Էս անդաստիարակ, բռի, տգետ, պոռոտախոս ու միաժամանակ ինքնահիացումի մեջ գտնվող իշխանավորներից մի օր պրծում լինելու՞ է. Արմինե Օհանյան

«Հրապարակ» օրաթերթի գլխավոր խմբագիր Արմինե Օհանյանը Ֆեյսբուքի իր էջում գրում է. «Լսում եմ այսօրվա ԱԺ- կառավարություն հարցուպատասխանն ու սարսափում` էս ինչ խոր ու անելանելի փոսի մեջ ենք մենք: Էս անդաստիարակ, բռի, տգետ, պոռոտախոս ու միաժամանակ ինքնահիացումի մեջ գտնվող իշխանավորներից մի օր պրծում լինելու՞ է: Գալու՞ է այդ օրը, որ օրենք ու իրավունք ճանաչող, սեփական լեզվի վրա կապ դնելու ունակ, իր իրավասություններն ու պարտականություններն իմացող մարդ ղեկավարի մեր երկիրը: Թե՞ մեզ բախտ է վիճակված լեզուն մտքից առաջ ընկած, ամեն նախադասությամբ օրենք խախտող վարչապետի գոյության հետ հաշտվել ու տառապել:

Նախկինների «կրակն» անշեջ պահող Նիկոլ Փաշինյանի այդ հիվանդությունը, պարզվում է, նաև վարակիչ է` հիմա արդեն ողջ թիմն է խոսում նախկիններից: Արարատ Միրզոյանն իրեն համարում է թույն ԱԳ նախարար և Վարդան Օսկանյանին է ծաղրում, առողջապահության Անահիտ Ավանեսյանին հարցնում են` ինչու՞ եք այսքան տարբեր սակագներ սահմանել առողջապահական ծառայությունների համար, հիշում է Սբ Գրիգոր Լուսավորիչ ԲԿ նախկին տնօրեն Արա Մինասյանին, Ժաննա Անդրեասյանին հարցնում են դահուկային սպորտի ֆեդերացիայի նախագահի հրաժարականից, ասում է` 17 թվի համեմատ էսքան փող ավել ենք ծախսել սպորտի վրա… ուր էր թե իրենց թվարկված մարդկանց չափ խելք ու նվիրվածություն ունենային իրենց գործին:

2 բան են անում սրանք 8 տարի շարունակ` մրցում են նախկինների հետ ու իրենց մեղքը նրանց վրա են բարդում: Հարցնում են` Ամանորի տոներին հազարավոր բնակիչներ հոսանք չունեին, ՀԷՑ-ը սեփականատիրոջից խլելը բացասաբար է ազդել բնակչության էներգապահովման վրա, կառավարության ղեկավարն ասում է` ՀԷՑ-ի նախկին սեփականատերն է մեղավոր (այն սեփականատերը, որից 7 ամիս առաջ խլել են ընկերությունը): 8 տարի «նախկինների» տակ թաքնված Փաշինյանը չի գաղտնազերծում, թե ո՞ր պահից է սկսվելու իր պատասխանատվության պահը: Ո՞ր պահից սկսած է ինքը պատասխան տալու պարտությունների, ձախողումների, կորուստների, վթարների համար:

Մենք, որ 30-40 տարի ապրել ենք այս երկրում, չենք հիշում, որ 90-ականների ծանր շրջանում Տեր-Պետրոսյանի իշխանությունը գեթ մեկ անգամ իր անհաջողությունները, մութն ու ցուրտը, պակաս-պռատը բացատրեր սովետական իշխանության սխալներով: Կամ` Ռոբերտ Քոչարյանն իր բացթողումների մեղքը գցեր Լեւոն Տեր-Պետրոսյանի վրա, Սերժ Սարգսյանն արդարանար, թե Քոչարյանն է ինձ վատ երկիր ժառանգել: Սրանք մի կողմից հանրության պատմական հիշողությունն են փորձում ջնջել, մյուս կողմից նախկին իշխանությունների մասին մեկ վայրկյան անգամ չեն մոռանում ու մեզ էլ չեն թողնում մոռանանք…»: