Նիկոլ Փաշինյանը մի քանի ուշագրավ հայտարարություն է արել․ Վարդան Բալյան

Քաղաքական վերլուծաբան Վարդան Բալյանը ֆեյսբուքյան իր էջում գրում է.

«Վարչապետ Փաշինյանը մի քանի ուշագրավ հայտարարություններ է արել, որոնք ուղղակիորեն վերաբերում են հայ-ադրբեջանական խաղաղության բանակցություններին: Փաստորեն, պաշտոնական Երևանը բավարարում է Մինսկի խմբի լուծարման մասին Ադրբեջանի պահանջը:

Չնայած այդ հանգամանքին՝ այսպես կոչված արևմտյան ադրբեջանցիների Հայաստան վերադարձի մասին Բաքվի պահանջը ոչ միայն չի չեղարկվել, այլ արդեն հրապարակայնացվել է պաշտոնապես: Տևական ժամանակ է, ինչ իմ էջում բազմաթիվ հրապարակումներով անդրադառնում էի ադրբեջանական այդ նախապայմանին, որ շատերին գուցե նյարդայնացնում էր, ոմանց անլուրջ թվում: Հուսով եմ, հիմա գոնե բոլորին տեսանելի ու հասկանալի դարձավ, որ այդ ամենն առավել քան լուրջ էր՝ չնայած մեր իշխանությունների շպիոն Օնիկի կեցվածքին, թե չկա այդպիսի օրակարգ, նման հարց չի քննարկվել ու չի կարող քննարկվել: Բայց նույնիսկ այդ ամենը չէ: Վարչապետ Փաշինյանը հայտարարում է, թե միջազգային նորմերով Հայաստանի Հանրապետությունը իրավունք ունի բանակ ունենալ, ինչը բառացիորեն նշանակում է, որ այդ իրավունքը այս պահին վիճարկվում է կամ մեզ ներկայացված է է դրա սահմանափակ իրականացման պահանջ:

Ցավոք սրտի, մեր երկրում վաղուց արդեն դեբիլոկրատիայից անցում է կատարվել իդիոտակրատիայի, ըստ որում, միանգամայն կամավոր, առանց որևէ արտաքին կամ ներիքն հարկադրանքի: Ու սա առավել քան տեսանելի է հանրային-քաղաքական, ինչպես նաև փորձագիտական դաշտում, որտեղ նշածս հարցերի վերաբերյալ անհասկանալի լռություն է»։