Ինչու՞ է ուշանում Սերժ Սարգսյանի արձագանքը

ԱՄՆ դեսպանատունը օրերս կազմակերպեց վերականգնվող էներգետիկայի զարգացման համաժողով ամերիկյան և հայկական ընկերությունների մասնակցությամբ: Ըստ ԱՄՆ դեսպանատան պաշտոնական հաղորդագրության` համաժողովը ամերիկյան ընկերություններին թույլ տվեց ներկայացնել կանաչ էներգիայի և սմարթ էլեկտրահամակարգերի զարգացման իրենց փորձն ու տեխնոլոգիաները: «Հայաստանը և վերջինիս էներգետիկ համակարգը վերջին 25 տարիների ընթացքում մեծ աճ են արձանագրել:   Երբ ես մտածում եմ այս ոլորտի  առաջիկա 25 տարիների մասին, ոգևորություն եմ ապրում, քանզի գիտեմ, որ այդ զարգացումները նաև այսօր և այստեղ ձևավորվող գործընկերությունների արդյունքն են լինելու», - ասաց ՀՀ-ում ԱՄՆ դեսպան Ռիչարդ Միլսը, ով ՀՀ էներգետիկ ենթակառուցվածքների և բնական պաշարների փոխնախարարի հետ միասին համաժողովում հանդես եկավ բացման խոսքով: Մեկօրյա այս համաժողովը նպատակ ուներ ամրապնդել ամերիկյան ու հայկական ընկերությունների միջև հետզհետե ընդլայնվող կոմերցիոն կապերը և Հայաստանի էներգետիկ ոլորտի օպերատորներին ծանոթացնել առաջատար ամերիկյան ընկերությունների հետ, որոնք համաժողովում ներկայացնում էին այս ոլորտում իրենց նորագույն տեխնոլոգիաները: 2010-ից 2015թ. Հայաստանում հոսանքի արտադրությունը աճել է 20%-ով, որն ինչպես փաստեց դեսպան Միլսը, հիմք է տալիս ԱՄՆ դեսպանությանը Հայաստանում ներդրումային հնարավորություններ տեսնել ամերիկյան ընկերությունների համար: «Ինչպես ձեզնից շատերը գիտեն, մենք այս տարի հայ-ամերիկյան հարաբերությունների 25-ամյա հոբելյանն ենք նշում: 25 տարի առաջ ԱՄՆ պետքարտուղարությունում ես նորանկախ Հայաստանի Հանրապետության հետ կապված հարցերով էի զբաղվում, շատ լավ եմ հիշում այդ ժամանակները: Ձեր մեջ էլ կարծում եմ կան այն տարիքի մարդիկ, ովքեր կհիշեն, որ անկախության առաջին տարիներին Հայաստանում էներգետիկ իրավիճակը շատ անկայուն էր: Հոսանքի անջատումները կանոնավոր բնույթ ունեին: Մարդիկ ծառեր էին հատում, որպեսզի տները ջեռուցեին: Իրական ճգնաժամ էր: Սակայն Հայաստանը մթության ու սղության առաջ տեղի չտվեց, այլ բարեկամների ու գործընկերների օգնությամբ, ինչպիսին է՝ Միացյալ Նահանգները, կարողացավ դառնալ մի երկիր, որն ի վիճակի է հոգալ սեփական կարիքները, և դեռ ավելին, կարող է արտահանել էլեկտրաէներգիայի ավելցուկը», - ասել է դեսպան Միլսը: Նա ընդգծեց էներգետիկ դիվերսիֆիկացման ու կանաչ էներգիայի արտադրությունը խրախուսելու ուղղությամբ ՀՀ կառավարության արժեքավոր աշխատանքը, այդ թվում և հունվարին կազմակերպված Արևային էներգետիկայի ներդրումային համաժողովը: Դեսպանը նաև նշեց այս ոլորտում ԱՄՆ-ի ու Հայաստանի գործակցության մասին, մասնավորապես՝ անցած ամիս հայաստանյան պաշտոնյաների ու մասնավոր հատվածի ներկայացուցիչների համար կազմակերպված ճանաչողական այցը դեպի ԱՄՆ, որտեղ նրանց ներկայացվեց արևային էներգիայի արտադրության լավագույն փորձը: «Առաջնորդելով վերականգնվող աղբյուրների օգտագործմամբ էներգետիկ ոլորտի դիվերսիֆիկացման և էներգախնայողական ծրագրերին ուղղված աշխատանքները՝ ՀՀ կառավարությունը մշակել և ներդրել է մեխանիզմներ և ծրագրեր, որոնք թույլ են տալիս զարկ տալ վերականգնվող և արևային էներգիայի աճին Հայաստանում: Իսկ ԱՄՆ կառավարությունը պատրաստ է շարունակել գործակցությունը Հայաստանի հետ, ինչպես եղել է վերջին 25 տարիների ընթացքում», - ասաց դեսպան Միլսը: Համաժողովին իրենց փորձը ներկայացնելու և Հայաստանում առկա գործարար հնարավորություններին ծանոթանալու համար ներկայացուցիչներ էին գործուղել յոթ ամերիկյան ընկերություններ՝ Հանիվել Բիլդինգ Սոլյուշենս, Հանիվել Սմարթ Էներջի, ՄաքԼին Փաուեր Սիսթեմզ, Ֆերսթ Սոլար Փաուեր Սոլյուշենս, Կատերպիլար, Ջեներալ Էլեկտրիկ և Կոնտուր Գլոբալ: Համաժողովին զեկուցումներով հանդես եկան նաև Միջազգային ֆինանսական կորպորացիայի, Գերմանիայի զարգացման KfW բանկի, Ամերիա բանկի, շվեյցարական Meeco Group-ի և ՀՀ կառավարության ներկայացուցիչները: Ուշագրավն այն է, որ համաժողովում դեսպանը հայտարարել է, որ Հայաստանն ունի վերականգնվող էներգետիկայի զարգացման մեծ ներուժ, և կա 8 միլիարդ դոլարի գործակցության հեռանկար: Այսինքն` էներգետիկայի այդ ուղղությամբ Հայաստանի հնարավորությունը ներկայացնելու, ներդրումների հեռանկարն իրական դարձնելու հարցում` ամերիկացի դեսպանը Հայաստանի իշխանություններին կոնկրետ մեսիջ է հղել: 8 միլիարդ դոլարի գործակցության հեռանկարի մասին Վաշինգտոնի մակարդակով խոսելը, կատակ բան չէ: Հայաստանի համար, դա բավական տպավորիչ թիվ է, մանավանդ, որ մեր իշխանավորների միակ հույսը ԵԱՏՄ-ի 170-միլիոնանոց շուկան, այն էլ ոչ մի կերպ տնտեսության վրա դրական ազդեցություն չի թողնում: Ի՞նչ է պատասխանում պաշտոնական Երևանը ԱՄՆ դեսպանի հայտարարությանը... Վաշինգտոնի կողմից հղվել է կոնկրետ ուղերձ,  մեր իշխանություններն էլ միայն ճառեր են ասում այն մասին, թե որքան են պատրաստ զարգացնել Հայաստանը և դիվերսիֆիկացնել տարբեր ոլորտներ... Արձագանքի ամենապատեհ առիթն է, և ուրեմն ինչո՞ւ է լռություն տիրում: Թամար Բագրատունի