Շատ կոնկրետ նմանություններ ենք տեսնում Թուրքիայի որդեգրած մեթոդների հետ. Մելքոնյանը բացահայտում է

«Պետության և եկեղեցու փոխհարաբերությունները. արդի հիմնախնդիրները» թեմայով քննարկման ընթացքում թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանը բարձրացրեց մի շարք կարևոր հարցադրումներ՝ կապված Հայ Առաքելական եկեղեցու և հոգևորականության դեմ իշխանության կողմից սկսված քննադատությունների և գործողությունների հետ։

Նրա խոսքով՝ ծագում է հիմնավոր կասկած, որ եկեղեցու դեմ ընթացող այս արշավը կարող է լինել Թուրքիայի և Ադրբեջանի ծրագրերին համահունչ կամ նույնիսկ դրանց մաս։ «Արդյոք այս ամենը նպաստում է թուրք-ադրբեջանական քաղաքական նպատակներին։ Արդյոք սա այդ ծրագրերի մի մասն է։ Այս հարցերը լուրջ են և արժանի են ուշադրության»,– ասաց Մելքոնյանը։

Թուրքագետը ներկայացրեց փաստեր, որոնք իր կարծիքով ամրապնդում են այդ կասկածները. մասնավորապես՝ Թուրքիայում գոյություն ունեցող անվտանգային հայեցակարգերն ու դոկտրինները բացահայտ կերպով Հայ Առաքելական եկեղեցին համարում են պետական թիրախ՝ նշելով չորս պատճառ․
    1.    Ազգապահպան դերակատարություն,
    2.    Ինքնության ձևավորման կարևոր գործառույթ,
    3.    Ցանցային կառուցվածք և տարածվածություն աշխարհում,
    4.    Հայոց ցեղասպանության միջազգային ճանաչման հարցում եկեղեցու ակտիվ գործունեություն։

Մելքոնյանը նշեց, որ այս պատճառներով Թուրքիան մշտապես որդեգրել է քաղաքականություն՝ ուղղված Հայ Առաքելական եկեղեցու հեղինակազրկմանը։ Այս քաղաքականության գործիքներից են հակադիր խմբերի ստեղծումը, եկեղեցու դեմ ներքին բախումների հրահրումը, հակաարշավների իրականացումը։

«Եթե վերլուծում ենք, թե ինչ է կատարվում այսօր Հայաստանի ներսում եկեղեցու դեմ, շատ կոնկրետ նմանություններ ենք տեսնում Թուրքիայի որդեգրած մեթոդների հետ։ Սա լուրջ մտահոգության տեղիք է տալիս»,– ընդգծեց Մելքոնյանը։

Նա հավելեց, որ իշխանության կողմից հնչած պատասխանները՝ թե այս ամենը կապ չունի արտաքին գործոնների հետ, բավարար և համոզիչ չեն։ «Ես պարզապես ներկայացնում եմ փաստերը։ Ամեն ոք կարող է իր եզրակացությունը անել՝ արդյոք այսօր կատարվողը համահունչ է թուրք-ադրբեջանական քաղաքականությանը, թե ոչ»,– եզրափակեց նա։