ԼՂ խնդիրը տեղ կգտնի՞ Թրամփի ու Մակրոնի օրակարգում

Ղարաբաղյան բանակցային գործընթացում բեկում այս փուլում, իհարկե ոչ ոք չի ակնկալում: Ավելին` ռուսական միջնորդության «ղեկավարման» պայմաններում ստեղծվել է մի իրավիճակ, երբ ռուս-ադրբեջանական միակողմանի ակնկալիքները, ավելի ճիշտ` ակնկալվող զիջումները միակողմանիորեն հայկական կողմից են: Մինչդեռ այս պայմաններում ռուսական «առաքելությանը» հակակշիռ է պետք:  Այս իրավիճակում ակտիվ է նաև Անկարան, որը Մոսկվայի հետ պայմանավորվելու իր ձգտումները չի թաքցնում: ԵԱՀԿ Մինսկի խմբի համանախագահող մյուս երկու երկրները` Միացյալ Նահանգներն ու Ֆրանսիան նոր առաջնորդներ ունեն, օրեր առաջ Ֆրանսիայում Էմանուել Մակրոնը նախագահ ընտրվեց: ԼՂ կարգավորման հարցում շեշտակի փոփոխություններ նոր նախագահներից հազիվ թե ակնկալել մոտ ապագայում: Բայց որոշ ժամանակ անց կարող ենք ականատես դառնալ նոր մոտեցումների ցուցադրմանը` ընդհանուր առմամբ, Հարավային Կովկասում քաղաքականության առումով: Մինչ այդ, թերևս, Անկարան կփորձի Վաշինգտոնում հարավկովկասյան խնդիրներին անդրադառնալ ԱՄՆ-ի իշխանությունների հետ բանակցություններում: ԱՄՆ նախագահ Դոնալդ Թրամփը մայիսի 16-ին Վաշինգտոնում կընդունի թուրք գործընկեր Ռեջեփ Թայիփ Էրդողանին։ Ըստ Սպիտակ տան մամլո ծառայության՝ «Առաջնորդները կքննարկեն երկկողմ հարաբերությունների հետագա ամրապնդման ուղիները և համագործակցության խորացումն ահաբեկչության բոլոր դրսևորումների դեմ պայքարում»,-ասվում է հաղորդագրությունում։ Պենտագոնի ղեկավար Ջեյմս Մեթիսը խոստացել է սերտ համագործակցել Թուրքիայի հետ՝ վերջինիս հարավային սահմաններին անվտանգությանն աջակցելու հարցում: «Մենք շատ սերտ համագործակցելու ենք Թուրքիայի հետ վերջինիս հարավային սահմանների անվտանգությանն աջակցելու հարցում: Դա Եվրոպայի հարավային սահմանն է, և մենք սերտ շփման մեջ կլինենք»,-ասել է Մեթիսը լրագրողներին Լիտվայում: Մեթիսի կարծիքով՝ ԱՄՆ-ը և Թուրքիան կարող են լուծել վիճելի հարցերը՝ կապված քրդական ջոկատներին զինելու ԱՄՆ-ի որոշման հետ: «Մենք կլուծենք ցանկացած խնդրահարույց հարց»,-ասել է նա: Ամերիկա-թուրքական բանակցություններում ԼՂ խնդրի վերաբերյալ իհարկե հիշատակում չկա, բայց չի կարելի բացառել, որ Անկարան` Բաքվի խնդրանքով Թրամփից պահանջի որոշակի ուշադրություն այս հարցի նկատմամբ: Ի դեպ, Էրդողանի` ամերիկյան այցի նախօրեին Անկարայի հետ իր ջերմ հարաբերություններն է ընդգծել Մոսկվան: Այժմ Թուրքիայի հետ հարաբերություններն ավելի լավ են ընթանում, քան Գերմանիայի հետ, հայտարարել է ՌԴ ԱԳ նախարար Սերգեյ Լավրովը՝ մեկնաբանելով մայիսի 2-3-ին Սոչիում Ռուսաստանի նախագահ Վլադիմիր Պուտինի հանդիպումները Գերմանիայի կանցլեր Անգելա Մերկելի և Թուրքիայի նախագահ Ռեջեփ Թայիփ Էրդողանի հետ: «Արդյունքները, իհարկե, որոշ չափով հիասթափեցնող էին՝ հաշվի առնելով, որ երկու երկրները մեր հին գործընկերներն են, բայց Թուրքիայի հետ հարաբերություններն այժմ շատ ավելի դրական տեմպերով են առաջ շարժվում, քանի Գերմանիայի հետ»,-ասել է Լավրովը, միևնույն ժամանակ նշելով, որ չնայած առկա դժվարություններին, Ռուսաստանի և Գերմանիայի միջև ապրանքաշրջանառությունը ամենախոշորներից է: Ինչ վերաբերում է Թուրքիային, ապա Լավրովի խոսքով՝ խոշոր նախագծեր են իրականացվում, նախագահները քննարկել են՝ ինչպես են ընթանում գործընթացները և ինչ պետք է անել: «Դա վերաբերում է և՛ «Թուրքական հոսք»-ին, և՛ «Ակկույու» ատոմային էլեկտրակայանին»,-ասել է Լավրովը: Նշենք նաև, որ Անկարան շարունակում է Ս-400 զենիթահրթիռային համալիրի մատակարարման բանակցությունները Մոսկվայի հետ, սակայն նրա վերջնական նպատակն է ինքնուրույն արտադրել սեփական ՀՕՊ համակարգի բաղադրիչներ, հայտարարել է Թուրքիայի պաշտպանության նախարար Ֆիքրի Ըշըքը: «Ռուսաստանի հետ Ս-400-ի մատակարարման բանակցությունները հասել են հասուն փուլի, մնացել են տեխնիկական մանրամասները: Երբ պայմանավորվենք գնի շուրջ, այն կներկայացնենք մեր նախագահին, և որոշում կընդունվի: ՆԱՏՕ-ի երկրները մեզ հետ չեն կիսվում տեխնոլոգիայով, չեն ներկայացնում մրցունակ գին, սակայն անմիջապես քննադատում են, հենց որ Թուրքիան սկսում է փնտրել այլընտրանքներ: Նրանք այդպիսի իրավունք չունեն: Մեր հիմնական նպատակն է, ինչի դեմ ոչ ոք չի կարող հանդես գալ` ՀՕՊ համակարգի համար արտադրել սեփական բաղադրիչներ: Եվ մենք մեծ աշխատանք ենք սկսել այդ ուղղությամբ»,- ասել է Ըշըքը NTV հեռուստաալիքի եթերում: Թամար Բագրատունի