Մոտ 2 մլն դոլար՝ «Էրեբունի-Երևան 2807» տոնակատարությանը․Yerkir.am-ի հարցման պատասխանը

Yerkir.am-ը գրավոր հարցում էր ուղարկել Երևանի քաղաքապետարան՝ խնդրելով տեղեկատվություն տրամադրել առ այն, թե որքա՞ն է կազմել 2025 թ․ հոկտեմբերին կայացած Էրեբունի – Երևան տոնականատորության ընդհանուր բյուջեն, ներառյալ տարբեր վարչական շրջաններում տեղի ունեցած միջոցառումները, համերգները և այլն։ Մոտ մեկ ամիս տևած քաշքշուկներից և տարբեր վարչություններ մեր զանգերից հետո (հարցումն ուղարկել էինք 15.10.2025 թ.) այսօր, ի վերջո, ստացանք պատասխանը։

«Ընդհանուր առմամբ Երևանի քաղաքապետարանի կողմից «Էրեբունի-Երևան 2807» տոնակատարության շրջանակներում իրականացված միջոցառումների համար ծախսվել է 754.690.895 (յոթ հարյուր հիսունչորս միլիոն վեց հարյուր իննսուն հազար ութ հարյուր իննսունհինգ) ՀՀ դրամ»` պատասխանել է քաղաքապետարանի մշակույթի և տուրիզմի վարչության պետ Գոշ Սարգսյանը։

Ծախսերն այսօրվա փոխարժեքով կազմում են 1․975․631 դոլար։

Խնդրել էինք ծախսերը տալ նաև ըստ յուրաքանչյուր միջոցառման՝ բացվածքով, օրինակ, որքա՞ն է կազմել յուրաքանչյուր միջոցառման կամ համերգի բյուջեն, որքա՞ն է դրանից տրամադրվել երգիչներին, տեխնիկային և այլն։ Քաղաքապետարանից զլացել են պատշաճ կերպով ներկայացնել այդ տվյալները՝ հղում կատարելով կնքված պայմանագրերին և միայն տեղեկացրել, որ 2025թ.«Էրեբունի-Երևան» տոնակատարության համար վարչական շրջանների աշխատակազմերի կողմից համապատասխան բյուջեներից կատարվել են հետևյալ ծախսերը՝

1.  Մալաթիա-Սեբաստիա վարչական շրջան-744.0 հազար դրամ

2. Քանաքեռ-Զեյթուն վարչական շրջան- 110.0 հազար դրամ

3. Էրեբունի վարչական շրջան – 6․928.0 հազար դրամ։

Արժե՞ր, արդյոք, 2807-ամյա (Հռոմից էլ հին) մայրաքաղաքի ծննդյան օրվա տոնակատարության առիթով մոտ մոտ 2 մլն դոլար ծախսել ոմն Թաթայի համերգի վրա, բյուջե, որը քերված է քաղաքացիների հարկերից ու տուգանքներից։ Արդյո՞ք հինավուրց քաղաքակրթության ժառանգորդ Երևանը դրան էր արժանի, արդյո՞ք ավելի քիչ գումարով հնարավոր չէր կազմակերպել ճաշակ թելադրող միջոցառումների շարք, որով կարելի լիներ թե՛ ներկայանալ սեփական քաղաքացիներին, թե՛ զբոսաշրջիկներին ու աշխարհին։