Պաշտոնից ազատված դատավորներին լրտեսել են․ Կարեն Անդրեասյանը փորձում է իր նախընտրած թեկնածուին ԲԴԽ անդամ կարգել
«Փաստինֆո»-ի տեղեկություններով՝ իշխանությունները պատրաստվում են Վերաքննիչ քրեական դատարանի դատավոր Ռուբիկ Մխիթարյանին մատուցված ծառայությունների համար պարգևատրել՝ տեղափոխելով ԲԴԽ։ Այն, որ Մխիթարյանը ունի յուրաքանչյուր իշխանության կամակատարի իմիջ՝ հայտնի է թերևս համակարգին քիչ թե շատ ծանոթ ցանկացած անձի, սակայն թերևս ԲԴԽ նախագահ Կարեն Անդրեասյանին է հաջողվել «բացահայտել» Մխիթարյանի նոր հնարավորությունները։ Դեռևս ամիսներ առաջ մամուլը գրել էր, որ Կարեն Անդրեասյանը փորձում էր Ռուբիկ Մխիթարյանին «տեղավորել» ԲԴԽ-ում, ինչը չէր հաջողվել, քանի որ դատավորներն իրենց քվեն, վստահությունը հայտնել էին դատավոր Արշակ Վարդանյանին, այս ընտրությանը հաջորդեց ժողովրդավարական նոր բարձունքի ձևավորումը, այն է՝ ըստ մամուլի հրապարակումների՝ Անդրեասյանը Վերաքննիչ քրեական դատարանի դատավորների հետ հանդիպմանն առաջ էր քաշել Ռուբիկ Մխիթարյանի՝ «դատարանի ստվերային նախագահ» դառնալու հանգամանքն, ինչը բուռն քննարկման և դատավորների ընդվզման առիթ էր եղել։ Իր «ստվերային նախագահի» պարտականությունները, սակայն, Մխիթարյանը «պատշաճ և բարեղճորեն» կատարել է, Կարեն Անդրեասյանն ստացել է իրեն հետաքրքրող տեղեկատվությունը, ինչն օգտագործել է դատական համակարգի նկատմամբ լիարժեք վերահսկողություն իրականացնելու համար։
Այսօր հայտնի դարձավ, որ սեփական դիմումի համաձայն պաշտոնից ազատվել են Վերաքննիչ քրեական դատարանի դատավոր Կարեն Մարդանյանը, Վճռաբեկ դատարանի հակակոռուպցիոն պալատի դատավոր, Դատավորների էթիկայի և կարգապահական հարցերով հանձնաժողովի նախագահ Սերգեյ Մարաբյանը, իսկ օրեր առաջ էլ պաշտոնից ազատվել է Վերաքննիչ քրեական դատարանի դատավոր, ԲԴԽ անդամ Արշակ Վարդանյանը՝ կրկին սեփական դիմումի համաձայն։
Համակարգը լքում են հատկապես այն դատավորները, որոնք արդարամիտ և մասնագիտական բարձր որակներ ունեցող դատավորների համբավ ունեն, սակայն համաձայն չեն, այսպես կոչված, դատական «բարեփոխումներին»։ Մեր ունեցած տեղեկություններով՝ հրաժարականների պատճառը հենց նրանց այլախոհությունն է, կարծիք ունենալու համարձակությունը, ինչի պատճառով ՍԴ դատավոր չընտրվեց նաեւ դատավոր Դավիթ Բալայանը։ Իշխանությունները լուրջ են տրամադրվել նաեւ դատական համակարգի «քպականացման» հարցում։ Այսինքն՝ դատավորներն ունեն երկու տարբերակ՝ կամ ժպտալ իշխանություններին, կամ հեռանալ համակարգից։ Ինքնասիրություն ունեցող դատավորները նախընտրում են հեռանալը։ Մեր տեղեկություններով դատական համակարգում այս հրաժարականների շղթան դեռ կարող է շարունակվել. Այլախոհության կոմպրոմատների թղթապանակը գործի է դրվել ամբողջ ծավալով, որին կհաջորդեն նաեւ իշխանություններին ծառայություններ մատուցված դատավորի (ների) խրախուսումները։
Հեղինակ՝ Իզաբել Սահակյան
Աղբյուր` Փաստինֆ
Հետևեք մեզ Viber-ում
