Զոհ և վիրավոր Գեղարքունիքում

«Հրապարակ»-ի տեղեկություններով երեկ ողբերգական դեպք է տեղի ունեցել  Գեղարքունիքի մարզում։ Բարձրությունից վայր ընկնելու հետևանքով 1 մարդ մահացել է, իսկ մյուսին ծայրահեղ ծանր վիճակով տեղափոխել են հիվանդանոց։ 

ՆԳՆ ոստիկանությունից հաստատեցին մեր տեղեկությունը` հայտնելով. «Հունվարի 20-ին՝ ժամը 14։48-ին Գավառի շտապօգնությունից հաղորդում է ստացվել, որ կանչով մեկնել են Ծովազարդ բնակավայր, որտեղ գետնին ընկած հայտնաբերել են մահացած քաղաքացու, իսկ մյուս քաղաքացին գտնվում է ծայրահեղ ծանր վիճակում։  

Ոստիկանության համապատասխան ստորաբաժանումներից մեկնած խմբերը պարզել են, որ հյուրանոցային համալիրում ավտոաշտարակի վրա շինարարական աշխատանքներ կատարելիս պողպատյա մալուխը կտրվել է, երկու աշխատակիցները ընկել են, ինչի հետևանքով 66-ամյա տղամարդը մահացել է, իսկ 35-ամյան՝ մարմնական վնասվածքներով տեղափոխվել է հիվանդանոց։

Կազմված փաստաթղթերն ուղարկվել են Գեղարքունիքի մարզային քննչական վարչություն»: