Կատաղի գրոհ Կարեն Կարապետյանի դեմ

ԱԺ արտահերթ նիստում սպասվածի համաձայն բուռն քննարկում ծավալվեց Կառավարության «Պետական գույքի մասնավորեցման 2017-2020 թվականների ծրագրի մասին» օրենքի նախագծի շուրջ: Կարեն Կարապետյանի կաբինետը մասնավորեցման ծրագրում ընդհանուր առմամբ ընդգրկել է 47 ընկերություններ, որոնց վաճառքից ակնկալվում է ստանալ 35-36 մլրդ դրամ: Մասնավորեցման են ներկայացվել «Ագրոսպասարկում» ՓԲԸ-ն, Գորիսի «Բերրիություն» ԲԲԸ-ն, «Կրթության ազգային ինստիտուտ» ՓԲԸ-ն, «Տավուշի ուսուցիչների վերապատրաստման կենտրոն» ԴՓԲԸ-ն, «Հայփոստ» ՓԲԸ-ն, «Հայավտոկայան» ՓԲԸ-ն, Տաշիրի կինոցանցի գույքը, «Համո Բեկնազարյանի անցան «Հայֆիլմ» կինոստուդիա ՓԲԸ-ն, «Ավտոմատիկա» ՓԲԸ-ն, «Ընդունելությունների տուն» ՓԲԸ-ն, «Հրազդանի մարզահամալիր» ՓԲԸ-ն, «Ձիասպորտի կենտրոն» ՓԲԸ-ն, «Երևանի ոսկերչական գործարան» ՓԲԸ-ն. «Երևանի ջրամատակարարման ուզեմաս» ԲԲԸ-ն, «Գեոէկոնոմիկա» ՓԲԸ-ն, «Բյուրեղ» հանքային ջրերի գործարան ԲԲԸ-ն, «Ֆանարջյանի անվան ուռուցքաբանության ազգային կենտրոն» ՓԲԸ, «Վնասվածքաբանության և օրթոպեդիայի գիտական կենտրոն»  ՓԲԸ-ն, «Ճառագայթային բժշկության և այրվածքների գիտական կենտրոն» ՓԲԸ-ն, «Մաշկաբանության և  սեռավարակաբանական բժշկագիտական կենտրոն» ՓԲԸ-ն և այլ կառույցներ: Մի խոսքով ՝Կարեն Կարապետյանը վաճառքի է հանել ինչ պատահել է. սա բացառիկ դեպք է, երբ մոտ 5 տասնյակ պետական ընկերությունները մասնավորեցնում են սոսկ իբրև գույք. որպես արդյունք նշվում է ընդամենը տարածքների վաճառքից ակնկալվող գումարի չափը,և խոսք անգամ չկա ակնկակվող ներդրումների և վտանգավոր հետեւանքների եւ այլնի մասին: Օրինակ ՝ուռուցքաբանական կենտրոնի տեղում ինչ երաշխիք կա, որ մոտ ապագայում սեփականատիրոջ որոշմամբ չի լինի հերթական զվարճանքի կենտրոնը: Անշուշտ, նման բացառիկ նախագծեր առաջին անգամը չէ, որ ներկայացվում է ԱԺ-ում, սակայն ընդդիմադիրների տրամադրություններից պարզ դարձավ, որ չեն պատրաստվում ոչ մի թիզ զիջել Կարեն Կարապետյանին ու նրա նախաձեռնություններին: Ընդդիմադիրները կատաղի գրոհ ձեռնարկեցին այդ նախագծի դեմ, որի ճակատագիրը դեռեւս անորոշ է: Բայց հաշվի առնելով նախագծի հանրային հնչեղությունը ՝ չի բացառվում, որ իշխող ուժը հետ կանգնի մասնավորեցման մտադրություններից: «Ծառուկյան» դաշինքի պատգամավոր Իվետա Տոնոյանը բարձրացրեց մասնավորապես Ֆանարջյանի ուռուցքաբանության կենտրոնի մասնավորեցման հարցը: «Քաղցկեղից մահացությունների դեպքերը մեզ մոտ երկու անգամ շատ են հարևան երկրներից: Ֆանարջյանի ուռուցքաբանության կենտրոնը միակ հիմնարկն է, որը քաղցկեղի բուժում է իրականացնում: Անթույլատրելի է նրա մասնավորեցումը»,- ասաց Իվետա Տոնոյանը: Արման Սահակյանն արձագանքեց. «Մասնավորեցումը չի նշանակում, որ այդ ինստիտուտը վերանալու է: Այսօր 8 բուժհիմնարկներ նման գործունեությամբ են զբաղվում: Կարծում ենք՝ երևի թե վերջին տեղում գտնվում է հենց այդ բուժհաստատությունը»: Նաիրա Զոհրաբյանն էլ առաջարկեց խորհրդարանական լսումներ անել: Պատգամավորը նշեց, որ իրենք «գիր ու ղուշ» անողներ չեն, որ տեսնեն՝ կստացվի  թե ոչ. «Մենք ունենք նաև խայտառակ մասնավորեցման օրինակներ։ Պետք է կազմակերպվեն հանրային լսումներ, որին պետք է մասնակցեն բուժհաստատությունների ղեկավարները, ամեն ինչից անտեղյակ առողջապահության նախարարը, որը չգիտի՝ ներդրումային ծրագրեր կլինե՞ն, թե՞ ոչ։ Եթե մասնավորեցվելու է ընդամենը մասնավորեցման համար, և որևէ բան չի փոխվելու այդ հաստատություններում, թող այսպես մնան։ Ինչ վերաբերում է  նրան, թե մասնավորեցվում է որակյալ և մատչելի ծառայություններ առաջարկելու համար, ես համաձայն չեմ, որովհետև բոլորս էլ հասկանում ենք, որ, եթե այդտեղ ներդրումներ են արվում, մատուցվող ծառայությունների գները բարձրանալու են»։Զոհրաբյանն առաջարկեց նախագիծը չդնել քվեարկության, քանի դեռ համապարփակ չեն քննարկել. «Մենք որևէ տեղ չենք շտապում։ Եթե նպատակն իսկապես այդ ոլորտներն արդյունավետ կառավարման հանձնելն է, որը կապահովի որակ, ապա այստեղ շտապել պետք չէ։ Իսկ եթե նպատակը բյուջեն 35-36 մլրդ դրամով ապահովելն է, շատ ավելի ազնիվ է, որ կառավարության ներկայացուցիչն ասի՝ բյուջեում փող չկա՝ աշխատավարձ, թոշակ տալու համար, և սա ելք է»։ «Ելք» դաշինքի պատգամավոր Գևորգ Գորգիսյանն էլ «Հայֆիլմ»-ի նախորդ մասնավորեցման օրինակը բերեց. «Մենք դառը փորձ ունենք: «Հայֆիլմ» կինոստուդիայի մասնավորեցումից հետո ոչինչ չարվեց: Իրականում ավելի վատացավ վիճակը: Հիմա 47 հիմնարկ եք ներկայացրել մեկ փաթեթով, ինչն անթույլատրելի է, դրանցից յուրաքանչյուրն առանձին քննարկման պետք է արժանացնել: Սեփականաշնորհման մեթոդը լավագույնը չէ ներդրումներ բերելու համար: Չպետք է վերցնել ու ծախել այդ ամենը»: Նույն դաշինքից Արտակ Զեյնալյանն էլ իր մտահոգությունը բարձրաձայնեց: «Պետությունն իր ենթակայության տակ է պահել մի քանի կարեւոր բուժկենտրոններ, ծառայությունների հասանելիությունը բիզնեսից կարեւոր համարելով։ Արդյոք նույն կերպ կվարվի մասնավորը՝ ոչ ոք չգիտի»։ Իշխանությունները, որոնք կողմ են արտահայտվում սեփականաշնորհմանը, հայտարարում են, որ պետական հիվանդանոցները ընդամենը 1-2 տոկոս շահույթ ունեն։ Բայց խնդիրն այն է, որ դրանք շահույթի համար չեն աշխատում։ Դրանք պետք է հնարավորինս քիչ հավելագին ունենան ու հնարավորինս շատ՝ հասանելիություն,քանի որ դրանց խնդիրն է պահպանել բնակչության առողջությունը։ «Բիզնեսը այստեղ երկրորդական է։ Իսկ մասնավոր սեփականատիրոջ համար հիվանդանոցը նախեւառաջ բիզնես է։ Դրա համար էլ հիվանդանոցների զանգվածային սեփականաշնորհում չի կարելի թույլ տալ»,-հայտնեց Զեյնալյանը։ Խորհրդարանի բժիշկ նախագահ Արա Բաբլոյանը հակառակ պնդումներով հանդես եկավՆա թվարկեց մասնավոր և առաջատար բժշկական հաստատությունների անունները և նշեց. «Կարո՞ղ եք պետական մի բժշկական հաստատության անուն տալ, որ կարող է ոտք մեկնել այս հաստատությունների հետ և մրցակցել»։ Անի Սահակյան