Թող չգրեր դիմում, ես ի՞նչ անեմ. Նիկոլ Փաշինյանը՝ մաքսատան աշխատակցի մասին
Վարչապետ Նիկոլ Փաշինյանն այսօր լրագրողների հետ զրույցում անդրադարձել է Նորագավիթի մաքսատան աշխատակցի աշխատանքից ազատման հարցին:
«Գիտեք, եթե այդպես շարունակվի, հաջորդ բաց նամակը կլինի այն մասին, որ Սերժ Սարգսյանի աշխատանքային իրավունքները խախտել ենք, որովհետև Սահմանադրության համաձայն՝ վարչապետ ընտրելուց մեկ տարի հետո վարչապետը պաշտոնանկության ենթակա չէր»,- արձագանքեց Նիկոլ Փաշինյանը:
Լրագրողների այն հարցին, թե որքան էլ խնդիրը համակարգային է՝ այդ մարդը քավության նոխազ դարձավ, ասաց. «Գիտե՞ք, գոյություն ունի փաստ և փաստին արձագանք, և կարծում եմ, որ էդպես պետք է լիներ, ես չէի պլանավորել, որ հատուկ պետքա մտնեի էդ սենյակ, ես հետո հետաքրքրվել եմ, որ մեր հարգարժան քաղաքացին ամբողջ կյանքը աշխատել է ՊԵԿ-ում, կարճ ժամանակ աշխատել է ԱԺ-ում և ետ է եկել ՊԵԿ»,-նշեց Փաշինյանը։
Լրագրողների մեկ այլ հարցի, թե ստիպեցիք դիմում գրել, սովետին բնորոշ մտածողության հարց են բարձրացնում, վարչապետը հակադարձեց․
«Ես չէի պլանավորել, որ հատուկ պետք է մտնեի էդ սենյակ: Իմիջիայլոց, ես հատուկ հետաքրքրվել եմ, մեր հարգարժան քաղաքացին ամբողջ կյանքում աշխատել է Պետական եկամուտների կոմիտեում, մի կարճ ժամանակ աշխատել է Ազգային ժողովում և հետ է եկել Պետական եկամուտների կոմիտե: Թող չգրեր դիմում, ես ի՞նչ անեմ: Բայց ես իմ դիրքորոշումն ունեմ, որ այդպիսի մարդիկ չեն կարող լինել: Ես ուզում եմ, որ ոչ ոք անակնկալի չգա: Եվ ես կարծում եմ, որ պետական դրոշի նկատմամբ վերաբերմունք բարձրացնող ոչ մի ակցիա այնքան արդյունավետ չի եղել, ինչքան եղել է այս օրվա միջադեպը: Եվ այն տեղեկատվությունը, որ ես ստանում եմ, հենց այդ օրը ամբողջ պետական համակարգն ինքնաշխատ եղանակով զբաղված է եղել դրոշների նկատմամբ իրենց պատշաճ վերաբերմունքը մշակելով: Դա իր նպատակին ծառայել է: Ինչ վերաբերում է աշխատանքային իրավունքին, ես կարծում եմ՝ լավ մասնագետը Հայաստանում աշխատանքի խնդիր չի կարող ունենալ: Իսկ այդտեղ , ենթադրում եմ, լավ մասնագետներ պետք է աշխատեն»,-ասաց վարչապետն ու հավելեց, որ լավ մասնագետը Հայաստանում աշխատանքի խնդիր չի կարող ունենալ։