Ջրհեղեղից զգալիորեն տուժել են նաև Նոյեմբերյան խոշորացված համայնքի բնակավայրերը. համայնքապետը ներկայացրել է իրավիճակը

Մայիսի 26-ի ջրհեղեղից հետո Նոյեմբերյան խոշորացված համայնքի կազմում ընդգրկված Արճիշ, Այրում, Հաղթանակ, Դեբեդավան, Կողբ և Բագրատաշեն բնակավայրերի բնակիչներից ստացվել է վնասի վերաբերյալ 260 դիմում: Ընդհանուր առմամբ՝ վնասվել են 40 շենք-շինություններ, հեղեղվել և ոչնչացվել են 108,5 հեկտար մակերեսով այգիներ ու պարտեզներ, անկել են բազմաթիվ ընտանի կենդանիներ ու թռչուններ, ոչնչացել են շատ մեղվափեթակներ:

«Արմենպրես»-ի հետ զրույցում այդ մասին տեղեկացրեց Նոյեմբերյան խոշորացված համայնքի ղեկավար Արսեն Աղաբաբյանը:

«Ստեղծել ենք արտակարգ իրավիճակների հանձնաժողով, որը բացի համայնքապետարանի ու վարչական այլ միավորների ղեկավարներից, մարզպետի աշխատակազմից, նաև ընդգրկել է փրկարար ծառայության ներկայացուցիչներին: Վնասված քառասուն շենք-շինություններից տասներկուսը բնակարաններ են, որոնք ամբողջությամբ ջրալցվել են: Դեռ վաղ է ամբողջական վնասի չափը որոշել, քանի որ շարունակվում է բնակիչների դիմումների ընդունման գործընթացը: Դիմումների քանակը դեռ կավելանա, քանի որ կան տարածքներ, որտեղ առայժմ հասանելիության խնդիր կա: Հաշվարկները կսկսենք երկուշաբթի օրվանից»,- ասաց Աղաբաբյանը:

Նա տեղեկացրեց, որ ջրհեղեղի հետևանքների վերացման գործում իրենց միացել են 35 կամավորներ, և հավելեց, որ կարևոր աշխատանքներ են իրականացրել նաև փրկարար ծառայության աշխատակիցները: Համայնքապետը նշեց, որ իրենք այժմ տեղի ռեսուրսներով փորձում են համապատասխան տեխնիկայի ներգրավմամբ մի քանի օրվա ընթացքում վերացնել աղետի հետևանքները: Նա ընդգծեց, որ տեխնիկայի առումով ռեսուրսները բավարար են և տեղեկացրեց, որ Դեբեդ գետի ավազանն ընդգրկող իրենց համայնքի տարածքում վնասվել են երկու կամուրջներ, որոնք ունեն ռազմավարական նշանակություն, ինչպես նաև մեկ հետիոտնային կամուրջ: Ավտոմոբիլային ճանապարհները բարեբախտաբար լրջորեն չեն վնասվել, պարզապես կա հենապատերն ամրացնելու խնդիր: Հաշվարկները հետագայում կներկայացվեն կառավարությանը:

Աղաբաբյանի խոսքով՝ առաջնահերթ պետք է լուծվի վնասված բնակարանների խնդիրը: Գույքային վերականգնման հարցով համայնքապետարանը դիմել է նաև «Կարմիր խաչին» ու միջազգային կառույցներին: Խոսելով ջրհեղեղից տուժած համայնքի բնակավայրերում ստեղծված սանիտարահիգիենիկ վիճակի մասին, Աղաբաբյանն ընդգծեց, որ իրավիճակը վերահսկելի է:

«Այդ առումով ռիսկեր և վարակային վտանգներ չկան»,- եզրափակեց Նայեմբերյան խոշորացված համայնքի ղեկավարը