«Հրապարակ». Դատարանը 2 ամսում պետք է որոշի

ՀՀ վարչական դատարանում մեկ շաբաթ առաջ սկսվել է «Տաշիր կապիտալ» ընկերության հայցի քննությունը, որով ընկերությունը վիճարկում է «Հայաստանի էլեկտրական ցանցեր» ՓԲԸ-ի կառավարման լիցենզիայից զրկելու որոշումը: Ըստ հայցվոր կողմի՝ ՀՀ հանրային ծառայությունները կարգավորող հանձնաժողովի որոշումները` լիցենզիան հետ կանչելու եւ ժամանակավոր պետական կառավարիչ նշանակելու մասին, ընդունվել են առանց համապատասխան փաստական հիմքերի եւ գործի հանգամանքների սխալ մեկնաբանմամբ:

Հիշեցնենք․ Ազգային ժողովը 2025 թվականի հուլիսի 3-ին 65 կողմ, 27 դեմ, 0 ձեռնպահ ձայներով երկրորդ ընթերցմամբ եւ ամբողջությամբ ընդունեց «Հանրային ծառայությունները կարգավորող մարմնի մասին» եւ «Էներգետիկայի մասին» օրենքներում նախատեսված փոփոխությունների եւ լրացումների փաթեթը, այլ կերպ ասած՝ ՀԷՑ-ի պետականացման նախագիծը։ Հուլիսի 18-ին հայտնի դարձավ, որ ՀԾԿՀ-ն Պետական վերահսկողության ծառայության պետ Ռոմանոս Պետրոսյանին նշանակել է «Հայաստանի էլեկտրական ցանցեր» ընկերության ժամանակավոր կառավարիչ։ Հանձնաժողովը նաեւ կառավարության ներկայացրած հաղորդման հիմքով վարույթ է հարուցել ՀԷՑ-ի նկատմամբ։ Նոյեմբերի 17-ին ՀԾԿՀ-ն դադարեցրեց ՀԷՑ-ի`«Տաշիր կապիտալ» ընկերությանը տրված լիցենզիան։

Նշենք, որ «Տաշիր խմբի» ընկերությունների նախագահ Սամվել Կարապետյանն այս ընկերությունը ձեռք է բերել 2016 թվականին` նախկին կառավարության խնդրանքով, եւ հարյուր միլիոնավոր դոլարներ է ներդրել ցանցի արդիականացման համար։ 

Դատարանում «Տաշիր կապիտալի»-ի շահերը ներկայացնում է հայտնի փաստաբան, արդարադատության նախկին փոխնախարար Արամ Օրբելյանը: Նա «Հրապարակ»-ի հետ զրույցում ասաց` քանի որ լիցենզիայից զրկելու վարույթ է, ապա օրենքն ավելի սեղմ ժամկետներ է սահմանել գործի քննության համար․ «Այն պետք է քննվի 2 ամսվա ընթացքում, 2 նիստ արդեն եղել է, եւ հաջորդ նիստին դատարանը դատաքննության անցնելու որոշում է տալու»։

- Անցած կիրակի մենք տեսանք, որ ՀԾԿՀ նախագահ Մեսրոպ Մեսրոպյանը ներկա է այն պատարագին, որի մասնակցում է Նիկոլ Փաշինյանը։ Ըստ էության, նա կիսում է իշխանության համոզմունքներն ու գաղափարները եւ չի կարող Հանձնաժողովի անկախ նախագահ ընկալվել։ Սրա մասին դատարանում բարձրաձայնե՞լ եք։ 

- Մեր արգումենտներից մեկը վերաբերում է նրան, որ Հանրային ծառայությունները կարգավորող հանձնաժողովի կազմը, ընդ որում, ոչ միայն Մեսրոպյանի մասով, այլ նաեւ մյուս այլ անդամների մասով, բացարկման ենթական անդամներ կան։ Տպավորությունն այն չէ, որ կողմնակալ որոշում են ընդունել: Բայց մենք հիմնավորված եւ ուղղակի կողմնակալության մասին ենք բարձրաձայնում։ Իրականում այնտեղ լրջագույն խնդիրներ կային` ՀԾԿՀ վարույթի վերաբերյալ, իրականում բարդ հարց է, բայց մի շարք խնդիրներ կան` ե՛ւ ՀԾԿՀ-ի վարույթի հետ կապված, ե՛ւ վարույթին նախորդող ժամանակահատվածում տեղի ունեցող գործընթացների հետ կապված, այդ թվում՝ նաեւ հստակ հրապարակային ելույթների, որտեղ հստակ արձանագրվել է, որ ՀԷՑ-ի ազգայնացումը պետք է ավարտին հասցվի։ Ըստ էության, նախորդող գործընթաց, հաջորդող գործընթաց, այս գործընթացում ՀԾԿՀ նախագահի լիազորությունների սահմանման հետ կապված հարցեր կան, այսինքն՝ որտեղ է ավարտվում նրա իրավունքը, օրինակ՝ վարույթի հարուցման, եւ որտեղ է որ ինքը` ուզի-չուզի, վարույթ պետք է հարուցի: Այստեղ հարցերը բազմաշերտ են, հայցը ներկայացրել ենք, հայցադիմումում այդ հիմքերը կան, այդ թվում՝ նաեւ ՀԾԿՀ-ի որոշումն ընդունած կազմի, օրենքի իմաստով, անկախության։ 

«Հրապարակ օրաթերթ»