Շահույթը նվազել է ավելի քան 52 տոկոսով

Ադրբեջանի բանկային հատվածի եկամուտները՝ պայմանավորված նավթի համաշխարհային գների և պահանջարկի անկմամբ, ազգային արժույթի արժեզրկմամբ և երկրում առաջացած ճգնաժամով, զգալիորեն նվազել են: Այս մասին հայտնում է ադրբեջանական APA-Economics-ը: 2017-ի հուլիսի 1-ի դրությամբ բանկային հատվածի մաքուր շահույթը կազմել է 84,9 մլն մանաթ: Ադրբեջանի ֆինանսական շուկաների վերահսկիչ պալատի փոխանցմամբ` մայիս ամսվա համեմատ հունիս ամսին բանկային համակարգի շահույթը նվազել է 93,3 մլն մանաթով կամ 52,4 տոկոսով: 2017-ի 6 ամսում Ադրբեջանի բանկային հատվածի տոկոսներից ստացված եկամուտները կազմել են 1 մլրդ 7,3 մլն մանաթ, տոկոսային ծախսերը` 482,7 մլն մանաթ: 2015 թ. ընթացքում ազգային արժույթի` մանաթի 100 տոկոսից ավելի արժեզրկվելու, բնակչության դոլարով վերցրած վարկերը վերադարձնելու գործում ծագած դժվարություններն ավելի են մեծացրել խնդրահարույց վարկերի ծավալը: Միայն 2016-ի ընթացքում Ադրբեջանում չեղարկվել են մի շարք բանկերի գործունեության թույլտվությունները: