«Ամոթանքներ» Բաքվից. Ալիևը հուզված է

Համանախագահների տարածաշրջանային վերջին այցն, ինչպես երևում է, բավական ճնշող է եղել Ադրբեջանի իշխանությունների համար... Հիշեցնենք, հունիսի 19-ին Ադրբեջանի նախագահ Իլհամ Ալիևն ընդունել է ԵԱՀԿ Մինսկի խմբի համանախագահներին, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպշիկին: Հանդիպման մասին այլ մանրամասներ չէին հաղորդվել: Սակայն հենց Ադրբեջան կատարած այցից հետո տարածաշրջանային այցի արդյունքներով համանախագահները հանդես եկան հայտարարությամբ, որով նրանք արձանագրեցին, որ Բաքվում խորը մտահոգություն են հայտնել լարվածության համար: Ադրբեջանում իրենց բանակցությունների ժամանակ համանախագահները խորը մտահոգություն հայտնեցին հրադադարի ռեժիմի խախտման վերջին դեպքերի առնչությամբ, որոնք Ադրբեջան կատարելիք իրենց այցի նախօրեին շփման գծում կորուստների պատճառ են դարձել: Ավելին` միջնորմները դիմեցին Ադրբեջանի ղեկավարությանը՝ խուսափելու հետագա լարումից: Համանախագահները նույն ուղերձը հղում են Հայաստանի ղեկավարներին և Լեռնային Ղարաբաղի «դե ֆակտո» իշխանություններին: Նրանք խրախուսում են կողմերին ձեռնարկել միջոցներ, որոնք կնվազեցնեն լարվածությունը շփման գծում և Հայաստանի ու Ադրբեջանի միջազգային սահմանին: Բաքվում, կարծես, հիստերիա է սկսվում: Ադրբեջանը երբեք չի հրաժարվի տարածքային ամբողջականության սկզբունքից, ասել է Ադրբեջանի նախագահ Իլհամ Ալիևի հասարակական-քաղաքական հարցերով օգնական Ալի Հասանովը՝ մեկնաբանելով ԵԱՀԿ Մինսկի խմբի համանախագահների այցը Բաքու: «Ադրբեջանի դիրքորոշումը հստակ է, և այն հասցվել է համանախագահներին, ՄԱԿ ԱԽ-ին, ԵԱՀԿ-ին, Եվրոպայի խորհրդին և միջազգային հանրությանը: Իսկ դիրքորոշումը հետևյալն է. Ադրբեջանի տարածքային ամբողջականությունը պետք է վերականգնվի, փախստականներն ու տեղահանված անձիք պետք է վերադառնան իրենց տները, պետք է պահպանվեն միջազգային իրավունքի նորմերը»,-ասել է նա: «Նախագահ Ալիևը բազմիցս ասել է, որ Ադրբեջանը ոչ մի թիզ հող չի զիջի որևէ մեկին: Միևնույն ժամանակ մենք պատրաստ ենք տարածաշրջանում հասնել կառուցողական խաղաղության»,- ասել է նա: Հասանովը նշել է, որ ԵԱՀԿ ՄԽ համանախագահների հերթական այցի նպատակն է իրավիճակը պարզաբանելը, ևս մեկ անգամ կողմերի մոտեցումները հստակեցնելը, կողմերի դիրքորոշումները մոտեցնելն ու առաջընթացի հասնելը՝ կապված հակամարտության կարգավորման հետ։ «Մենք կարծում ենք, որ ցանկացած ձևաչափով հանդիպման անցկացումը կծառայի շփման ընդհանուր եզրեր փնտրելուն։ Դրանք վաղ թե ուշ կգտնվեն, հակառակ դեպքում՝ պատերազմը և ադրբեջանական բանակի կողմից Լեռնային Ղարաբաղի և այլ շրջանների ազատագրումն անխուսափելի են»,-ասել է Հասանովը։ Իսկ ադրբեջանցի մեկ այլ պաշտոնյա` Ադրբեջանի փոխվարչապետ Ալի Հասանովն ավելի հուզված է... Նա էլ դժգոհություն է հայտնել ԵԱՀԿ Մինսկի խմբի համանախագահների գործունեության առնչությամբ՝ նշելով, որ նրանք արդեն 20 տարի է այցելություններ են իրականացնում Հարավային Կովկաս, սակայն ոչ մի արդյունքի չեն հասնում. «Թո՛ղ նրանք ամաչեն այն հանգամանքից, որ 20 տարի է այցելում են տարածաշրջան, սակայն այսքան ժամանակ ոչ մի արդյունքի չեն կարողացել հասնել»: Բաքվում, ակնհայտորեն, միջնորդների «համառությամբ»: Պարզ է, որ համանախագահները փորձում են Ադրբեջանից համաձայնություն ստանալ սահմանային միջադեպերի հետաքննության մեխանիզմների ներդրման հարցում: Բացի այդ, համանախագահներն, ըստ ամենայնի ավելի կոշտ են խոսել Ալիևի հետ, եթե հաշվի առնենք այն հանգամանքը, որ համանախագահներն իրենց հայտարարության մեջ հենց Բաքվին մատնանշեցին` որպես լարվածություն ստեղծող կողմ: Հիմա Ալիևն, ըստ ամենայնի, «զարկ կտա» քարոզչությանը: Արդեն իսկ սահմանային կեղծ լուրեր են սկսել դնել շրջանառության մեջ, որոնք ՀՀ ՊՆ-ն հերքում է: Բաքվում, ակնհայտորեն դժգոհ են ԼՂ խնդրի շուրջ ստեղծված իրավիճակից, և համանախագահների կողմից ապրիլյան պատերազմից հետո արդեն երկրորդ անգամ Ադրբեջանին սաստելու փաստից: Թամար Բագրատունի