«Պատանդ» մնացած նախարարն ու ՀՀԿ-ական պատգամավորի «օգնության» ձեռքը
Ազգային ժողովում շարունակվում են 2016 թվականի պետական բյուջեի կատարողականի քննարկումները, այսօր ի թիվս այլոց, հաշվետվության էր եկել Կրթության եւ գիտության նախարար Լեւոն Մկրտչյանը, ով ստիպված էր երկու ժամից ավելի «պատանդ» մնալ քննարկումների դահլիճում։ Պատգամավորների հարցերը բազում էին ու բազմապիսի՝ դպրոցների օպտիմալացման թեմայից սկսած՝ վերջացրած կեղծ դիպլոմների տրամադրում եւ այլն։ Հարկ է նկատել, որ պատգամավորներից եւ ոչ մեկի հարցն ուղղակի կապ չուներ բյուջեի կատարողականի հետ, ինչի առիթով անգամ ՀՀԿ-ական պատգամավոր Գագիկ Մինասյանի կողմից մի քանի անգամ կոշտ դիտողություն եղավ։ «Ծառուկյան» դաշինքի պատգամավոր Սերգեյ Բագրատյանին արգելեց հարցեր ուղղել 2015 թվականի բյուջեից. «Այդ տարիներին պատգամավոր լինեիք, հարցնեիք»,- ասաց Մինասյանն ու խորհուրդ տվեց գալիք բյուջեներից հարցեր չհնչեցնել: «Բա ինչո՞ւ էիք կրթության մինչև 2020 թվականի ծրագիրը քննարկում»,- հակադարձեց պատգամավորը: «Բա դուք գիտեիք՝ լա՞վ էինք անում, որ քննարկում էինք: Ձեր հարցերը քննարկեք ձեր հանձնաժողովի նախագահի աշխատասենյակում»,- խորհուրդ տվեց Ֆինանսաբյուջետային հարցերի հանձնաժողովի նախագահը: Հակադարձելով նրան՝ Սերգեյ Բագրատյանն ասաց, թե բարձրաձայնելու են ցանկացած հարց՝ անկախ նրանից, թե դա ում դուր կգա, ում`ոչ: «Մենք բարձրացնելու ենք, դա ձեզ դուր գա, թե` ոչ»,- պնդեց «Ծառուկյան» դաշինքի պատգամավորը:Այդուհանդերձ Լեւոն Մկրտչյանը համբերատար պատասխանեց բոլոր հարցերին, խոստովանեց, որ դպրոցական դասագրքերի որակը չի բավարարում և կարծիք հայտնեց, որ անհրաժեշտություն կա փոփոխություններ կատարել: Հարցին միջամտեց նաև ԱԺ կրթության, գիտության, մշակույթի հարցերի հանձնաժողովի նախագահ Վարդան Բոստանջյանը: Նա հայտնեց, որ, ըստ իրեն, կան գրքեր, որոնց հեղինակները հոգեկան խնդիր ունեցողի տպավորություն են թողնում: «Հիմա ես իմ 7-րդ դասարանի երեխայի հետ ուսումնասիրում եմ և տպավորություն է, որ որոշ գրքերի հեղինականեր կան, որոնք հոգեկան խնդիրներ ունեն»,- ասաց Բոստանջյանը: Նախարարը խոսեց նաեւ կրթական հաստատությունների քանակի կրճատմանը։ Տեղեկացրեց, որ Հայաստանն ունի 87 հազար ուսանող և 66 համալսարան, ինչը մտահոգիչ է․ «Աշխարհում նման ցուցանիշ դժվար կգտնենք, ունենք համալսարաններ, որտեղ 100-400 ուսանող է սովորում, կրթության որակն այստեղ տուժում է: Բարձրագույն կրթությանն ուղղված չափորոշիչներն այս տրամաբանությամբ չեն կարող աշխատել»: Վերջինս ընդգծեց, որ այս խնդիրները լուծելու համար պետք է լիցենզավորման գործընթացը փոխել: Խնդրի լուծման համար Մկրտչյանն առաջարկում է մանկավարժական ինստիտուտներում չդնել կադաստրային գործ, և ՀՀ-ում ունենանք ուժեղ, իրենց առաքելությանը հավատարիմ, օպտիմալ բարձրագույն կրթական հաստատություններ, որտեղ ուսանողը իր շարժունակությունը կստանա: խնդիրները լուծելու համար»,- շեշտեց նախարարը: ԿԳ նախարար Լևոն Մկրտչյանը` անդրադառնալով ոչ պետական բուհերի շուրջ վերջերս առաջացած միջազգային սկանդալին, երբ Իսրայելն ահազանգել և կասկածի տակ է դրել բժշկական կրթություն ապահովող հայաստանյան բուհերի կողմից տրված դիպլոմը լրագրողների հետ զրույցում ասաց․ «Որևէ մեկին իրավունք չի տրված՝ մեր երկրի հեղինակության հետ խաղալ, խոսքը հատկապես վերաբերում է արտասահմանյան քաղաքացիներին: Շատ խստագույնս, այդ նյութերն ապացուցվելուց հետո, լիցենզիոն և հավատարմագրման գործընթացները պետք է վերանայվեն: Որևէ մեկն իրավունք չունի մեր երկրի ընդհանուր կրթական որակը դնել կասկածի տակ` ընթացիկ, այժմեական խնդիրներ լուծելու համար»։ Լ.Մկրտչյանը նշեց, որ, եթե նման բան լինի նաև պետական բուհում, արմատապես կփոխվի աշխատակազմը և լիցենզիոն խնդրի հարց կլինի, բայց պետական բուհերն այդ իմաստով բավականին լուրջ վերահսկողության տակ են: Այժմ, ըստ նախարարի, ԱԳՆ խողովակով դիմել են և սպասում են, որ իրենց տրամադրվեն ուսանողների և բուհերի անունները, որոնց նկատմամբ խստագույն պատասխանատվություն կկիրառվեն: Նշենք, որ Հայաստանում բժշկական կրթություն տալիս են ԵՊԲՀ-ն եւ «Հայբուսակ» ինստիտուտը։ Անի Սահակյան