Խորապես հիասթափեցնող է, որ փոխնախագահը ջնջել է մի գրառում, որով ճանաչվում էր Ցեղասպանության ճշմարտությունը․ Փելոսի

Ամերիկացի դեմոկրատ քաղաքական գործիչ, Ներկայացուցիչների պալատի նախկին խոսնակ Նենսի Փելոսին իր X-ի էջում անդրադարձել է ԱՄՆ փոխնախագահ Ջեյ Դի Վենսի այցին Ծիծեռնակաբերդի հուշահամալիր ու այդ այցի մասին սոցցանցում արված գրառումը հեռացնելու աղմկոտ իրադարձությանը։

Փելոսին գրել է, որ երբ 2022 թվականին, որպես Ներկայացուցիչների պալատի խոսնակ, այցելեց Հայաստան, իրենց Կոնգրեսական պատվիրակությունը կանգնեց Ծիծեռնակաբերդում և հստակ ու կոշտ խոսեց Հայոց ցեղասպանության մասին, որովհետև, Փելոսիի համոզմամբ, ճշմարտությունը կարևոր է։

«Այդ ճշմարտությունը հաստատվեց, երբ Ներկայացուցիչների պալատը 2019 թվականին ճնշող մեծամասնությամբ ընդունեց երկկուսակցական բանաձև՝ ճանաչելով Հայոց ցեղասպանությունը, և երբ նախագահ Բայդենը 2021 թվականին ցուցաբերեց բարոյական առաջնորդություն՝ պաշտոնապես ճանաչելով այն — դիրքորոշում, որը ամոթալի կերպով հետ շրջվեց Թրամփի վարչակազմի կողմից։

Այնուամենայնիվ խորապես հիասթափեցնող է, թեև ոչ զարմանալի, տեսնել, որ փոխնախագահը ջնջել է մի գրառում, որով ճանաչվում էր այդ ճշմարտությունը։ Պատմությունը ջնջելը վիրավորում է զոհերի հիշատակը և թուլացնում է մեր հանձնառությունը մարդու իրավունքներին ամբողջ աշխարհում»,-գրել է Փելոսին։

Նշենք, որ ԱՄն փոխնախագահ Ջեյ Դի Վենսն իր հայաստանյան այցի ընթացքում այցելեց Ծիծեռնակաբերդի հուշահամալիր տիկնոջ՝ Ուշա Վենսի հետ։ Այնուհետև Վենսի սոցցանցային էջերում տարածվեց համապատասխան գրառում այցի մասին․ «Այսօր, փոխնախագահ Վենսն ու երկրորդ տիկին Ուշա Վենսն այցելեցին Հայոց ցեղասպանության հուշահամալիր ծաղկեպսակ դնելու՝ ոգեկոչելով 1915 թվականի Հայոց ցեղասպանության զոհերի հիշատակը»։ Կարճ ժամանակ անց Վենսի աշխատակազմը գրառումը հեռացրեց և հայտնեց, թե գրառումը սխալմամբ է տեղադրվել անձնակազմի կողմից, որոնք փոխնախագահի գլխավորած պատիրակությունում չեն եղել:

Վենսի խոսնակն իր հերթին հայտարարել էր. «Այդ օգտահաշիվը կառավարվում է այն աշխատակիցների կողմից, որոնք հիմնականում տարածում են փոխնախագահի լուսանկարներն ու տեսանյութերը: Այս հարցի շուրջ փոխնախագահի տեսակետին կարող եք ծանոթանալ ինքնաթիռի մոտ նրա արած մեկնաբանությունում»,- գրել է լրատվամիջոցը: Իսկ ինքնաթիռ նստելուց առաջ Վենսն ասել էր․ «Նրանք խնդրեցին մեզ այցելել այդ վայրը: Ակնհայտ է, որ ավելի քան 100 տարի առաջ տեղի ունեցածը շատ սարսափելի բան է»։

ԱՐԱՔՍ ՄԱՐՏԻՐՈՍՅԱՆ

168.am