչապետները պաշտոնանկ արվեցին:

Բայց Կարեն Կարապետյանի դեպքում Սերժ Սարգսյանը խոստովանել է, որ առաջնային խնդիրը եղել է իրավիճակային լուծումը՝ «ինտեգրացիոն պրոցեսներում տեղի ունեցող որոշակի հարցերով պայմանավորված»: Այդ ի՞նչ հարցեր են եղել, որոնք ավելի կարևոր են եղել, քան տնտեսական աճի խնդիրը՝ թերևս դժվար չէ հասկանալ: Նման քայլի գնալու ամենալուրջ դրդապատճառը կարող էր լինել քաղաքական հնարավոր վտանգի և ռիսկերի չեզոքացումը: Կարեն Կարապետյանի առջև տնտեսական աճի խնդիր չի դրվել շատ պարզ պատճառով. նա վարչապետի պաշտոնն ստանձնեց խորհրդարանական ընտրություններից ընդամենը ամիսներ առաջ, երբ կառավարությունն ու երկիրն ամբողջությամբ գործում էր նախընտրական գործընթացների տրամաբանության շրջանակում: Այդ պայմաններում երկրի համար տնտեսական աճ ապահովելը իրատեսական չէր լինի, իսկ կոնկրետ տնտեսական աճի թիվ սահմանելն ընդամենը լրացուցիչ շահարկումների տեղիք էր տալու:

Ընտրություններից հետո համակարգը թևակոխեց անցումային փուլ, որն այս պահին դեռ ընթացքի մեջ է և ավարտվելու է 2018 թվականին՝ վարչապետի ինտրիգի հանգուցալուծմամբ և հիմնական պաշտոնների բաժանմամբ: Մինչ այդ տնտեսական ցուցանիշներ պահանջելը լուրջ չէ, առավել ևս Կարեն Կարապետյանից: Դրսի գործարարների կողմից 3 մլրդ դոլարի ներդրումներ ապահովելու մասին բարձրագոչ ճառերը, որոնք նախընտրական փուլում դարձան վարչապետ Կարապետյանի քաղաքական լոզունգը, ընդամենը պարզ բլեֆ էին: Սերժ Սարգսյանը փաստացի ասում է, որ Կարեն Կարապետյանի հետ ներդրումներ ապահովելու տեսանկյունից լուրջ հույսեր չի փայփայել: Կարեն Կարապետյանը ընդամենը «ընդունելի և օգտակար անձնավորություն է», որի ներկայությունը դրական է եղել թե՛ իր, թե՛ կուսակցության համար: Ինչ վերաբերում է ապագա քաղաքական վերադասավորումներին ընդհանրապես, ապա այստեղ Սերժ Սարգսյանն ամբողջությամբ մնացել է իր ոճի մեջ. «Եթե նկատի ունենք կոնկրետ պաշտոնատար անձանց, ապա բանական է, որ ես, իմ գործընկերները մշտապես փնտրտուքի մեջ ենք։ Մի բան կարող եմ ասել, որ սահմանված ժամկետներում կզբաղեցվեն բոլոր պաշտոնները, սրանում կարող եք չկասկածել։ Երբ խոսում եք, որ այս պաշտոնում այս մեկն է լինելու, մյուսում՝ այն մեկը, երևի ճիշտ է, որ խոսում են, մարդիկ իրավունք ունեն կանխատեսումներ անելու, մարդիկ իրավունք ունեն ակնկալելու ինչ-որ բաներ, բայց որևէ տեղ որևէ իշխանություն նախօրոք այդպիսի հայտարարություններ չի անում, և դա ճիշտ է»,- ասել է նա:

Հարցին, թե ինքը հոգնածություն չի՞ զգում՝ Սերժ Սարգսյանը պատասխանել է, որ ինքնազգացողությունը նորմալ է և մինչև վերջ կատարելու է իր պարտականությունը: Մնալո՞ւ եք քաղաքականության մեջ հարցին պատասխանել է մեկ բառով՝ տեսնենք: Տեսնելու բան թերևս չկա, այդ հարցի պատասխանը շատ ակնհայտ է, Սերժ Սարգսյանը երբեք չի խոսել քաղաքականությունից հեռանալու մասին, նա, ինչպես միշտ, վարպետորեն պահում է ինտրիգը:

 

 Հայկ  Դավթյան

 

 

Գլխավոր Թողարկում, Վերլուծություն
Մեկնաբանությունները փակ են: