Քաղաքապետարանի՝ շինթույլտվության դիմաց «ԿամԱԶ»-ներ ստանալը չհաշվարկված քայլ է եղել.Սոֆյա Հովսեփյան
Երեւանի քաղաքապետարանի՝ շինթույլտվության դիմաց «ԿամԱԶ»-ներ ստանալը ԱԺ «Իմ քայլը» խմբակցության պատգամավոր Սոֆյա Հովսեփյանի համար անընդունելի եւ չհաշվարկված քայլ է: Այս մասին պատգամավորն ասել է Factor.am-ի հետ զրույցում։
«Փորձել են լավ բան անել քաղաքի համար, կարծես՝ դա բիզնեսի տեսանկյունից ընդունելի քայլ է, բայց մենք պայքարել ենք այս երեւույթների դեմ։ Այժմ ուսումնասիրվում է՝ ճիշտ է դա, թե ոչ, որքանով է պարունակում կոռուպցիոն ռիսկեր»,- ասել է Պողոսյանը։
Հարցին՝ հաշվի առնելով Դավիթ Խաժակյանի պնդումները եւ քաղաքապետի պարզաբանումները, այդ գործարքում կա՞ն կոռուպցիոն ռիսկեր, Սոֆյա Հովսեփյանն ասաց, որ դա կթողնի «համապատասխան մարմինների գնահատականին».
«Թե քաղաքապետարանի որոշ պնդումները, թե պարոն Խաժակյանի պնդումներն ինձ համար համոզիչ են։ Ես չեմ ուսումնասիրել եւ որեւէ մեկը չի ուսումնասիրել, երբ համապատասխան մարմիններն ուսումնասիրեն, այդ ժամանակ էլ կգնահատենք։ Վստահ եմ, որ սա միտումնավոր գործողություն չէ»։
Հիշեցնենք, որ վերջերս սկանդալային քննարկումների առիթ դարձավ այն, որ քաղաքապետ Հայկ Մարությանը որոշ գործարարների շինթույլտվություն էր տվել, ինչի դիմաց գործարարները Երեւանի քաղաքապետարանին նվիրեցին աղբատար «ԿամԱԶ» ավտոմեքենաներ։