Պաշտոնյաների որդիները կդառնան հոգեւորականներ

Oct 26, 2017 Comments Off on Պաշտոնյաների որդիները կդառնան հոգեւորականներ

Խորհրդարանը հատուկ ընթացակարգով քննարկում է կառավարության կողմից ներկայացված «Զինվորական ծառայության և զինծառայողի կարգավիճակի մասին» նախագծերի աղմկահարույց փաթեթը, որով մի շարք փոփոխություններ են նախատեսվում իրականացնել, տարկետման վերացումը, ինչպես նաեւ ակադեմիական տարկետումը տրամադրելու կարգը խստացնելը։

Նախագծի հիմնական զեկուցող, պաշտպանության նախարար Վիգեն Սարգսյանին հարց ուղղեց «Ելք» խմբակցության պատգամավոր Արարատ Միրզոյանը՝ հիշեցնելով վերջինիս խոսքերը, որ կարևոր է՝ նախագիծն ընդունվի կոնսենսուսով:«Այդ կոնսենսուսին հասնելու համար որքա՞ն է ձեր փոխզիջումային պատրաստակամությունը, քանի որ բազմաթիվ լավ դետալներին զուգահեռ կան որոշ դետալներ, որոնք հասարակության, նաև խորհրդարանականների կողմից չեն ընդունվել»,- ասաց Միրզոյանը:

Նախարարն արձագանքեց, որ հանրային քննարկումների նպատակը դա էր, և չի եղել որևէ բովանդակային առաջարկ, որը չի ներառվել «Պատիվ ունեմ» և «Ես եմ» ծրագրերում:«Ես բավական ճկուն եմ քաղաքականություն մշակելիս և արել եմ ամեն ինչ, որ բոլորի ձայնը լսելի լինի»,- ասաց Սարգսյանը՝ հավելելով, որ իրենք ընդամենն իրավական դաշտն են ձևավորում, բայց նախատեսված է, որ ծառայության պայմանները և կանոնները պետք է սահմանվեն կառավարության կողմից:

«Այդ կողմից կարող ենք լրացուցիչ դեպքեր քննարկել գիտությամբ զբաղվող առաձնահատուկ հաջողության հասած երիտասարդ գիտնականների ծառայության հատուկ պայմաններ ապահովելու համար: Բայց մեր քաղաքականությունը ելնում է նրանից, որ պետք է ծառայեն բոլորը, ով ի վիճակի է ծառայել որպես սպա՝ բարձրագույն կրթություն ունեցող, կամ գիտական ներուժ ունեցող մարդը կարող է ծառայել որպես սպա, ով չի ցանկանում, ուզում է արագ երկու տարի շարքային ծառայություն անցնել, կարող է այդ տարբերակն ընտրել: Որևէ պարտադրանք այս քաղաքականություններն իրենց մեջ չեն պարունակում, ընդամենը լրացուցիչ հնարավորություն է տալիս ընտրելու, թե ինչ ձևով է քաղաքացին իր սահմանադրական պարտքը կատարում»,- նկատեց Սարգսյանը:

ԵԼՔ խմբակցության պատգամավոր Էդմոն Մարուքյանին հետաքրքրում էր 3 հարց:Արդյո՞ք պարտադիր ժամկետային ծառայություն ունեցող՝ միլիտարիզացված երկրում, ինչպիսին Հայաստանն է, գիտությունը վտանգված չէ։«Իսրայելի ու Սինգապուրի օրինակը ցույց է տալիս, որ ոչ, միլիտարիզացվածությունը չի խանգարում գիտությանը. Իսրայելը ամենաշատ Նոբելյան մրցանակակիր ունեցող երկիրն է. եւս մեկ անգամ ապացուցվում է, որ սա խոչընդոտ չէ»,- հակադարձեց նախարարը։

Ի պատասխան Էդմոն Մարուքյանն ասաց.ՙԻսրայելում քաղաքական հասարակարգն այլ է, դիկտատուրայի վտանգ չկա»։ Արդյո՞ք Պաշտպանության նախարար Վիգեն Սարգսյանը փայլուն կարիերա կաներ, եթե ոչ թե 3 բուհ ավարտեր ու նոր գնար բանակ, այլ՝ 18 տարեկանում գնար։Նախարարը չի կարծում, որ եթե 18 տարեկանում ծառայեր, կդադարեր սովորել։«Այս իշխանությունն ինձ համար բանակում չծառայածների իշխանություն է. բարձունքների են հասել մարդիկ, որոնք բանակում չեն ծառայել. հիմա հենց նրանք են ասում՝ եկեք բոլորին տանենք բանակ, որ արդար լինի։ Արդյո՞ք սա արդար է»,- Էդմոն Մարուքյանի երրորդ հարցին ի պատասխան Վիգեն Սարգսյանն ասաց. «Մենք պետք է ճիշտ վերաբերմունք դրսևորենք նման երևույթների նկատմաբ, կան և ծառայածներ, եւ հերոսներ և չծառայածներ։ Պետք չէ մասնավորեցված մոտենալ հարցերին»։

Լենա Նազարյանն էլ հիշեցրեց, որ Գեւորգյան ճեմարանում սովորողները կառավարության որոշումով ազատվում են ծառայությունից, ապա հարց ուղեց նախարարին.Չէ՞ որ դուք ասում եք, որ պետք է բոլորը ծառայեն, չպետք է լինեն չծառայածներ: Ինչու չեք բերում սկզբում կառավարության որոշումը վերացնենք, որ հետո չասեք, թե դուք ի զորու չեք, կաթողիկոսի որոշումն է.«Բա որ վեհափառն ասեց՝ ոչ, չենք վերացնում»: Պատգամավորը նկատեց, որ սա կարող է հետագայում դուռ դառնալ բանակից խուսափելու համար, ասել է թե՝ պաշտոնյաների որդիները բանակից ազատվելու համար հոգեւորական են դառնալու՝ թղթով:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: