Սուրբ Սոֆիայի տաճարը մզկիթի վերածելը չպետք է անհետևանք մնա. Բունդեսթագ
«Թուրքիայի իշխանությունների այդ քայլը սադրանք է և վիրավորանք ամբողջ քրիստոնյա աշխարհի համար: Ես սարսափած եմ այն լուրից, որ քրիստոնեական աշխարհի այդ հսկայական տաճարը, որն ընդգրկված է ՅՈՒՆԵՍԿՕ-ի համաշխարհային ժառանգության ցանկում, այժմ Թուրքիայի նախագահ Էրդողանի ցանկությամբ վերածվել է մզկիթի: Սա սադրանք և վիրավորանք է ամբողջ քրիստոնեական աշխարհի համար: Ես կոչ եմ անում Եվրոպական Միությանը, ինչպես նաև ՅՈՒՆԵՍԿՕ-ին չտրվել այդ սադրանքին»,- ասել է Գերմանիայի Բունդեսթագի պատգամավոր Ալբերտ Վայլերը՝ խստորեն քննադատելով Սուրբ Սոֆիայի տաճարին մզկիթի կարգավիճակ վերադարձնելու որոշումը:
Պատգամավորը նաև կասկածի տակ է դնում Եվրոպական Միությանը Թուրքիայի անդամակցության բանակցությունների անցկացման իմաստը:
«Կրոնական բազմազանության, ինչպես նաև ազգային և միջազգային մշակութային ժառանգությունը ինքնըստինքյան պետք է ընդունելի լինի յուրաքանչյուր երկրի համար, որը ձգտում է մտնել Եվրոպական Միություն: Թուրքական կառավարության վարքագիծը որևէ կերպ չի համապատասխանում եվրոպական արժեքային պատկերացնումներին և չպետք է մնա անհետևանք»,- նշել է պատգամավորը:
Վայլերը կոչ է անում բոլոր հավատացյալներին, որոնք իրենց կապված են համարում Սուրբ Սոֆիայի տաճարի հետ, պահպանել հանգստություն և ողջախոհություն: