Ոստիկանությունը չի հերքում
Ոստիկանությունը չի հերքում, որ Փաշինյանի այցի համար Ազատության հրապարակին կից որոշ սրճարանների աշխատանքն արգելվել է, սակայն խուսափում են նշել պատճառները։
Հիշեցնենք, որ Երևանի Ազատության հրապարակին հարող որոշ սրճարանների արգելվել է այսօր ժամը 14։00-19։00-ն ընկած ժամանակահատվածում աշխատել։ Սրճարաններից մեկի տնօրինությունից «Փաստինֆո»-ին հայտնեցին, որ արգելքը ստացվել է ոստիկանությունից։ Մասնավորապես՝ սրճարան է այցելել ոստիկանության ներկայացուցիչն ու ասել, թե Օպերայի տարածքում տեղի է ունենալու միջոցառում, որին սրճարանների աշխատանքը կխոչընդոտի։ Մեր զրուցակիցը հայտնել էր, որ սա աննախադեպ երեւույթ է՝ ոչ մի պաշտոնական այցի ժամանակ սրաճարանների գործունեությունը չի արգելվել, ավելին՝ նման պահանջ չի եղել անգամ ներքաղաքական այնպիսի լարված իրավիճակներում, որպիսիք եղել է 2008 թվականին։
«Փաստինֆո»-ն դիմեց ՆԳՆ-ին՝ պարզելու, թե ինչու է արգելվել սրճարանների աշխատանքը, ինչպես նաև՝ արդյո՞ք ոստիկանությունը փոխհատուցում կտրամադրի։ Կառույցից, սակայն, պարզաբանում չներկայացրին․հիշեցրին ՆԳՆ՝ այսօրվա տարածած հաղորդագրությունը՝ կենտրոնական մի շարք փողոցներում երթևեկության արգելքի և փակ լինելու վերաբերյալ, իսկ պնդմանը, թե խոսքը սրճարանների մասին է՝ առաջարկեցին գրավոր հարցում ուղարկել։
Աղբյուր` Փաստինֆո