Նիկոլ Փաշինյանը շտապում է, ցանկանում են արագ վճիռ ունենալ, վստահ եմ՝ իրենց օգտին է լինելու․ Օհանյան
Նիկոլ Փաշինյանը շտապում է, ցանկանում են արագ վճիռ ունենալ, վստահ եմ՝ իրենց օգտին է լինելու։ Լրագրողների հետ զրույցում նման գնահատականով հանդես եկավ «Հրապարակ» օրաթերթի գլխավոր խմբագիր Արմինե Օհանյանը։
Հիշեցնենք, որ Նիկոլ Փաշինյանը հայցադիմում է ներկայացրել «Հրապարակ»-ի դեմ՝ իր ոճով լրատվամիջոցի կողմից բարձրացված հռետորական հարցադրումների համար։ Հայցադիմումը ներկայացվել է՝ «Հրապարակ» օրաթերթում տպագրված «Փաշինյանը դավաճանու՞մ է արդյոք կնոջը» վերնագրով նյութի հրապարակումից հետո։ Փաշինյանը դատարանից պահանջում է պարտավորեցնել ԶԼՄ-ին հրապարակայնորեն հերքելում հոոդվածում տեղ գտած զրպարտություն համարվող փաստացի տվյալները, ինչպես նաև՝ հօգուտ իրեն բռնագանձել 1․000․000 (մեկ միլիոն) ՀՀ դրամ փոխհատուցում՝ որպես զրպարտության հետևանքով պատճառված ոչ նյութական վնաս: Հարցը քննվում է Երևանի ընդհանուր իրավասության քաղաքացիական դատարանի դատավոր Նելլի Հարությունյանի նախագահությամբ։
Այսօր կայացել է հերթական դատական նիստը, որի ավարտից հետո «Հրապարակ» օրաթերթի խմբագիր Արմինե Օհանյանը լրագրողների հետ զրույցում նկատեց, որ այս նիստի ընթացքում ևս «զարմանալիորեն» Նիկոլ Փաշինյանի ներկայացուցիչը դեմ էր նիստի լուսաբանմանը։
«Մեր ներկայացուցիչն այս նիստում առաջարկեց, որ մի քանի օր ժամանակ տան՝ դատավորին բացարկի միջնորդություն ներկայացնելու համար, որոշակի առարկություններ ունենք դատավորի պահվածքի հետ կապված, բայց հայցվորի ներկայացուցիչը նորից դեմ էր դրան։
Պարզ է, որ շտապում են, ցանկանում են արագ վճիռ ունենալ, վստահ եմ՝ վճիռն իրենց օգտին է լինելու, դատարանն էլ իրեն այնպես է պահում, որ հնարավորություն է տալիս կողմին՝ նման ենթադրություն անելու»,- ասաց Օհանյանը՝ հավելելով, որ այսքան տարիներ հարյուրավոր հայցեր են ունեցել, բայց որևէ գործով դատարանն այսքան կարճ, կողմնակալ և հապճեպ չի եղել՝ որքան այս գործով է․ «Հասկանալի է, որ դիմադրողականությունն այնպես է վերացվել դատական համակարգի, որ պարզ է՝ երբ հայցվորը երկրի վարչապետն է, որն ասում է՝ «ինչու այս երկրում կա մի դատավոր, որ իմ ասածը չանի», արդյունքն էլ այսպիսին պետք է լինի»։
Հայցի բովանդակությունն անդրադառնալով՝ Արմինե Օհանյանը հիշեցրեց՝ մի մարդ, որն ամեն օր ստատուսներ է գրել, հարցադրումներ արել, ամեն շաբաթ մի եկեղեցու դեմ արշավ է կազմակերպում, եկեղեցին պառակտել է, վրդովվել է ընդամենը 10 տողանոց հարցադրումներից, որոնք լրատվամիջոցը վերադարձրել է իրեն։ Օհանյանի խոսքով՝ երկրում ոչ ոք այդքան չի գիտակցում խոսքի ուժն այնքան․ ինչքան՝ Փաշինյանը։
Հետևեք մեզ Viber-ում
