Կինոյի տղա խաղալու ժամանակը չի՝ հանգիստ նստիր տեղդ
Ռուս-ուկրաինական պատերազմի հետևանքով ռուսական կապիտալի դեպի Հայաստան ենթադրյալ ներհոսքի գաղափարն այնքան է ոգևորել Հայաստանի իշխանություններին, որ նրանք անգամ տակտի զգացումն են կորցրել;
Էկոնոմիկայի նախարարը բացահայտ կոչ է անում Արևմուտքի պատժամիջոցների ցանկում ներառված ռուսական ընկերություններին տեղափոխվել Հայաստան։
Նախարարը տարբեր առիթներով հայտարարել է, որ տասնյակ ընկերություններ արդեն տեղափոխվել են, մի շարք ընկերություններ էլ ճանապարհին են։ <<Դիմել են բազմաթիվ ընկերություններ, տասնյակ և նույնիսկ կարելի է ասել հարյուրավոր ընկերություններ»,- հպարտորեն հայտարարել է Քերոբյանը և ավելացրել, թե բիզնեսը Հայաստան տեղափոխող ընկերությունների մեծ մասը բարձր տեխնոլոգիական ոլորտից են։
«Հիմնականում դրանք այն ընկերություններն են, ովքեր ունեն ուղիղ առնչություն արևմտյան շուկաների հետ, և այօրվա սահմանափակումները թույլ չեն տալիս, որպեսզի իրենք իրենց երկրից աշխատեն»,- բացատրել է Քերոբյանը։
Որպես բիզնեսմեն՝ Քերոբյանի մոտեցումները թերևս հասկանալի են, բայց որպես նախարար՝ այս տղան շարունակում է բեխաբար հայտարարություններ անել՝ երկրի և պետության համար ստեղծելով ռիսկեր ինչպես ռուսական, այնպես էլ ԵՄ գործընկերների հետ։ Նախ՝ հազիվ թե Ռուսաստանում ողջունում են իրենց երկրից կապիտալի արտահոսքը։ Ցանկացած ռազմական իրադրության ժամանակ ամենամեծ խնդիրներից մեկը կապիտալի արտահոսքն է, որն այս դեպքում կրկնակի մեծ է, քանի որ սանկցիաներն աննախադեպ են և շատ անգամ գերհզոր ռուսական կայսրության համար։ Բայց սա դեռ մի կողմ։ Ինչպիսի՞ն կլինի Արևմտուքի, մասնավորապես ԵՄ-ի դիրքորոշումը ռուսական կապիտալով ընկերություններին հյուրընկալող Հայաստանի հանդեպ, եթե եվրոպական երկրները սանկցիա են կիրառում ռուսական կապիտալով ընկերությունների հանդեպ, սառեցնում են ռուսական ընկերությունների և ՌԴ քաղաքացիների բանկային հաշիվները։
Պետական բարձրաստիճան պաշտոնյաների կողմից հնչող այդ կարգի հայտարարությունների հետևանքը կարող է լինել այն, որ ինչ-որ պահից սկսած՝ Հայաստանը նույնպես կհայտնվի եվրոպական պատժամիջոցների տակ։ Թերևս ավելորդ է ասել, որ պատժամիջոցների կիրառումը վերջնականապես կկործանի Հայաստանի առանց այդ էլ անկման եզրին գտնվող գտնվող տնտեսությունը։ Եթե անգամ բանը չհասնի էլ, պատժամիջոցներին ԵՄ-ն կարող է վերանայել Հայաստանին տրվող 2,6 մլրդ եվրոյի ֆինանսավորումը, որի հետ Հայաստանի կառավարությունը լրջագույն հույսեր է կապում։ Բավական է նշել, որ այդ ֆինանսավորումից է կախված Նիկոլ Փաշինյանի խոստացած 300 դպրոցի և 500 մանկապարտեզի կառուցման ծրագիրը, առանց այդ միջոցների ծրագիրն ուղղակի կգրվի սառույցին։ Ընդհանրապես ԵՄ ֆինանսավորումը հիմնականում նախատեսված է ենթակառուցվածքների զարգացման համար, որից էլ ածանցվելու է տնտեսական ակտիվացումը։
Այնպես որ՝ ճիշտ կլինի, որ որևէ մեկը Քերոբյանին բացատրի, որ կինոյի տղա խաղալու ժամանակը չի՝ հանգիստ նստիր տեղդ։
Հայկ Դավթյան
Հետևեք մեզ Viber-ում
