90 %-ը եկել էր Վազգենի համար․ Արմեն Սարգսյանի գրառման իրական ասելիքը
Վազգեն Սարգսյանի եղբայրը՝ Արմեն Սարգսյանը, գրառում է արել։ Ասեմ, որ գրառման մեջ իմ ուշադրությունը գրավեց ոչ թե անձնական ու հասարակական էմոցիաները, այլ բոլորովին այլ բան։ Արմեն Սարգսյանը ճիշտ արձանագրել է՝ իր հոր հոգեհանգստին եկածների 90 տոկոսը եկել էր ոչ թե իրենց՝ եղբայրների համար, այլ Վազգենին ցավակցելու։ Արմենի կատարված գրառումից հատկապես այս հատվածը էական է․ «Վախենամ էլ չլինի էս տեսակ իրար գլխի հավաք։ Վազգենի ֆակտորը 90% էր, իմ ու Արամի համար էս տեսակ տարբեր մոտեցում ունեցող հասարակությունը հաստատ չէր գա մեր գյուղ․․․ »։ Եթե այս գնահատականը ընդունենք որպես ազնիվ դիտարկում, ապա ոչ մի այլ սոցիալական վիճակագրություն պետք չէ։
Սա պարզ, միանշանակ և բավականին ծանր խոստովանություն է․ օրվա իշխանությունը, որը տարիներ առաջ չէր ընդունում Վազգեն Սարգսյանին, իրականում 10 տոկոս է կազմում, որը եկել էր ոչ թե Վազգենի հիշատակը պատվելու, այլ քաղաքական ներկայություն ապահովելու նպատակով։ 90 տոկոսը եկել էին որպես հավատարիմ քաղաքացիներ՝ Վազգենի հիշատակի համար։ 10 տոկոսը եկել էր քաղաքական ներկայություն ապահովելու։ Իրապես, Վազգեն Սարգսյանն այնքան ուժեղ կերպար էր, որ ցանկացած մասնակցություն ընկալվում է որպես Վազգենին հավատարմության խորհրդանիշ։ Այս պնդման մեջ կա նաև հոգեբանական խոր ենթատեքստ։ Արմեն Սարգսյանն իր գրառմամբ հաստատեց, որ իրենք երկրորդական դեմք են՝ իրենց եղբոր հսկայական ստվերում։ Նրա խոստովանությունը, որքան էլ ցավոտ լինի, իրականում բացահայտում է հանրային ճշմարտությունը՝ այս երկրում կան մարդիկ, որոնց հիշատակը ավելի մեծ է, քան քաղաքականությունը, և ավելի ծանր՝ քան պաշտոնը։
Հասմիկ Բաբաջանյան
Հետևեք մեզ Viber-ում
