Փաշինյանի պատասխանը Մոսկվային. Նոր «սառը ցնցուղ»

Aug 11, 2018 Comments Off on Փաշինյանի պատասխանը Մոսկվային. Նոր «սառը ցնցուղ»

Հայաստանի վարչապետ Նիկոլ Փաշինյանը, երեկ, ըստ էության, պատասխանել է Ռուսաստանի արտգործնախարար Լավրովի՝ վերջերս աղմուկ բարձրացրած հայտարարությանը…

Հայաստանում նոր իրավիճակ է ու բոլորը պետք է ադապտացվեն դրան, երեկ ասել է Նիկոլ Փաշինյանը` մեկնաբանելով Ռուսաստանի արտգործնախարար Սերգեյ Լավրովի հայտարարությունն այն մասին, որ Հայաստանի իրադարձությունները հակասում են երկրի ղեկավարության հայտարարություններին։ «Սա նոր իրավիճակ է, մենք բոլորս պետք է այդ իրավիճակին ադապտացվենք, այդ թվում Ռուսաստանի մեր գործընկերները։ Այնպես որ, ամեն ինչ նորմալ է», – նշեց նա։

Հիշեցնենք, որ մեկնաբանելով Հայաստանի երկրորդ նախագահ Ռոբերտ Քոչարյանի ու ՀԱՊԿ–ի գլխավոր քարտուղար Յուրի Խաչատուրովի ներառումը Մարտի 1–ի գործում` Ռուսաստանի արտգործնախարար Սերգեյ Լավրովն ասել էր, որ Հայաստանում տեղի ունեցող իրադարձությունները հակասում են նոր ղեկավարության հայտարարություններին, թե որ քաղաքական հետապնդումներ չեն լինելու։

ՌԴ արտգործնախարարն անգամ պնդեց, որ վերջին մի քանի օրերին Մոսկվան մի քանի անգամ փոխանցել է իր մտահոգությունը ՀՀ ղեկավարությանը: «Ռուսաստանը, որպես Երևանի դաշնակից, միշտ շահագրգռված է եղել հայկական պետականության կայունությամբ: Այդ պատճառով այնտեղ տեղի ունեցող իրադարձությունները չեն կարող մեզ չանհանգստացնել, ընդ որում՝ նաև ԱՊՀ այն կազմակերպությունների նորմալ աշխատանքի տեսանկյունից, որոնց անդամակցում է Հայաստանը»,-ասել էր Ռուսաստանի արտգործնախարար Սերգեյ Լավրովը:

«Բայց վերջին օրերին իրադարձությունների ընթացքը հստակ խախտում է եղած դրական միտումը, հակառակ է գնում Հայաստանի նոր ղեկավարության արած հայտարարություններին, թե իրենք մտադիր չեն հետապնդել նախկիններին՝ քաղաքական մոտիվներով»,-եզրափակել էր Ռուսաստանի արտաքին գործերի նախարարը:

Երեկ Նիկոլ Փաշինյանը չի ցանկացել մեկնաբանել Ռոբերտ Քոչարյանի կողմնակիցների այն պնդումները, որ նրա դեմ քաղաքական հետապնդում է իրականացվում։ «Կարծում եմ` ճիշտ չի լինի, որ ես այդ թեմայով այսօր մեկնաբանություն անեմ, որովհետև ցանկացած մեկնաբանություն կարող է դիտարկվել որպես միջամտություն, ազդեցություն գործի վրա։ Բայց ես կարծում եմ, որ Հայաստանի Հանրապետության յուրաքանչյուր քաղաքացի ունի այդ հարցի պատասխանը», – ասաց նա։

Ընդհանուր առմամբ, Փաշինյանը ցույց է տալիս, որ Ռուսաստանից, նույնիսկ Լավրովի հայտարարության ֆոնին, վտանգ չկա: Նա, կարծես, կրքերը հանդարտեցնելու մարտավարություն է բանեցնում, ասելով, թե հայաստանյան նոր իրավիճակին պետք է ադապտացվեն նաև Ռուսաստանի գործընկերները:

Ինչպես կընկալի Մոսկվան Փաշինյանի վերջին հայտարարությունը, կամ՝ ինչով կպատասխանի՝ ցույց կտա ժամանակը: Ռուսաստանից պատասխանը վստահաբար չի ուշանա: Իսկ թե ինչպես դա կանդրադառնա ԼՂ խնդրի, կամ Հայաստանի տնտեսական ոլորտի վրա՝ դա էլ արդեն այլ խնդիր է: Ամեն դեպքում Ռուսաստանից Հայաստանի նկատմամբ խայթոցները դեռ շարունակվում են ռուսական քարոզչության միջոցով:

ՀԱՊԿ անդամ երկրները հակված չեն կազմակերպության գլխավոր քարտուղարի պաշտոնում Հայաստանի ներկայացուցիչ նշանակելուն այն բանից հետո, երբ ներկայիս քարտուղար Յուրի Խաչատուրովը հրաժեշտ կտա իր պաշտոնին, գրել է ИА REGNUM-ը՝ հղում անելով իր աղբյուրին: Ըստ այդ աղբյուրի՝ Հայաստանում իրավիճակը շատ արագ է փոխվում, և չկա երաշխիք, որ Խաչատուրովին փոխարինողին ևս կարճ ժամանակ անց որևէ մեղադրանք չի առաջադրվի:

Ռուսական աղբյուրն արդեն նշում է, թե բացի Երևանից, ՀԱՊԿ անդամ մյուս երկրների մայրաքաղաքներում կարծիք կա, որ կազմակերպության գլխավոր քարտուղարի պաշտոնը պետք է փոխանցել Բելառուսին, չնայած այն բանին, որ այն մինչև 2020 թվականը պատկանում է Հայաստանին: Նշվում է, որ Հայաստանի նոր թեկնածուն չի արժանանալու անդամ երկրների աջակցությանը, քանի որ, ինչպես գրում է լրատվամիջոցը, «հայկական ռազբորկաներն» արդեն լուրջ վնաս են հասցրել կազմակերպության իմիջին:

Փաստորեն, ՀԱՊԿ-ում հակված են վրեժ լուծել Հայաստանից՝ Խաչատուրովի կալանքի մասին որոշման արդյունքում, և մեծ է հավանականությունը, որ Հայաստանը կզրկվի մինչև 2020 թվականը կազմակերպության գլխավոր քարտուղարի պաշտոնից:

Թամար Բագրատունի

Գլխավոր Թողարկում, Վերլուծություն
Մեկնաբանությունները փակ են: