Հրամանի խախտում` Քաղաքացու օրով հիշեցնում է Ա. Բախշյանը

Այսօր Հայաստանի հանրապետությունում առաջին անգամ նշում ենք Քաղաքացու օրը, շատ լավ է եւ ես որոշեցի հենց այսօր կրկին ահազանգել «Առավոտ»-ում մարտի 27-ին հրապարակածս «Օրինական ծնողների առկայության պայմաններում, կտրուկ ավելացել են այլ երկրի քաղաքացիությամբ խնամակալ ունեցող երեխաների թիվը, որպեսզի նրանք սովորեն ռուսական դասարաններում» հոդվածի մասին, որովհետեւ չգիտեմ ահազանգս տեղ հասավ, թե՝ ոչ: Այս մասին Facebook-ի իր էջում գրել է Հանրային խորհրդի անդամ Անահիտ Բախշյանը:

Նա ներկայացրել է ՀՀ ԿԳ նախարար Արայիկ Հարությունյանին ուղղված իր նամակը.

«Հարգելի պարոն Հարությունյան,

Որպես Երեւանի ավագանու անդամ, 2017 թվականի սեպտեմբերից մինչեւ 2018-ի ապրիլ ուսումնասիրություն եմ իրականացրել Երեւանի դպրոցների ռուսական դասարաններում սովորողների թվի, այլ երկրի քաղաքացիների եւ այլ երկրի քաղաքացիությամբ խնամակալ ունեցող երեխաների թվի մասին։ Ի պատասխան վերոնշյալ հարցերի մասին 04․09․2017թ․ 3/Ե-42 Երեւանի քաղաքապետին ուղղված գրության, սեպտեմբերի 26-ին ստացել եմ համապատասխան ցուցակ, ըստ որի ՀՀ ԿԳ նախարարի 12․07․2011թ․ N806-Ա/Ք հրամանով հաստատված ռուսերենով ուսուցմամբ դպրոցների ցանկում, 2017-2018թ․թ․ուս տարում սովորել է 2584 աշակերտ, որոնցից 1839-ը այլ երկրի քաղաքացիների երեխաներ են, 113-ը՝ այլ երկրի քաղաքացիությամբ խնամակալ ունեցող երեխաներ են, իսկ 632-ը՝ ՀՀ քաղաքացիների երեխաներ են, հիշենք ԿԳ նախարարի հրամանը․ «երբ սովորողի ծնողները Հայաստանի Հանրապետության քաղաքացիներ են, ուսուցման լեզուն հայերենն է»։

Օտարերկրյա քաղաքացիների, երկքաղաքացիների, Հայաստանի Հանրապետության քաղաքացիություն չունեցողների ծնողների երեխաների համար ռուսական դասարաններում ընդունելություն են իրականացնում Երեւանի 13 դպրոցներ, սակայն այդ ցուցակում կա մի դպրոց՝ Երեւանի թ․ 192, որը, ըստ Կրթության տեսչական մարմնի 2018 թ․ ապրիլին ինձ տրամադրած տեղեկանքի, ներառված չէ ԿԳ նախարարի հրամանում, այսինքն` այդ դպրոցում ռուսական դասարանների առկայությունն անօրինական է ու հայտի չէ, թե ի՞նչ հիմքով է այդ դպրոցում կազմակերպվում ընդունելություն ռուսական դասարաններում։

Ուսումնասիրությունս շարունակվել է 2017թ․ նոյեմբերի 7-ին Երեւանի քաղաքապետին ուղղված հաջորդ նամակով, որում ներկայացնելով վերոնշյալ թվերը, խնդրել եմ դպրոց առ դպրոց տեղերում ստուգել այլ երկրի քաղաքացիությամբ խնամակալների եւ ՀՀ քաղաքացիություն ունեցող ծնողների երեխաների փաստաթղթերի օրինականությունն ու տրամադրել համապատասխան տեղեկանք։

2017թ․ նոյեմբերի 16-ին ստացել եմ պատասխան, որում գրված է, որ ՀՀ քաղաքացիների 632 երեխաները սովորում են ռուսական դասարաններում ԿԳ նախարարի հրամանով հաստատված կարգով?, այնինչ․ «երբ սովորողի ծնողները Հայաստանի Հանրապետության քաղաքացիներ են, ուսուցման լեզուն հայերենն է:»

Սա ժողովրդագրական լուրջ խնդիր է, որը պետք է վերահսկվի հավուր պատշաճի։ Կրթության տեսչական մարմինը 2017թ․ մայիսի 15-19-ը Երեւանի ռուսերենով ուսուցմամբ հանրակրթական դպրոցներում ուսումնասիրություններ է իրականացրել, որի արդյունքում խնդրի վերաբերյալ բացահայտումներ է արել եւ 2017-ի մայիսի 22-ին դիմել է Երեւանի քաղաքապետին՝ խնամակալության եւ հոգաբարձության հանձնաժողովներում ուսումնասիրություն կատարել, սակայն քաղաքապետի համաձայնությունն այդպես էլ չեն ստացել։ Իմ համոզմամբ, այս ոլորտում կոռուպցիան ակնհայտ է։

Խնդրում եմ այս խնդիրը պահել ԿԳՆ-ի եւ հատկապես Երեւանի քաղաքապետի ուշադրության կենտրոնում եւ լավ կլինի, եթե Կրթության տեսչական մարմինը զբաղվի այս խնդրով։ Սա Հայաստանի ժողովրդագրությանը սպառնացող վտանգներից մեկն է։ Հուսամ այս խնդիրը կստանա համապատասխան արձագանք»: