Ռուբեն Վարդազարյանի լիազորությունները դադարեցնելու որոշումը բողոքարկվել է
Ռուբեն Վարդազարյանի լիազորությունները դադարեցնելու որոշումը բողոքարկվել է։ Այս մասին «Փաստինֆո»-ի հետ զրույցում նշել է Ռուբեն Վարդազարյանի ներկայացուցիչ, փաստաբան Արամ Օրբելյանը՝ նշելով, որ բողոքը ներկայացվել է հենց ԲԴԽ՝ երեւան եկած նոր հանգամանք հիմքով։
Փաստաբանի պարզաբանմամբ՝ նախատեսված կառուցակարգերի համաձայն՝ ԲԴԽ որոշումների դեմ անձը կարող է բողոք ներկայացնել հենց ԲԴԽ, եթե պարզվում է, որ որոշակի հանգամանքներ են ի հայտ եկել կամ դրանք չէին ներկայացվել վարույթի շրջանակներում՝ անձի կամքից անկախ։
Ինչպես արդեն տեղեկացրել ենք՝ ԲԴԽ նախկին նախագահ Ռուբեն Վարդազարյանի լիազորությունները դադարեցվել են՝ Գրիգոր Բեքմեզյանի, Լիպարիտ Մելիքջանյանի, Դավիթ Խաչատուրյանի նախաձեռնությամբ հարուցված կարգապահական վարույթի հիման վրա։ Ընդ որում, ԲԴԽ-ն Վարդազարյանին կարգապահական պատասխանատվության ենթարկելու մասին միջնորդությունը քննել է՝ առանց Վարդազարյանի և նրա ներկայացուցիչ Արամ Օրբելյանի մասնակցության, թեև Արամ Օրբելյանը նախապես տեղեկացրել էր, որ Սունիքի մարզում նախապես նշանակված դատական նիստեր կան և միջնորդել էր հետաձգել այն, իսկ Ռուբեն Վարդազարյանը, ինչպես պարզվեց հետագայում, առողջական խնդիրներ է ունեցել։
Այժմ բողոք է ներկայացվել ԲԴԽ , որի հիմքում դրվել է այն հանգամանքը, որ վարույթին մասնակցել են բացարկման ենթակա անձինք՝ Գագիկ Ջհանգիրյանը, Դավիթ Խաչատուրյանը, Գրիգոր Բեքմեզյանը, ինչի հիմքում դրվել է հունիսի 16-ից հետո վերջիններիս հարցազրույցները, հրապարակումներ։ Բացի այդ՝ ներկայացվել է նաև տեղեկանք՝ Ռուբեն Վարդազարյանի առողջական վիճակի վերաբերյալ՝ շտապօգնության կանչ, արձանագրված խնդիրներ, ինչը փաստում է, որ Վարդազարյանի բացակայությունը եղել է հիմնավորված, հետևաբար, նիստը պետք է հետաձգվեր։
«Ներկայացրել ենք նաև բովանդակային առարկություններ։ Ինչպես նաև դիմում ենք ներկայացրել՝ ԲԴԽ, որ որոշումը կայացվի առավել սեղմ ժամկետներում, այն է՝ մինչև հուլիսի 27-ին նշանակված Դատավորների ընդհանուր ժողովը, որ անիմաստ ժողովի անցկացում չլինի կամ լինելու դեպքում իմանան, որ ուժի մեջ է որոշումը, նաև՝ մինչև ԲԴԽ նախագահի ընտրությունը՝ ելնելով այն հանգամանքից, որ արդարադատությունը չպետք է լինի ուշացած, պետք է լինի ժամանակին և խնդիրներ չառաջացնի՝ հետագա ակտերի կատարման տեսակետից»,- նշեց Օրբելյանը։
Ինչ վերաբերում է ՍԴ և միջազգային ատյաններ դիմելու հնարավորությանը, ապա բողոքարկման այս երկու գործընթացները մեկը մյուսի հետ կապ չունեն.ՍԴ դիմումի հիմքում պետք է լինի անձի իրավունքները խախտող կիրառված օրենքի սահմանադրականության հարցը, երբ առկա է վերջնական դատական ակտ։
«Վերջնական դատական ակտ ինքնին արդեն իսկ առկա էր, սակայն, եթե ակտը վերացվում է և ունենում ենք վերջնական այլ դատական ակտ, ապա ՍԴ ներկայացված դիմումը, հավանաբար, վարույթ չի ընդունվի հենց այն հիմնավորմամբ, որ անձի իրավունքները չեն խախտվել»,- նշեց Օրբելյանը։
Այլ խոսքով՝ ՍԴ և միջազգային ատյաններ դիմելու հարցը կախված կլինի՝ խախտվում է արդյոք Ռուբեն Վարդազարյանի որևէ իրավունք, իսկ խախտման դեպքում՝ պետք է վերջնական ակտ՝ հատուկ կարծիքներով, արձանագրելու, թե կոնկրետ ո՞ր հոդվածների մասին է խոսքը։
Անդրադառնալով ԲԴԽ-ի կողմից Գագիկ Ջհանգիրյանի նկատմամբ կարգապահական վարույթ չհարուցելուն՝ Օրբելյանը նշեց, որ վարույթի հարուցումը մերժվել է այն պատճառով, որ ձայնագրությունից անցել է մեկ տարի, բայց դա չի նշանակում, որ կարգապահական պատասխանատվության ենթարկելու այլ հիմքեր չկան, որոնց ժամկետները դեռ չեն անցել։