Ո՞ր մի դատավորը կուզի Գրիգոր Մինասյանի և Կարեն Անդրեասյանի ձեռքը ընկնել․ Աննա Մկրտչյան

Երևանի ընդհանուր իրավասության քաղաքացիական դատարանում՝ դատավոր Արշակ Պետրոսյանի նախագահությամբ, այսօր կայացել է ԱԺ նախագահ Ալեն Սիմոնյանի՝ ընդդեմ ԱԺ պատգամավոր Աննա Մկրտչյանի ներկայացված հայցի քննությունը։

Հիշեցնենք, որ Ալեն Սիմոնյանը հայց է ներկայացրել դատարան՝ ընդդեմ Աննա Մկրտչյանի՝ պահանջելով պատվին և արժանապատվությանը պատճառված վնասների փոխհատուցում։ Հայցը ներկայացվել է Աննա Մկրտչյանի՝ ֆեյսբուքյան ուղիղ եթերում արված հայտարարությունների վերաբերյալ, որում ասվում էր․ «Ալենը էն մարդն ա, ով որ Երևանում 2018 թվականին դագաղների շքերթից հաճույք էր ստանում: Հաճույք էր ստանում, երբ որ զանգում էին ՀՀԿ-ականների անչափահաս երեխաներին ու ահաբեկում էին:՚, ՙԷդ 18 թվականը հիշելու ա միայն սեփական անբարո գործողությունները այլարացումներ փնտրելու դրվագների մեջª թե էդ ոնց հայտնվեցին էդ դագաղները փողոցներում, էդ սև լենտերը, թե հանրապետականի երեխաներին ովքեր էին կազմակերպում, որպեսզի դպրոցներում ահաբեկեն, որպեսզի դպրոցներում հոգեբանական ճնշումների ենթարկեին, ոնց էին բարձրանում հանրապետականների տներ, ոնց էին աստիճաններ դնում էդ տներին: Դուք հիմա պատկերացնում եք ինչ-որ մեկը Ալեն Սիմոնյանի տուն փորձենա, փորձի աստիճանով բարձրանա, ոնց որ իրենք էին կազմակերպում դա 18 թվականին, խրախուսում և իրենց էջերով տարածում էին էդ ամեն ինչը:՚, ՙԱլենը, նորից եմ կրկնում, 18 թվականը հիշելու ա, միայն ինչ-որ դրվագներ ա փորձելու գտնել՝ սեփական անբարո գործողությունները էդ ժամանակահատվածում արդարացնելու համար:՚, ՙԷս մարդիկ պատերազմ կեղծեցին, էս մարդիկ իշխանության փոխանցում կեղծեցին, որտև իրականում դա պետական հեղաշրջում էր իրենց կողմից կազմակերպված, իրենց կողմից իրականացվող, իրենց տերերի կողմից կազմակերպված՝ Հայաստանի թշնամիների, թուրքադրբեջանական գործակալական ցանցի հետ միասին: Էս մարդիկ կեղծեցին 2-3 ընտրություն, բա վարչության ընտրություններ են կեղծելª բա ինչ պիտի աներ»։

Գործը գտնվում է բուն դատաքննության փուլում։ Դատարանը նախորդ նիստերի ընթացքում արդեն իսկ բաշխել է ապացուցման բեռը։ Դատական նիստը, սակայն, չի լուսաբանվում՝ Ալեն Սիմոնյանի ներկայացուցչի պահանջով, ընդ որում, լրագրողներն ահազանգում են նաև, որ Սիմոնյանի ներկայացուցիչը վիրավորում է լրագրողներին։ Այսօր կայացած նիստի ավարտից հետո պատգամավոր Աննա Մկրտչյանը լրագրողների հետ զրույցում հիշեցրեց, որ Ալեն Սիմոնյանի փաստաբանը «AM» իրավաբանական գրասենյակի աշխատակից է, որը, ըստ մամուլում շրջանառվող լուրերի, Կարեն Անդրեասյանի և Գրիգոր Մինասյանի համատեղ շահերով կապված ընկերությունն է։

«Պատահակա՞ն է, որ բոլոր ՔՊ-ականների շահերն այդ գրասենյակն է իրականացնում և խիստ պատահականությամբ բոլոր գործերը, որոնք կապված է ՔՊ-ականների հետ, միշտ հաղթում են։ Ո՞ր մի դատավորը կուզի Գրիգոր Մինասյանի և Կարեն Անդրեասյանի ձեռքը ընկնել, անմիջապես վարույթը կհարուցվի, լիազորությունները կդադարեցվեն»,- ասաց Մկրտչյանը՝ հավելելով, որ բավարար չէ, որ դատավորները չեն ցանկանում հարաբերությունները փչացնել Մինասյանի և Անդրեասյանի հետ, մի հատ էլ՝ այս դատավորը մեղմ ասած խնդիրներ ունի իրավապահների հետ, խուզարկություններ են իրականացվել; Մկրտչյանը նաև հայտնեց, որ երկու անգամ ինքնաբացարկի միջնորդություններ են ներկայացվել, որոնք դատարանը մերժել է։

Հեղինակ՝ Իզաբել Սահակյան

Աղբյուր` Փաստինֆո