Աջափնյակի ՔՊ-ական նախկին ղեկավարը կրկին ամբաստանյալի աթոռին է

Աջափնյակ վարչական շրջանի ՔՊ-ական նախկին ղեկավար Գևորգ Բաբայանը կրկին ամբաստանյալի աթոռին է հայտնվել՝ պաշտոնեական լիազորությունների չարաշահման մեղադրանքով։ Վճռաբեկ դատարանը բեկանել է նրա վերաբերյալ արդարացման վճիռը և գործն ուղարկել առաջին ատյանի դատարան՝ նոր քննության։

Հիշեցնենք, որ ՔՊ-ական Գևորգ Բաբայանը թաղապետի պաշտոնը զբաղեցրել է 2018-2020թթ։ Ըստ քրեական գործի՝ Գևորգ Բաբայանը նույն վարչական շրջանի աշխատակազմի քաղաքաշինության և հողօգտագործման բաժնի առաջատար մասնագետ Սերոբ Սմբաթի Սարգսյանի կողմից 2019 թվականի սեպտեմբերի 26-ին Երևան քաղաքի Նազարբեկյան փողոցի հասցեներում առանց շինթույլտվության կառուցվող շինություններ հայտնաբերելուց և վարչական իրավախախտման մասին արձանագրությունը կազմելուց ու իրեն ներկայացնելուց հետո չի կատարել համայնքի ղեկավարի համար օրենքով սահմանված պարտականությունները, այն է՝ համայնքի ղեկավարը կանխարգելում ու կասեցնում է ինքնակամ շինարարությունը և օրենքով սահմանված կարգով ապահովում է դրանց հետևանքների վերացումը, իր պաշտոնեական դիրքն ծառայության շահերին հակառակ օգտագործելով և անձնական այլ շահագրգռվածությունից ելնելով՝ կազմված վարչական իրավախախտման վերաբերյալ արձանագրությունը սահմանված կարգով Երևանի քաղաքապետարան չի ուղարկել, բացի այդ Սերոբ Սարգսյանին արգելել է Երևան քաղաքի Նազարբեկյան 41/5 և 41/2 հասցեներում իրականացվող ապօրինի շինությունների վերաբերյալ վարչական իրավախախտման փաստն հավաստող արձանագրություններ կազմել: Դրանից հետո, ըստ մեղադրանքի, Գևորգ Բաբայանը, պարտավոր լինելով ղեկավարվելու ՀՀ կառավարության 18.05.2006 թվականի թիվ 912-Ն որոշմամբ սահմանված կանոններով, չի կատարել դրանք և հիշյալ հողամասերի վրա ինքնակամ կառույցների առկայության պայմաններում կառուցապատողներին տվել է չծանրաբեռնված հողատարածքում շինարարական աշխատանքներ կատարելու վերաբերյալ շինթույլտվություն՝ ինչի արդյունքում Երևան համայնքին պատճառվել է ընդհանուր 596.330 ՀՀ դրամին համարժեք գույքային վնաս: «Դրանից հետո իր հանցավոր մտադրությունը քողարկելու նպատակով՝ օգտվելով հաստիքի կրճատման արդյունքում Սերոբ Սարգսյանի կողմից 2019 թվականի հոկտեմբերի 2-ին աշխատանքից ազատվելու հանգամանքից՝ Երևանի քաղաքապետարան արձանագրությունը իր կողմից չուղարկելու հանգամանքը մեկնաբանել է որպես Սերոբ Սարգսյանի կողմից դրսևորած անփութության արդյունք՝ արձանագրությունն իրեն հանձնված չլինելու հետևանք: Որից հետո վարչական իրավախախտման վերաբերյալ արձանագրությունը կազմելուց շուրջ երկու ամիս անց՝ 2019 թվականի դեկտեմբեր ամսին փորձել է սկսել վաղեմության ժամկետը լրանալու պատճառաբանությամբ կազմված ակտի խոտանման գործընթաց, ինչի արդյունքում Երևան քաղաքի Նազարբեկյան փողոցի 41/6, 41/5 և 41/2 հասցեներում ապօրինի կառուցապատում իրականացնող անձինք չեն ենթարկվել «Վարչական իրավախախտումների վերաբերյալ» ՀՀ օրենսգրքի 154-րդ հոդվածի 1-ին մասով նախատեսված 200.000֊ ական ՀՀ դրամի չափով վարչական պատասխանատվության՝ ընդհանուրը 600.000 ՀՀ դրամի չափով: Վերը նշված գործողությունների հետևանքով Երևան համայնքին պատճառվել են ընդհանուր 1.196.330 ՀՀ դրամի չափով գույքային վնաս»,- նշված է մեղադրանքում։
Երևանի ընդհանուր իրավասության դատարանը՝ Մնացական Մարտիրոսյանի նախագահությամբ, արդարացրել է Բաբայանին՝ հանցակազմի բացակայության հիմքով։

Դատական ակտը, սակայն, բողոքարկման արդյունքում բեկանվել է։ Վճռաբեկ դատարանը որոշել է գործը նոր քննության ուղարկել՝ Հակակոռուպցիոն դատարան։ Գործը մակագրվել է Սուրեն Խաչատրյանին։

Ի. Ս.

pastinfo.am