Սիսակ Գաբրիելյանի հայտարարությունը ցույց տվեց, որ եղել է քաղաքական հետապնդում

Աժ աշխատակազմի ղեկավարի նախկին տեղակալ Արսեն Բաբայանն այսօր իր մամուլի ասուլիսի ընթացքում ասաց, որ իր նկատմամաբ իրականացվող հետապնդումը ՀՀ պատմության մեջ աննախադեպ է: «Ես ուզում եմ խոսել նաև խափանման միջոցի փոփոխության մասին․ ինչպես գիտեք, դատախազությունը փոխեց իմ խափանման միջոցը, կիրառեց անձնական երաշխավորությունը։ Այս առումով ցանկանում են առանձնահատուկ շնորհակալություն հայտնել Արցախի ՄԻՊ-ին՝ Արտակ Բեգլարյանին, իրավապաշտպան Ավետիք Իշխանյանին, որոնք առաջին իսկ օրերից հանդես եկան միջնորդություններով։ Շնորհակալություն պիտի հայտնեմ ԱԺ պատգամավոր Սիսակ Գաբրիելյանին, որը հետագայում միացավ այս միջնորդությանը:  Պարոն Գաբրիելյանին ճանաչում եմ դեռևս իր լրագրողական գործունեությունից։ Իմ ապօրինի ձերբակալումը նույնպես ի սկզբանե քաղաքական էր։ Իսկ ազատազրկումից դուրս գալը հաստատվեց նաև պարոն Գաբրիելյանի հայտարարություններով, որ, այո, քաղաքական է։ Քաղաքական որոշմաբ տարան փակեցին, քաղաքական որոշմամբ ազատեցին։ Սիսակ Գաբրիելյանը հայտարարում էր, որ դա իրենց քաղաքական թիմի, խմբակցության ընդհանուր քննարկումն է եղել»։

Հիշեցնենք, որ հոկտեմբերի 21-ին պաշտոնեական կեղծիք կատարելու կասկածանքով ձերբակալվել էր Ազգային ժողովի աշխատակազմի ղեկավարի նախկին տեղակալ Արսեն Բաբայանը։ Ըստ ՀՔԾ-ի՝ քրեական օրենսգրքի 300-րդ հոդվածի 1-ին՝ իշխանությունը զավթելու մասով հարուցված քրեական գործի նախաքննության ընթացքում փաստական տվյալներ են ձեռք բերվել այն մասին, որ պաշտոնատար անձինք Սահմանադրական դատարանի նախկին նախագահ Գագիկ Հարությունյանի կողմից լիազորությունները վայր դնելու գործընթացում, խմբային շահերից ելնելով, անձամբ, ինչպես նաև պաշտոնատար անձ չհանդիսացող աշխատակիցների միջոցով կատարել են պաշտոնեական կեղծիքներ։ Նկատի ունենալով, որ բացահայտվել է առերևույթ կատարված նոր հանցագործության դեպք, Հատուկ քննչական ծառայությունում Քրեական օրենսգրքի 314-րդ հոդվածի 1-ին՝ պաշտոնական կեղծիք կատարելու մասով հարուցվել է նոր քրեական գործ, որը միացվել է իշխանությունը յուրացնելու դեպքի առթիվ հարուցված քրեական գործին: Այս գործը հարուցվել էր պատգամավոր Արման Բաբաջանյանի հաղորդման հիման վրա: