Խավարածին մեկը փորձում է իր ապազգային սատանայական թեզերով կուրացնել ժողովրդին. Տեր Նարեկ
Պետությունը և եկեղեցին մեկ ամբողջություն են։ Ինչպես մարդը հոգի և մարմին է, այնպես էլ հայկական պետության հոգին Հայոց Եկեղեցին է, իսկ մարմինը` պետականությունը, ուստի այս երկուսի միջև բաժանում մտցնողը Հայի մահն է տենչում, գրել է Քուչակի Սուրբ Աստվածածին եկեղեցու հոգևոր հովիվ՝ Արժանապատիվ Տեր Նարեկ քահանա Սարգսյանը։
«Վերջերս Հայոց պետության իշխանական աթոռը զավթածը, Հայի ինքնության և գոյության թշնամին մի նոր սեպ և թշնամական միտք է երկնել, որով ցանկանում է վերջնականապես մահվան դատապարտել Հային` իր իսկ գրչով։ Այն գրչով, որով Հայը հարատևել է հազարամյակներ, այն գրչով որով Աստվածային կենարար խոսքն է հայացվել և մեզ դարձրել է Աստվածճանաչ և հզոր, Տիրոջը ընդունելով` հավիտենական։ Հենց այս իմաստուն հայրերը մեր Պետությունը կապեցին Քրիստոս Հիսուսի փեշից, որպեսզի ժամանակավորը դառնա անժամանակ, հարատև։
Եվ այսօր՝ 21-րդ դարում, «լուսավոր» այս դարում խավարածին մեկը փորձում է իր ապազգային սատանայական թեզերով կուրացնել մի ժողովրդի, որի հայրերը աշխարհով մեկ լույս են եղել և են, լուսավորել են համայն աշխարհը։
Իմ սիրելի՜ հայ ժողովուրդ, դու, որ սիրում ես ինքնությունդ, դիմագիծդ, որը ճարտարապետել ես հազարամյակների անսահման օվկիանը ճեղքելով` Աստվածային իմաստությանը անսալով և վստահելով Աստծուդ, այսօր էլ շարունակի՜ր վեհապանծ ինքնությամբդ կերտել և լինել իբրև մեկ ամբողջություն։ Սուրբ Եկեղեցին որպես հոգի և միտք առաջնորդում է հզոր «մարմինդ»` պետությունդ, ընդլայնվելուն և հզորանալուն»,-գրել է Տեր Նարեկը։
Հետևեք մեզ Viber-ում
