«Սրա ամենատիպիկ օրինակը գլխավոր դատախազի՝ կցկտուր դատարան ներկայանալն էր». Ռոբերտ Քոչարյանի պաշտպանական խումբ
Այսօր «Հայելի» ակումբում տեղի ունեցած ասուլիսի ժամանակ Ռոբերտ Քոչարյանի պաշտպանական խմբի անդամներից Արամ Օրբելյանը կարծիք հայտնեց, որ հենց հանցագործությունը մի քիչ ոչ ստանդարտ է, անմիջապես մարդուն կալանավորում են։
«Սրա ամենատիպիկ օրինակը գլխավոր դատախազի՝ կցկտուր դատարան ներկայանալն էր։ Մենք կողմ էինք, որ գլխավոր դատախազը ներկա լինի, և ինքը վարի այս գործը, քանի որ այն բարդությամբ այնպիսին է, որ ենթադրում է նման մակարդակի մասնակցություն։ Բայց ակնհայտորեն օգուտ չի բերում, երբ գլխավոր դատախազը ներկայանում է առաջին ու վերջին նիստերին, ընդ որում՝ վերջին նիստին ներկայանում է, երբ քննարկվում է, որ Արցախի նախագահներն են երաշխավորությամբ հանդես գալիս, և իր փակման խոսքում համարյա սպառնում է դատարանին ձևակերպումներով»,- ասաց Արամ Օրբելյանը։
Արամ Օրբելյանն ուշադրություն հրավիրրեց նաև այն փաստին, որ երեկ դատախազն ըստ էության մեղադրեց Վճռաբեկ դատարանի Քրեական պալատի նախագահին ոչ օրինական ակտ կայացնելու մեջ՝ ասելով, որ փաստաթուղթը պատճառաբանված չէ, ու ինքը չի հասկանում, բայց եթե ինքը դա չի կարողանում հասկանալ, դա չի նշանակում, որ որոշումը սխալ է։ Խոսքը 300 և 300.1 հոդվածի դիսպոզիցիաների մասին է։