Սատանայի փաստաբանները հեռանում են սատանայից առա՞ջ
Սատանայի գլխավոր փաստաբան, ՀՀ՝ այլևս նախկին գլխավոր դատախազ Արթուր Դավթյանը հեռացավ։ Անփառունակ, ողորմելի հեռացում, որ համընկավ ՀՀ սուվերեն տարածքի վրա ադրբեջանի՝ մի քանի ուղղությամբ սանձազերծած պատերազմի երրորդ օրվան։ Հեռացավ մեղքի ծանր բեռը շալակին։ Հայաստանի և Արցախի՝ հայկական զույգ հանրապետությունները կործանման տանելու, փաշինյանական բոլոր ազգադավ քայլերը պարտակելու, հովանավորելու և ըստ էության, դրանց վրա որպես գլխավոր դատախազ՝ իր կնիքը դնելով։ Ինչը նշանակում է՝ նա հավասարապես մեղավոր է, որքան վարչապետի աթոռը զբաղեցնողը։ Թերևս, ավելի մեղավոր է, քանի որ ինքը օրենքի և օրինականության թիվ մեկ պահապանի պաշտոնն զբաղեցնելով ոչ միայն ապօրինություն կատարողի ձեռքը չբռնեց երբեք, այլև՝ բոլոր դեպքերում օրենքի և իրավունքի փոխարեն ընտրեց անօրինությունն ու անիրավությունը։
Սատանայի այս փաստաբանի հեռացումը սահուն ստացվեց՝ օրենքի ուժով։ Այն օրենքի, որի առջև դեռ կանգնելու է սույն անձը։
Սատանայի մյուս մերձավորոգույն փաստաբանին՝ ՀՀ ոստիկանապետ Վահե Ղազարյանին ավելի քան անփառունակ ճակատագիր բաժին ընկավ։ Ժամանակին, երբ պիտի նշանակվեր ոստիկանապետի պաշտոնում, փորձ արվեց դրական ֆոն հաղորդել պետության թիվ 1 մեղավորի և պատասխանատուի դասընկերը համարվող այս կերպարին։ Սակայն ժամանակը ցույց տվեց, որ վերջինս ինչպես քպականների ստվար զանգվածը, լավ էլ ադապտացվեց։ Ավելին, դարձավ սև ու կարմիր բերետավոր՝ վայրագ ջարդարարների ղեկավարը։ Նրա ղեկավարած հաստատությունում էին բուծվել հայրենիքի պաշտպանության համար զոհված զինվորների ծնողների՝ հայրերի և մայրերի հանդեպ Եռաբլուր պանթեոնում անմարդկային բռնարարքներ իրականացրած ոստիկանները։
Սատանայի այս փաստաբանի ղեկավարած գերատեսչությունում այսօր հենց նրա՛ հրամանով պիտի բազմաթիվ ազատումներ լինեին, իսկ ինքը որպես ուսադիր կրող՝ հրաժարականի դիմումը արդեն գրած պիտի լիներ։ Հայտարարվեց ընդամենը 2-ի մասին։
Փաստորեն, սատանայի ա՛յս փաստաբանի հեռացման սցենարը հանպատրաստից գրվեց և ի վերջո «սորոսական» հ/կ-ների բրիգադը վերջին 4 տարում գոնե մեկ անգամ իբրև այսպես կոչված՝ «քաղհասարակություն» օգտագործվեց։ Այլապես՝ լրիվ իշխանության թևի տակ մտած՝ նրա հրահանգն են կատարում՝ մեծ հաշվով բոլոր ժամանակներում՝ ծառայելով օտար շահերի․․․
Հիմա, պարզվում է 35 հ/կ-ներ Եռաբլուրում երեկվա կատարվածի համար պահանջում են ոստիկանապետի հրաժարականը։
Բնականաբար, վերին հրահանգով։ Ասել է, թե՝ սատանայի ա՛յս փաստաբա՞նն էլ ճամպրուկները հավաքել է։ Հրաժեշտից առաջ դաժանորեն ոչնչացվելո՞վ․․․
Աղբյուր` Փաստինֆո