Մենք չենք թողնելու, որ դուք պատմության մեջ մտնեք որպես Արցախը հանձնողներ, զրկելու ենք ձեզ` դա անելու բոլոր գործիքներից. Կ. Տեր-Նակալյանը՝ Հ. Իգիթյանի հայտարարության մասին

«Ադեկվադ» միաբանության վարչության անդամ Կոնստանտին Տեր-Նակալյանը ֆեյսբուքյան իր էջում գրառում է կատարել՝ անդրադառնալով այսօր լրագրողների հետ զրույցում ԱԺ «Իմ քայլը» խմբակցության պատգամավոր Հովհաննես Իգիթյանի հնչեցրած մտքին առ այն, որ վարչապետը հայտարարել է՝ խնդիր չի տեսնում, որ բանակցությանն Ալիևի հետ գան նաև իրենց ԼՂ ադրբեջանական համայնք համարող մարդիկ: Նա մասնավորապես նշել է՝ դեռ կա՞ն կասկածողներ, որ ՀՀ-ի և ԱՀ-ի միջև ռազմական փոխխօգնության պայմանագիր կնքելը ամենաօրհասական հարցն է: Գրառումն ամբողջությամբ՝ ստորև.

«Եվ էլի նոր դոզա Բրատիսլավայում կայացած չբանակցություններից: Նախկին ՀՀՇական, ներկա Նիկոլական Իգիթյանը մեզ հայտնում է, որ պարզվում է` Նիկոլը որևէ խնդիր չի տեսնում, եթե բանակցություններին մասնկացի Ղարաբաղի ադրբեջանական համայնքը:

Հետո՞, տղերք ջան, է՞լ ինչ եք չբանակցել հասարակությունից ծածուկ` Դուշանբեից մինչև Բրատիսլավա: Էլ ի՞նչ կենսական նշանակություն ունեցող դրույթներ են ձեր կողմից ընկալվում որպես վրիպակ, բացի նրանից, որ Հայաստանի Հանրապետությունը Արցախի Հանրապետության անվտանգության միակ երաշխավորն է հանդիսանում: Մի ամաչեք, միանգամից ասեք, թե էլ ինչ ղալլաթներ եք արել այս տարիուկեսում:

Հ.Գ. Դեռ կա՞ն կասկածողներ, որ ՀՀ-ի և ԱՀ-ի միջև ռազմական փոխօգնության պայմանագիր կնքելը ամենաակտուալ ու ամենաօրհասական հարցն է հիմա, քանի դեռ էս նախկին նախկինները կամա, թե ակամա տոտալ ֆիասկոյի առջև չեն հասցրել բոլորիս:

Հ.Գ.Գ. Չգիտեմ դուք ոնց, քայլարաստներ ջան, բայց մենք չենք թողնելու, որ դուք պատմության մեջ մտնեք, որպես Արցախը հանձնողներ: Մենք ուղղակի զրկելու ենք ձեզ` դա անելու բոլոր գործիքներից»: