Ալի Խամենեին հողին հանձնեցին. Իրանում վերջին հրաժեշտն են տվել նահատակված հոգևոր առաջնորդին

Իրանի Մաշհադ քաղաքում տեղի է ունեցել Իսլամական հեղափոխության նահատակված առաջնորդ Այաթոլլահ Սեյեդ Ալի Խամենեիի հուղարկավորությունը, որին մասնակցել են Իրանից և տարածաշրջանի տարբեր երկրներից ժամանած միլիոնավոր սգավորներ՝ հայտնում են իրանական լրատվամիջոցները։

Մի քանի օր շարունակված սգո միջոցառումների ավարտին նա հողին է հանձնվել Իմամ Ռեզայի սուրբ դամբարանի Դար ալ-Զիկր աղոթասրահում։

Հուղարկավորությունից հետո իրանցիներն ու աշխարհի տարբեր երկրներից ժամանած մուսուլմանները կատարել են Լեյլաթ ալ-Դաֆն՝ թաղման գիշերվա ավանդական աղոթքը։

Հինգշաբթի առավոտյան Մաշհադի փողոցներում անցկացված վերջին հուղարկավորության թափորին մասնակցել է մարդկանց բազմահազարանոց հոսք։ Մահացածի համար ծիսական աղոթքը գլխավորել է նրա ավագ որդին՝ Սեյեդ Մոստաֆա Խամենեին։

Սգավորների մեծաթիվ մասնակցության պատճառով աղոթքներ են կատարվել ոչ միայն սրբավայրի տարածքում, այլև փողոցներում, որտեղ նույնպես հավաքվել էին մեծ թվով հավատացյալներ՝ վերջին հրաժեշտը տալու նահատակված առաջնորդին։

Սգավորները կրում էին ԱՄՆ նախագահ Դոնալդ Թրամփին դատապարտող պաստառներ եւ վրեժխնդրություն պահանջող լոզունգներ, փողոցներում արձագանքում էին «Վրեժխնդրություն, վրեժխնդրություն»։

Այաթոլլահ Սեյյեդ Ալի Խամենեին իր ընտանիքի մի քանի անդամների հետ սպանվել է փետրվարի 28-ին՝ Իրանի Իսլամական Հանրապետության դեմ ԱՄՆ-ի եւ Իսրայելի վարչակարգի կողմից սկսված 40-օրյա պատերազմի առաջին օրը։

Նահատակվածների թվում էին նոր առաջնորդի՝ այաթոլլահ Սեյյեդ Մոջթաբա Խամենեիի կինը, հանգուցյալ առաջնորդի փեսան, դուստրը և նրա 14 ամսական թոռնուհին։