Պուտինն ու Ասադը տոնում են հաղթանակը

Nov 22, 2017 Comments Off on Պուտինն ու Ասադը տոնում են հաղթանակը

Սոչիում կայացել է ՌԴ նախագահ Վլադիմիր Պուտինի և նրա սիրիացի գործընկեր Բաշար ալ Ասադի հանդիպումը: Սիրիայի ղեկավարը Ռուսաստան էր ժամանել աշխատանքային այցով: Երեկ տեղի են ունեցել ՌԴ նախագահ Վլադիմիր Պուտինի և Սիրիայի նախագահ Բաշար Ասադի բանակցությունները:

Պուտինը շնորհավորել է Ասադին այն արդյունքների կապակցությամբ, որոնց Սիրիան հասնում է ահաբեկչական խմբավորումների դեմ պայքարում: ՌԴ ղեկավարն առանձնահատուկ ընդգծել է սիրիացի ժողովրդի քաջությունը ծանր փորձությունների միջով անցնելու, աստիճանաբար հաղթանակին մոտենալու, ինչպես նաև ահաբեկիչներին վերջնական ջախջախելու հարցերում:

Վլադիմիր Պուտինը Բաշար Ասադին ներկայացրել է ՌԴ Պաշտպանության նախարարության և Գլխավոր շտաբի ղեկավար կազմին, որոնք Սոչիում են գտնվում ռազմական շինարարության և սպառազինության պետական ծրագրի հարցերով խորհրդակցությունների հերթական շարքն անցկացնելու համար: Պուտինը հայտարարել է, որ հիմա Սիրիայում գլխավորը քաղաքական գործընթացներին անցումն է, Սիրիայի նախագահ Բաշար Ասադը պատրաստ է աշխատել նրանց հետ, ովքեր խաղաղություն և կարգավորում են ցանկանում: «Կարծում եմ՝ հիմա, իհարկե, ամենագլխավորը քաղաքական գործընթացներին անցումն է, և գոհունակությամբ նշում եմ ձեր պատրաստակամությունը աշխատելու բոլորի հետ, ովքեր խաղաղություն և կարգավորում են ցանկանում»,- ասել է Պուտինը Սոչիում Սիրիայի նախագահի հետ հանդիպմանը: Ասադն իր հերթին ընդգծել է, որ Մոսկվային և Դամասկոսին հաջողվել է պահպանել Սիրիայի տարածքային ամբողջականությունն ու անկախությունը:

Ուշագրավ է, որ այս հանդիպմանը Պուտինի նշել է, որ քննարկելու է Սիրիայի հարցը մի շարք հեռախոսազրույցների ընթացքում, այդ թվում Վաշինգտոնի հետ: Պուտինը հեռախոսային խորհրդակցություններ անցկացրել ԱՄՆ նախագահի և մերձավորարևելյան տարածաշրջանի մի շարք երկրների առաջնորդների հետ: Զրույցի սղագրությունը հրապարակված է Կրեմլի պաշտոնական կայքում: «Մեր այսօրվա հանդիպման հիման վրա ես խորհրդակցություններ կանցկացնեմ այն երկրների առաջնորդների հետ, որոնց մասին արդեն հիշատակեցի: Արդեն այսօր ծրագրված է զրույց Կատարի էմիրի հետ, վաղը՝ ԱՄՆ նախագահ Դոնալդ Թրամփի, այնուհետև՝ տարածաշրջանի երկրների առաջնորդների հետ»,- ասել է Պուտինը:

Նկատենք, որ վաղը՝ նոյեմբերի 22-ին Սոչիում Պուտինը հանդիպելու է Թուրքիայի նախագահ Ռեջեփ Էրդողանի և Իրանի նախագահ Հասան Ռոհանիի հետ: Մոսկվան ակտիվ աշխատում է նաև այլ երկրների հետ՝ Իրաքի, ԱՄՆ-ի, Եգիպտոսի, Սաուդյան Արաբիայի, Հորդանանի հետ:

Օրերս Ռուսաստանի արտգործնախարար Սերգեյ Լավրովն Անթալիայում հանդիպել է իր թուրք և իրանցի գործընկերներ Մևլյութ Չավուշօղլուի և Ջավադ Զարիֆի հետ։ Արտաքին քաղաքական գերատեսչությունների ղեկավարները քննարկեցին Սիրիայում իրավիճակի կարգավորումը։ Հանդիպումը, փաստորեն, անցկացվեց ռուս-իրանա-թուրքական գագաթնաժողովին ընդառաջ, որը կկայանա վաղը Սոչիում։

Մոսկվան, Անկարան և Թեհրանը լուրջ առաջընթացի են հասել սիրիական կարգավորման շուրջ բանակցություններում, վստահեցրեց Թուրքիայի արտգործնախարար Մևլյութ Չավուշօղլուն Անթալիայում՝ ռուս և իրանցի գործընկերներ Սերգեյ Լավրովի և Ջավադ Զարիֆի հետ հանդիպման արդյունքներով։ «Մենք կարողացել ենք լրջորեն մերձեցնել մեր դիրքորոշումները հրադադարի և դեէսկալացիոն գոտիներում լարվածության նվազեցման հարցում։ Ներկայում իրավիճակը Սիրիայում շատ ավելի լավ է, քան անցած տարի»,-ասել էր Չավուշօղլուն՝ հավելելով, որ ճգնաժամը Սիրիայում չի կարող լուծվել առանց քաղաքական կարգավորման։ «Մեր զգայունությունը PYD թեմայով հայտնի է։ Այն, որ մեզ համար նրանց մասնակցությունը սիրիական կարգավորման ցանկացած միջոցառման անընդունելի է, մենք ասել ենք ոչ միայն մեր գործընկերներին, այլև ժնևյան ձևաչափում։ Ռուսաստանն ու Իրանը լավ են հասկանում այդ զգայունությունը»,- ասել էր Թուրքիայի ԱԳ նախարարը։

Դատելով Սիրիայի շուրջ աշխարհաքաղաքական զարգացումներից, առաջնորդների՝ տարածաշրջանային հանդիպումների առատությունից ու դրանց ընթացքում հնչած հայտարարություններից՝ Պուտինն ու Ասադը, խոշոր հաշվով, տոնում են հաղթանակը: Ավելին՝ սիրիական ճգնաժամն այլ փուլ է թևակոխել, այդ խաղում դերակատարները՝ իրենց աշխարհաքաղական և տարածաշրջանային շահերին համահունչ, փորձում են նոր առաջնահերթություններ ու ազդեցության ամրապնդման ուղղությամբ նոր քայլերի դիմել:

Մետաքսյա Շալունց

Գլխավոր Թողարկում, Վերլուծություն
Մեկնաբանությունները փակ են: