ՀՀ ԶՈՒ երեք ստորաբաժանումներում անցկացվել են մարտական պատրաստականության բարձրացման միջոցառումներ
Երկրորդ զորամիավորման տանկային ստորաբաժանումներից մեկում մարտի 30-ին անցկացվել են մեքենավարման և հրաձգության գործնական պարապմունքներ:
ՀՀ պաշտպանության նախարարության տեղեկատվության և հասարակայնության հետ կապերի վարչության փոխանցմամբ, նման վարժանքները նպաստում են տանկիստների մասնագիտական հմտությունների կատարելագործմանն ու սպառազինության մարտավարական-տեխնիկական բնութագրերի լիարժեք տիրապետմանը:
4-րդ զորամիավորման հրաձգարաններից մեկում մարտի 30-ին անցկացվել է կրակային պատրաստության գործնական պարապմունք:
Պարապմունքի նպատակն էր հրաձգային վարժությունների կատարման հաստիքային զենքերի կիրառման գիտելիքների կատարելագործումն ու կրակային պատրաստության մակարդակի բարձրացումը:
Սպաների պատրաստվածությունը ստուգելու և նրանց մասնագիտական գիտելիքները զարգացնելու նպատակով 5-րդ զորամիավորումում անցկացվել են հավաք-պարապմունքներ ենթակա զորամասերի գումարտակների և դիվիզիոնների հրամանատարների բարոյահոգեբանական ապահովման գծով տեղակալների ներգրավմամբ:
Պարապմունքների շրջանակում քննարկվել են հավաքների մասնակիցների զեկույցներն ու առաջարկությունները, պարզաբանումներ տրվել մարտական առաջադրանքների և ստորաբաժանումների փոխգործակցության կազմակերպման և այլ հարցերի վերաբերյալ:
Հետևեք մեզ Viber-ում
