Ի՞նչն է դրդել տղային սպանել եղբորը. համակարգչային խա՞ղն է պատճառը

Արցախում 10-ամյա երեխայի սպանության դեպքի վերաբերյալ ԼՈւՐԵՐ.com-ին նոր մանրամասներ են հայտնի դարձել: Նախնական տեղեկություններով՝ երեխան սպանվել է 18–ամյա եղբոր կողմից՝ առանձնակի դաժանությամբ։

Ըստ հարազատների պատմածի՝ 18–ամյա պատանին եղբորը սպանել է անտառում, նրան դանակի և պատառաքաղի բազմաթիվ վնասվածքներ հասցնելով, այնուհետև թաղել փոսում, փակել տերևներով, ապա գնացել տուն ու իրեն պահել սովորականի պես:

Ըստ որոշ տեղեկությունների՝ սպանությունը կատարած երիտասարդը տարբերվել է տարօրինակ վարքագծով, վարկած կա, որ հանցանքը կատարել է համակարգչային խաղի ազդեցության տակ:

Ավելի վաղ՝ հայտնել ենք, որ ապրիլի 12-ին սպանվել է Արցախի Շահումյանի շրջանի բնակիչ, 2009թ. ծնված Վ. Գ.-ն: Հարուցված քրեական գործի շրջանակում ապրիլի 13-ին Վ.Գ.-ի սպանության կասկածանքով ձերբակալվել է նրա հարազատ եղբայրը` 2001թ. ծնված Ս.Գ-ն։ Նշանակվել են փորձաքննություններ, նախաքննությունը շարունակվում է։

Ի դեպ, ամիսներ առաջ համացանցում ակտիվորեն քննարկվում էր, թե կա վիրուսային ծրագիր, որը երեխաներին դրդում է սպանության, ինքնասպանության, խելագարության։ Այդ ժամանակ էլ «Մոմո» անունով անհասկանալի կերպարի կողմից ուղարկվող հաղորդագրությունները կապում էին այդ օրերին Օշականում ինքնասպանություն գործած 12-ամյա երեխայի դեպքի հետ։

Տեղեկատվական անվտանգության փորձագետ Սամվել Մարտիրոսյանն էլ մեզ հետ զրույցում վստահեցրել էր, որ «Մոմոյի» հարցն ավելի շատ լենգենդ է, որը նման է «Սինի Կիտ» խաղին (քայլերի հաջորդականությամբ երեխաներին տանում է ինքնասպանության․ բարձրահարկ շենքերից ցած են նետվում)։

«Մոմոյի կերպարն իր մեջ վախեր է պարունակում և հենց դրանով են երեխաներին թիրախավորում, քանի որ երեխաները շատ են սիրում նման բաներ։ Այս ամենը սկսվեց նրանից, որ տարածվեցին չստուգված տեղեկություններ, թե գոյություն ունեն ծրագրեր, որոնք երեխաներին դրդում են ինքնասպանության»,-ասաց Սամվել Մարտիրոսյանը։