Մեր դիրքորոշումն Արցախյան հակամարտության կարգավորման գործընթացի վերաբերյալ անփոփոխ է.Սվիտալսկին խմբագրեց Տուսկի խոսքերը
« Եվրամիության դիրքորոշումն Արցախյան հակամարտության կարգավորման գործընթացի վերաբերյալ անփոփոխ է մնում. ԵՄ-ն բացառում է հակամարտության ռազմական լուծման հնարավորությունը և լիակատար աջակցում է ԵԱՀԿ ՄԽ համանախագահության միջնորդական ջանքերին: Հայաստան-Եվրամիություն Համապարփակ և ընդլայնված գործընկերության համաձայնագրի մասին Եվրամիությունը բազմիցս արտահայտել է իր դիրքորոշումը:
ԵՄ-ն շատ հետևողական է, նույնիսկ երբ երբեմն այս դիրքորոշումն արտահայտվում է տարբեր բառերով, տարբեր բառակապակցություններով: Բայց դիրքորոշումը նույնն է»,- Հայաստանում Եվրամիության պատվիրակության ղեկավար Պյոտր Սվիտալսկին այսօր Երևանում տեղի ունեցած ասուլիսի ժամանակ խմբագրեց Եվրոպական խորհրդի նախագահ Դոնալդ Տուսկի՝ Բաքվում արված հայտարարությունները:
Հիշեցնենք,որ հուլիսի 9-ին Բաքվում Եվրոպական խորհրդի նախագահը հատուկ ընդգծել էր, որ Եվրամիությունն աջակցում է Ադրբեջանի ինքնիշխանությանը, անկախությանը և տարածքային ամբողջականությանը: Բնական է, որ այս հայտարարությունն ու դրանից հետո Երևանում այն խմբագրելու ոչ մի փորձ չանելը մտահոգության տեղիք էին տվել՝ առավել ևս հաշվի առնելով Ադրբեջան-ԵՄ համաձայնագրի շուրջ բանակցություններն ու այդ համաձայնագրում Արցախյան հակամարտության վերաբերյալ միակողմանի ձևակերպումներ ամրագրելու Ադրբեջանի փորձերը:
Հետևեք մեզ Viber-ում
