Պուտինի հազը, Փաշինյանի ծիծաղն ու Լուկաշենկոյի հրավերը

Կորոնավիրուսի համաճարակի ֆոնին ռուսական գազի գինը պետք է լինի ավելի ճկուն և «տանելի սպառողների համար», երեկ հայտարարել է Բելառուսի նախագահ Ալեքսանդր Լուկաշենկոն ԵԱՏՄ բարձրագույն խորհրդի հեռակա նիստի ժամանակ:

«Ակնհայտ է, որ այսքան կտրուկ փոփոխությունների դեպքում անհրաժեշտ է գազի գինը համապատասխանեցնել ներկա տնտեսական իրավիճակին»,- հայտարարել է Բելառուսի նախագահը: «Այստեղ ուզում եմ հատուկ դիմել Ռուսաստանի նախագահ Վլադիմիր Պուտինին, որպեսզի մենք օպերատիվ կերպով քննարկենք այդ հարցը»,- ասել է Լուկաշենկոն` ընդգծելով` նաև այս հարցից է կախված միության արդյունավետությունն ու աշխատունակությունը:

Հիշեցնենք, որ ավելի վաղ նաև Հայաստանն էր նման հարց բարձրացրել: Նախօրեին, սակայն, փոխվարչապետ Մհեր Գրիգորյանը տեղեկացրել է, որ առայժմ պաշտոնական Երևանը «Գազպրոմից» պատասխան չի ստացել:

Ահա, Կրեմլից, Պուտինի մամլո խոսնակի մակարդակով այսօր հայտարարեցին, որ գազի գների հարցը կարող է քննարկվել:

Այնուհետև Բելառուսի նախագահ Ալեքսանդր Լուկաշենկոն Եվրասիական տնտեսական միության գործընկերներին հրավիրել է Մինսկում մայիսի 19-ին ԵԱՏՄ անդամ երկրների ղեկավարների գագաթնաժողովին: «Ես բոլորիդ սպասում եմ Մինսկում: Երաշխավորում եմ լիարժեք անվտանգություն: Համոզված եմ, որ դուք, ինչպես միշտ, կվայելեք ձեր հանգիստը մեր Բելառուսի մայրաքաղաքում», - ասել է նա՝ Եվրասիական տնտեսական բարձրագույն խորհրդի տեսակոնֆերանսի ձևաչափով հանդիպմանը:

Լրատվամիջոցները տեղեկացրել էին, որ լսելով Բելառուսի նախագահի հրավերը, ՀՀ վարչապետ Նիկոլ Փաշինյանը և Ղրղզստանի նախագահ Սոորոնբայ Ժեենբեկովը ծիծաղել են, Ղազախստանի նախագահ Կասիմ-Ժոմարտ Տոկաևը գլխով դրական է պատասխանել, իսկ ՌԴ նախագահ Վլադիմիր Պուտինի դեմքին որևէ մկան չի շարժվել: Հիշեցնենք՝ 2020 թվականին Բելառուսը նախագահում է ԵԱՏՄ-ում:

Լուկաշենկոյի խոսքով՝ մայիսի 19-ին կայանալիք գագաթնաժողովին նախատեսվում է քննարկել ԵԱՏՄ զարգացման ռազմավարությունը մինչ 2025 թվականը, նաև կորոնավիրուսի համավարակից հետո միության մասնակից երկրների տնտեսության վերականգնումը։

Ավելի վաղ Ալեքսանդր Լուկաշենկոն բողոքել էր, որ ռուսական լրատվամիջոցները կողմնակալ կերպով են լուսաբանում կորոնավիրուսի դեմ Բելառուսի ձեռնարկած միջոցները։ Նրա խոսքով՝ ԶԼՄ-ները «նողկալի տեղեկություն» են հայտնում, իբր «բատկան իր ժողովրդին տրակտորով, օղիով ու շոգեբաղնիքով է բուժում»: «Գիտեք՝ մի անգամ ոտքի վրա կատակեցի։ Բայց ամեն կատակի մի մասն է կատակ»,-ասել է Լուկաշենկոն ժողովի ժամանակ։

Նա հիշեցրել է, որ Բելառուսը Առողջապահության համաշխարհային կազմակերպությանը հատուկ հրավիրել է, որ գնահատի իրավիճակը հանրապետությունում։ «Իսկ դուք կարո՞ղ եք մասնագետներ կանչել ձեր երկիր․ ռուսներդ, ամերիկացիներդ։ ԱՀԿ ներկայացուցիչներն ասել են, որ բելառուսներից բողոք չունեն», - ընդգծել է Լուկաշենկոն։
Իսկ ահա Պեսկովը խոսել է Պուտինի առողջական վիճակի մասին, որը երեկ հազացել էր գագաթնաժողովի ժամանակ: ՌԴ նախագահ Վլադիմիր Պուտինը հազը չէր վրիպել քննարկման հետևողների ուշադրությունից: Լրագրողները, Պուտինի խոսնակից՝ Դմիտրի Պեսկովից, հետաքրքրվել են նախագահի առողջական վիճակով: Պեսկովն վստահեցրել է, որ ամեն ինչ նորմալ է, նախագահն առողջ է:

Այսպես, ԵԱՏՄ-ականները մի հավաք էլ անցկացրեցին: Դատելով Փաշինյանի ելույթից, Հայաստանն ունի լուրջ մտահոգություններ ունի, և համավարակի պայմաններում առևտրատնտեսական հարաբերությունների սառեցմանը, և դրանով իսկ տնտեսության քայքայմանը: Դա է պատճառը, որ Փաշինյանի ելույթի հիմանական մեխը համագործակցությունը շարունակելն է եղել: Նա ընդգծել է, որ սահմանափակ տնտեսական հնարավորություններով և ռեսուրսներով երկրների համար համավարակի շուրջ իրավիճակը կարող է ունենալ ամենածանր հետևանքները, հետևաբար Հայաստանը կողմնակից է մարտավարության, որը կառուցված է գործընկերության և համագործակցության վրա:

Մետաքսյա Շալունց