Փաշինյանի և նրա թիմի՝ պետության ղեկին մնալը ոչ միայն հիմնավորված չէ, այլև նրանց մնալու յուրաքանչյուր օրը նորանոր աղետալի հետևանքների պատճառ է դառնում. Հայ գիտնականների հայտարարությունը
Հայ գիտնականների հայտարարությունը
Մենք՝ արտերկրում և Հայաստանում բնակվող հայ գիտնականներս, մտահոգ ենք Նիկոլ Փաշինյանի վարած քաղաքականությամբ ու պահանջում ենք Փաշինյանի և նրանց կառավարության հրաժարականը։
Մեզնից շատերը 2018-ին աջակցել են հեղափոխությանը և հանդես եկել Սերժ Սարգսյանի հրաժարականը պահանջող հայտարարությամբ, սակայն իշխանության երկուսուկես տարիների ընթացքում Նիկոլ Փաշինյանի կառավարությունը ոչ միայն ոչինչ չի ձեռնարկել Հայաստանում գիտության վիճակը բարելավելու և արտերկրի հայ գիտնականների հետ համագործակցությունն ամրապնդելու համար, այլև վարկաբեկել է գիտնականներին և, ինչպես գիտության, այնպես էլ այլ ոլորտներում, հաշվի չի նստել մասնագիտական մոտեցումների հետ և ցուցաբերել է խիստ ոչ կոմպետենտ վարքագիծ։
Արդյունքում երկուսուկես տարի անց, ի թիվս այլ ձախողումների, ունենք նոյեմբերի 9-ին ստորագրված պարտվողական հայտարարությունը, որով կորցնում ենք Արցախի մեծ մասը։ Այդ հայտարարության հետ կապված բազմաթիվ անորոշություններ կան (Արցախի կարգավիճակ, ռազմագերիների վերադարձ, սահմանների ճշգրտում և այլն), սակայն դրանց պարզաբանմանը Նիկոլ Փաշինյանի կառավարությունը չի մասնակցում։ Նիկոլ Փաշինյանը պատասխանատու է ոչ միայն պատերազմի սանձազերծման և դրա աղետալի հետևանքների համար, այլև ընդհանրապես ունակ չէ կառավարել պետությունը։
Երկուսուկես տարիների ընթացքում Նիկոլ Փաշինյանն ու իր կառավարությունը բազմաթիվ սխալներ են թույլ տվել, բայց Արցախի մեծ մասի կորուստն այն սահմանագիծն է, որն անցնելուց հետո Փաշինյանի և նրա թիմի՝ պետության ղեկին մնալը ոչ միայն հիմնավորված չէ, այլև նրանց մնալու յուրաքանչյուր օրը նորանոր աղետալի հետևանքների պատճառ է դառնում։
Մենք պատրաստ ենք մեր գիտելիքներով ու հմտություններով հնարավորինս մասնակցել Հայաստանն այս ճգնաժամային իրավիճակից դուրս բերելուն և նպաստել մեր պետության հզորացմանը, սակայն դա անհնար է, քանի դեռ Նիկոլ Փաշինյանն է Հայաստանի վարչապետը։ Այսպիսով, պահանջում ենք Նիկոլ Փաշինյանի և նրա կառավարության անհապաղ հրաժարականը, որից հետո պատրաստակամ ենք մեր գիտելիքները և փորձը ներդնել հայրենիքի զարգացման գործում։
Հայտարարությանը միանալու համար սեղմեք հղմանը և լրացրեք Ձեր տվյալները։