Բագրատաշենի մաքսատան հարակից տարածքից ավտոմեքենա էին գողացել

SHAMSHYAN.com-ի ​ տեղեկություններով՝ հուլիսի 3-ին ավտոմեքենայի գողության դեպք է տեղի ունեցել Տավուշի մարզում: Այդ օրը՝ ժամը 21:00-ի սահմաններում ՀՀ Ներքին գործերի նախարարության ոստիկանության Նոյեմբերյանի բաժին է դիմել Ուկրաինայի քաղաքացի, 23-ամյա Վ. Լովանսկին եւ հայտնել, որ հունիսի 27-ին՝ ժամը 20:15-ից մինչեւ հուլիսի 3-ն ընկած ժամանակահատվածում անհայտ անձը կամ անձինք գողացել են Բագրատաշենի մաքսատան հարակից տարածքի ԱՊՊԱ պայմանագրերի կնքման կետի մոտ կայանված իրեն պատկանող Chevrolet Camaro տարանցիկ համարանիշի ավտոմեքենան:

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել ՀՀ ՆԳՆ ոստիկանության Տավուշի մարզային վարչության պետ Արթուր Մկրտչյանը, ոստիկանության Նոյեմբերյանի բաժնի պետ Վահան Ազատյանը:

Գողության դեպքով ​ ոստիկանության Նոյեմբերյանի բաժնում նյութեր են կազմվել, որոնք փոխանցվել են Հայաստանի քննչական կոմիտեի Տավուշի մարզային քննչական վարչության Նոյեմբերյանի քննչական բաժին:

Գ. Շամշյանի տեղեկություններով՝ ոստիկանության Տավուշի մարզային վարչության, ոստիկանության Նոյեմբերյանի բաժնի ծառայողները կարճ ժամանակում ձեռնարկելով օպերատիվ-հետախուզական միջոցառումներ, հսկայածավալ գրագետ եւ ճիշտ աշխատանքի արդյունքում պարզում են գողություն կատարած ենթադրյալ կասկածյալի ինքնությունը եւ մեկնում նրա բնակության վայր, սակայն այդ տղամարդը այնտեղ չի լինում:

Տավուշի մարզի ոստիկանները օպերատիվ ճանապարհով ճշտում են նրա գտնվելու վայրը ու կատարում բացատրական աշխատանքներ: Սկզբից նա չի ընդունում, որ ինքը նման բան է արել, եւ որ դա իր ձեռագիրը չի, սակայն տեսնելով, որ ​ Տավուշի ոստիկանների տեղեկությունները հավաստի են, փաստերի ճնշման տակ հուլիսի 7-ին ներկայանում է ոստիկանության Նոյեմբերյանի բաժին եւ հայտարարում, որ ավտոմեքենան հուլիսի 1-ին՝ կեսգիշերն անց, ինքն է տեղափոխել Գյումրի: Ժամեր անց արդեն ոստիկանության Նոյեմբերյանի բաժնի հերթապահ խումբը նշված ավտոմեքենան հայտնաբերում եւ քարշակի միջոցով տեղափոխում է ոստիկանության Նոյեմբերյանի բաժնի պահպանվող հատուկ տարածք:

Գ. Շամշյանի տեղեկություններով՝ կասկածյալը Շիրակի մարզի բնակիչ, 44-ամյա Արմեն Մ.-ն է, ով հայտնաբերված ավտոմեքենայի փաստով կազմված փաստաթղթերով ներկայացվում է Նոյեմբերյանի քննչական բաժին: