Նիկոլի պատմությունը ես եմ գրելու․ Նաիրա Զոհրաբյան (video)
Քաղաքական գործիչ Նաիրա Զոհրաբյանը անդրադարձավ Նիկոլ Փաշինյանի պետերբուրգյան այցին և ամփոփեց 2023 թվականը Հայելի ակումբի ուղիղ եթերում. «Ակնհայտ էր, որ Նիկոլ Փաշինյանը չէր կարող բոյկոտել ԵԱՏՄ նիստը Սանկտ Պետերբուրգում, որտեղ Հայաստանը պետք է ստանձներ նախագահություն։ Նիկոլ Փաշինյանը փորձեց հերթական անգամ աշխարհաքաղաքակա շպագատ իջնել և վերադառնալուն պես հայտարարեց, որ ԵԱՏՄ -ն ոչ թե քաղաքական, այլ պարզապես տնտեսական ինտեգրացիոն կառույց է և ինքն անելու է առավելագույնը, որպեսզի ԵԱՏՄ -ն հենց այդպիսին էլ մնա։ Սա հերթական բլեֆն է, քանի որ որ պահին էլ Հայաստանը դուրս գա ՀԱՊԿ -ից, նույն վայրկյանին Հայաստանի ականջից բռնած դուրս կշպրտեն՝ ԵԱՏՄ -ից։ Նիկոլ Փաշինյանը փորձում է լարախաղացի նման շարունակել երկու լարերի վրա խաղալ, նա փորձում է Արևմուտքին մեսիջներ ուղարկել , թե այսուհետ մեր անվտանգային և ռազմաքաղաքական պապան դուք եք, իսկ ԵԱՏՄ -ն մեզ համար պարզապես տնտեսական կառույց է, այդ տրյուկները չեն անցնելու և Նիկոլ Փաշինյանը չի կարողանալու երկար ժամանակ մանևրել Ռուսաստանի և Արևմուտքի միջև»։
Շարունակելով իր խոսքը տիկին Զոհրաբյանը նշեց. «Հայաստանում այսօր բռնապետություն է, մեկ մարդ փորձում է թելադրել իր կամքը և ցավոք մինչ այս պահը դա նրան հաջողվում է, քանի որ մենք ունենք ընդիմություն, որի որոշ գործիչներ ուղղակիորեն անամոթ, խայտառակ, անբարո ու դավաճան գործարքի են գնացել այս իշխանության հետ՝ իրենց ունեցվածքը պահելու համար, և նրանք ինձ համար նույնքան դավաճան ու հանցակից են, որքան այս իշխանությունը և նրանք այս իշխանության հետ հավասարապես պատասխան են տալու»։
«Ես հույս ունեմ, որ 2024 թվականին մենք կկադողանանք վերջապես ձևավորել ադեկվատ քաղաքական էլիտա, եթե կարողանանք քաղաքական աղբանոցն ուղարկել այն ընդիմադիրներին, որոնք իրենց ունեցվածքը պահելու համար կոմպրոմիսի են գնում այս իշխանության հետ». իր խոսքը եզրափակելով նշեց բանախոսը։
Մանրամասները՝ տեսանյութում․
Գոհար Պողոսյան
Հետևեք մեզ Viber-ում
