Հիմա էլ Քննչական կոմիտեն է սատանաներ փնտրում

Քիչ առաջ մի անհասկանալի հաղորդագրություն ենք ստացել Արգիշտի Քյարամյանի Քննչական կոմիտեից, որն արդեն տեւական ժամանակ է դարձել է քաղաքական հետապնդումների գործիք` Նիկոլ Փաշինյանի ձեռքում եւ զբաղված է բացառապես այս իշխանությունների շահերը սպասարկելով: 

Հաղորդագրության մեջ ասվում է, որ «Հանրապետությունում անցկացվող բողոքի ակցիաների առերևույթ աջակիցներից մեկի սոցիալական ցանցի էջում հրապարակվել է մի գրառում, որտեղ նշվում է հնարավոր իշխանափոխությունից հետո բազմաթիվ անձանց ծեծելու, ստորացնելու, վտարելու, ՀՀ անձնագրից զրկելու, բանտերում սատկացնելու վերաբերյալ»։ 

Թե ով է գրառում անողը, ում դեմ է գրառումն արել եւ ինչու է Քննչական կոմիտեն` իր բան ու գործը թողած, զբաղված ֆեյսբուքյան գրառումներով, պարզ չէ: Սա շատ նման է ԱԱԾ-ին Նիկոլ Փաշինյանի իջեցրած հրահանգին` սատանաներ փնտրելու մասին: 

Քննչական կոմիտեն որոշել է, որ սոցցանցում արված «գրառման մեջ առկա են անձի կամ անձանց խմբի նկատմամբ քաղաքական կամ այլ հայացքներով կամ անձնական կամ սոցիալական բնույթի այլ հանգամանքներով պայմանավորված` զանգվածային լրատվության միջոցների կամ տեղեկատվական կամ հաղորդակցական տեխնոլոգիաների օգտագործմամբ բռնություն գործադրելու հրապարակային կոչ հնչեցնելու, նման բռնությունը հրապարակայնորեն արդարացնելու կամ քարոզելու...առերևույթ հատկանիշներ», որը տեղավորվում է այս իշխանությունների մոգոնած հոդվածին` ՀՀ քրեական օրենսգրքի 330–րդ հոդվածին, որը հատուկ քաղաքական հետապնդումներ իրականացնելու հոդված է։ 

Բայց ամենակարեւորը` գրառումն արած անձը չկա եւ Քննչական կոմիտեն ասում է, որ «միջոցներ են ձեռնարկվում՝ նշված գրառման հեղինակին հայտնաբերելու և նրա արարքին համապատասխան իրավական գնահատական տալու նպատակով»։

Ուրեմն` անձը չկա, գրառումն անորոշ է` ակնհայտորեն թիրախներն էլ հայտնի չեն, գրառումն էլ հավանաբար քաղաքական բնույթի է եւ իշխանություններին ուղղված, բայց Քննչական կոմիտեն որոշել է, որ այդտեղ հանցակազմ կա եւ գործի է անցել: Իսկ գուցե գրառումն անողը ֆե՞յք է, կամ` քաղաքական պայքարի կո՞չ է արել եւ բնական է, որ թիրախը իշխող ուժը պետք է լինի: Ի՞նչ է` Հայաստանում դադարել է գործել Սահմանադրությո՞ւնը, քաղաքական պայքար ծավալել արդեն չի՞ կարելի, եւ ամեն մի քաղաքական տեքստ արդեն իրավապահների քննության առարկա՞ն պետք է դառնա եւ քրեական վարույթ հարուցվի՞: 

Այսքան անթաքույց քաղաքական-քրեական հետապնդումները միջազգային կառույցները մի՞թե չեն տեսնում: Ի վերջո` եթե անձը իր հասցեին սպառնալիք է ստացել, կաշկանդված է իր գործունեության ընթացքում, ոտնահարված են իր իրավունքները, ինքը կդիմի իրավապահներին եւ քաղհայցով հանդես կգա` ընդդեմ վիրավորանքի, զրպարտության, գործարար համբավն արատավորելու համար: Քննչական կոմիտե, Արգիշտի Քյարամյան, ինչո՞ւ մտել մատի ու մատանու արանքը, ինչո՞ւ դառնում քաղաքական գործիք իշխանությունը ցանկացած մեթոդով պահելու պատրաստ անձանց ձեռքում: 

Եւ եթե զբաղվում եք Քաղպայմանագրի անդամների պաշտպանությամբ, ինչո՞ւ չեք զբաղվում շարքային քաղաքացիների, արցախցիների, ընդդիմադիր քաղաքական ուժերի շահերի պաշտպանությամբ, որոնց հասցեին առավել անթույլատրելի եւ քրեական հանցանք պարունակող հայտարարություններ ու գրառումներ են արվում նույն սոցցանցերում: 

ՀԳ Ի դեպ, այսօր Նիկոլ Փաշինյանը Դանիայում մասնակցում է «Կոպենհագենի ժողովրդավարության գագաթնաժողովին», որի շրջանակներում կայանալու է «Առաջնագծից․ Հայաստանի ժողովրդավարության պաշտպանությունը» թեմայով քննարկում: Առաջարկում ենք ՔԿ այս հաղորդագրությունը, բանտերում գտնվող քաղբանտարկյալների օրինակները ներկայացնել` որպես «Հայաստանի ժողովրդավարության» վառ ապացույցներ:

Արեգ Մարգարյան

hraparak.am