Չկորցնել զգոնությունն ու չհրճվել
Ադրբեջանի և Ռուսաստանի միջև առկա հակասությունների թեման դարձել է հայաստանյան քննարկումների գլխավոր թեմաներից մեկը: Իհարկե, Հայաստանի հակառակորդ պետության հետ այս կամ այն երկրի, առավելևս Հայաստանի ռազմավարական դաշնակից Ռուսաստանի հետ հարաբերություններում լարումը ինչ-որ առումով ձեռնտու է Հայաստանի համար: Բայց սա միայն առաջին հայացքից: Նախ, որովհետև Ռուսաստան-Ադրբեջան, Ռուսաստան-Թուրքիա հարաբերությունները մեկ անգամ չեն փորձությունների ենթարկվել: Այդ հարաբերությունները, եթե լարվել են, ապա որոշ ժամանակ անց հարթվել են, իսկ այդ հարաբերություններում ջերմությունը, գիտենք, թե պատմության ընթացքում ինչ է արժեցել հայության համար: Հիմա, հնարավոր է, ռուս-ադրբեջանական հարաբերությունները կրկին լարվեն, անգամ հասնեն աննախադեպ սրության, բայց արդյոք դա հավերժ է լինելու՞... Իհարկե ոչ: Նրանք մի գեղեցիկ օր կհաշտվեն, ու ամեն ինչ կրկին կվերադառնա նույն հունը: Կամ, եթե անգամ լարումն աննախադեպ աստիճան լինի` Հայաստանին ձեռնտո՞ւ է լինելու, որպեսզի Ռուսաստանի հետ այդ լարմանը «զարկ տա»: Ի՞նչ կարող է արժենալ հանուն Ռուսաստանի շահի թեկուզ հակառակորդ պետության հետ նոր լարումը... Սրանք հարցեր են, որոնց մասին արժե մտորել, և մտորելու դեպքում մեկ եզրակացություն կա, որը պետք է անել` Հայաստանի շահը պահանջում է ինքնուրույն, ՀՀ շահերից բխող քաղաքականություն թե՛ դաշնակիցների, թե՛ հակառակորդի հետ հարաբերությունները կառուցելիս: Որքան հայկական կողմի համար վտանգավոր է ռուս-ադրբեջանական ու ռուս-թուրքական հարաբերություններում ջերմությունն` այնքան էլ կարող է վտանգներով ու սպառնալիքներով լի լինել Ռուսաստանի զայրույթն այս կամ այն երկրի նկատմամբ: Օրինակ, այս պայմաններում չի բացառվում, որ Մոսկվան լծվի ղարաբաղյան հակամարտությունը լուծելուն, որպեսզի ցույց տա Ալիևին «իր տեղը»: Դրա ազդակներն արդեն իսկ կան: Մենք չունեն իրավունք թողնելու ԼՂ հակամարտության լուծումը մեր թոռներին՝ հայտարարել է միջազգային հարցերով Պետդումայի կոմիտեի նախագահ Լեոնիդ Սլուցկին։ «Իրավիճակը Լեռնային Ղարաբաղում բարդ է արդեն երեք տասնամյակ։ Բոլորս գիտենք 2009թ. Մադրիդյան սկզբունքները, հիշում ենք Ադրբեջանի և Հայաստանի առաջնորդների միջև ոչ հեշտ բանակցային ռաունդները, որոնք անցկացվել են ռուսական ղեկավարության մասնակցությամբ։ Այդ հանդիպումների ընթացքում վճռվել են հարցեր, որոնք մենք մեր երեխաներին ու թոռներին թողնելու իրավունք չունենք»,-ասել է Սլուցկին «Վեստնիկ Կավկազա» պարբերականի հետ հարցազրույցում։ Նրա խոսքով՝ ղարաբաղյան հակամարտությունն անհրաժեշտ է լուծել այսօր՝ ներկայիս քաղաքական գործիչների օգնությամբ։ Արցախի ժողովրդի ապագան չի կարող լուծել որևէ գերտերություն, առավելևս, երբ զայրացած է կողմերից մեկի վրա և պարզ չէ, թե որն է նրա իրական նպատակը` իսկապես ԼՂ խնդիրը ի շահ հայության լուծե՞լը, թե՞ ի շահ Մոսկվայի ազդեցության ամրապնդման: Այնպես որ, Հայաստանում հրճվանք ապրողները, լավ կլիներ, Հայաստանի ու Արցախի հզորացման ու ամրացման անհրաժեշտության մասին մտորեին և գործուն քայլեր իրականացնեին: Թամար Բագրատունի
Հետևեք մեզ Viber-ում
