Ծառուկյան դաշինքում անհանգիստ են

Nov 01, 2017 Comments Off on Ծառուկյան դաշինքում անհանգիստ են

Ծառուկյան դաշինքի պատգամավորները վերջին օրերին աննախադեպ ակտիվություն են դրսեւորում իշխանությունների դեմ։ Դա նկատվում է եւ Ազգային ժողովում 2018 թվականի բյուջեի նախագծի քննարկման ժամանակ, եւ այս օրերին Ծառուկյանին պատկանող Առինջ մոլ առեւտրի կենտրոնի աշխատակիցների բողոքի ակցիաների ժամանակ։ Դաշինքի խմբակցության պատգամավոր Սերգեյ Բագրատյանը անգամ հունից դուրս էր եկել եւ դայլիճում ճչում էր, պահանջում վերջ դնել մոնոպոլիաներին․«Այն ճյուղերը, որոնք մեր երկրում մենաշնորհված են, այդ ճյուղերով բոլոր զարգացած երկրներում հավաքագրում են բյուջե մոտ 80 տոկոս: Դրա մեջ են վառելիքը, սպիրտը, խմիչքը, ծխախոտը, հացահատիկը: Այդ ճյուղերը մեր տնտեսության մեջ մենաշնորհված են: Դուք ինչի՞ չեք կանչում էս մենաշնորհի տերերին և բացատրում, որ՝ ձեր շահույթն այս տարի պետք է նվազի, և դուք բյուջե պետք է վճարեք ավելի շատ գումար, ոչ թե իրենք ունենան հարյուր միլիոնների շահույթներ: Եթե չեն համաձայնվում այդ խաղի կանոններին, վերացրեք այդ մենաշնորհները»,-առաջարկեց պատգամավորը:

Նույն տոնայնության մեջ էր նաեւ ԱԺ փոխնախագահ Միքայել Մելքումյանը, որը երեկվանից ակտիվ մասնակցում է բյուջեի քննարկումներին եւ քննադատական ելույթներ ունենում։ Իսկ արդեն խորհրդարանի բակում առեւտրականների բողոքի ակցիան էր ընթանում, որտեղից եւս պահանջում էին Միքայել Մելքումյանին:Շատ չանցած Մելքումյանը, Նաիրա Զոհրաբյանն ու Վահե Էնֆիաջյանը հանդիպեցին նրանց հետ: Հիշեցնենք, որ Պետեկամուտների կոմիտեն փոփոխություններ է նախաձեռնել կարգոնների գործունեության ոլորտում՝ նպատակ ունենալով կարգավորել դաշտը: Ի տարբերություն նախկին փորձերի՝ պետեկամուտների կոմիտեն մտադիր է կարգոներից վերցնել իրենց հիմնական գործառույթներից մեկը: Խոսքը մաքսազերծման հետ կապված ծառայության մա­տուցման մասին է: «Վաճառականներն ասում են՝ երեք գործողությամբ պետությանը փող ենք վճարում, այն մեկուկես տոկոսն էլ պատրաստ ենք գլխից վճարել, որ մեզ հանգիստ թողնեն այդ փաստաթղթային քաշքշուքներից: 6 ամսվա ընթացքում 3 հանդիպում եմ ունեցել ՊԵԿ-ի պաշտոնյաների հետ: Խնդրել էինք օրենքները հղկել, որ ավելի արդյունավետ լինի, ավելի հասանելի լինի մեր ժողովրդի համար: Փաստորեն 6 ամսվա ընթացքում հասանք այն բանին, որ ժողովուրդը նորից ոտքի է կանգնել»,- ասաց «Համերաշխություն» ՀԿ նախագահ Արմեն Ներսիսյանը։

Նա պարզաբանեց, որ նախկինում կարգոներն էին զբաղվում օտար երկրներից ապրանքների բեռնափոխադրմամբ: Հիմա «Նորֆոլկ Քոնսալթինգ»։Պետական եկամուտների կոմիտեի նախագահ Վարդան Հարությունյանը՝ խորհրդարանում անդրադառնալով «Առինջ մոլի» առևտրականների բողոքներին, ասաց, որ օրենսդրությամբ սահմանված կարգով բոլոր առևտրականները պետք է հարկերը վճարեն: «Հարկերից խուսափելու առումով, եթե դիմում են նման ակցիաների, դուք էլ պետք է հասկանաք, որ դուք ինքներդ պետք է մեր կողքին կանգնեք, ոչ թե քաջալերեք հարկերից խուսափող մարդկանց, այլ բացատրեք, որ չի կարելի ակցիա անելով՝ խուսափել հարցերից։ Դա բացառվում է»,-ասաց նա Հարությունյանի խոսքով՝ ՊԵԿ-աշխատակիցները դեռևս նախորդ շաբաթ հանդիպել են առևտրականների հետ և նրանց բացատրել, թե ինչ պետք է անեն, ավելին՝ առաջարկել են անվճար կատարել առևտրականների հաշվապահությունը:

«Եթե դրանից էլ են խուսափում և փորձում են խուսափել հարկերից, չի լինելու, կոշտ վարչարարություն է իրականացվելու։ Մենք առաջարկել ենք ձրի հաշվապահություն, դրանից իրենք հրաժարվել են, որովհետև շրջանառությունը չեն ուզում ցույց տալ», – շեշտեց նա: Նա նկատեց, որ ոչ բոլոր տնտեսվարողներն են բողոքում, քանի որ շատերն աշխատում են օրինական դաշտում: Նրա գնահատմամբ՝ այսօրվա իրավիճակը հետևանք է նրա, որ որոշները փորձում են թաքնվել սոցիալապես վատ վիճակում գտնվող խավի տակ. նրանք ունեն մեծ հնարավորություն, բայց ուղղորդում են այլոց: Հարցին՝ ցանկանում է ասել, որ առևտրականներն ինչ- որ անձանց ուղղորդմա՞մբ են շարժվում, Վարդան Հարությունյանն ասաց. «Իհարկե, ուղղորդումներ եմ տեսնում»:

Հարցին՝ հնարավո՞ր է Գագիկ Ծառուկյան է ուղղորդում, Հարությունյանը պատասխանեց. «Ոչ: Գագիկ Ծառուկյանն իր հեղինակություն օգտագործելով՝ փորձել է առևտրականներին հասկացնել, որ ՊԵԿ-ի արածն օրինականության սահմաններում է։ Իր «Առինջ մոլում» տարածք է հատկացրել, որ մենք ավելի լավ բացատրենք ժողովրդին. մենք պատրաստ են նաև այլ շուկաներում նման կերպ գործել: Այդ մարդիկ պետք է հասկանան, որ հետադարձի ճանապարհ չկա, պետք է իրականության սահմաններում աշխատեն։ Մանրածախ առևտրի ոլորտում կա մեծ ստվեր, դրա դեմ ենք պայքարում ու պետք է հաղթենք»:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: